Ni Cyrus M. Garde
Syudad sang BACOLOD – Patay ang 26-anyos nga ginang matapos nga naigu sang kilat sa Sitio Dahlia, Brgy. Puey, Syudad sang Sagay, Negros Occidental alas-cuatro sang hapon sadtong Huwebes.
Ginkilala ang biktima nga si Michelle Padillo. Naigu kag nasamaran sia sa ulo kag agtang.
Ginhingangaw pa sia dala sa Sagay District Hospital sa Brgy. Bato apang ginlawag nga patay antes pa man mag-abot didto.
Nahibaluan nga ang Brgy. Puey nabukid nga barangay sa Syudad sang Sagay kag may kalayuon nga 50 kilometro gikan sa mayor sang syudad.
Gin-report naman nga si Padillo nagapanglaba sa suba sang mag-ulan kag magpangilat.
Sunu pa sa report nga ginpatawag sang biktima sa iya tatlo ka tuig nga bata nga babae ang iya bana agud hakwaton ang labador nga may linabhan, apang wala ini gilayon maka-kadto.
Rason nga nagdesisyon na lang sia nga bitbiton ang linabhan apang pila ka metro na lamang ang kalayuon niya sa ila balay, naigu pa sia sang kilat.
Ang mga kaigod-balay nila nagtinguha man nga salbaron ang biktima paagi sa pagbanyos sang langgaw apang wala gid maumpawan.
Sunu kay Supt. Edcel Manzano, hepe sang Sagay City PNP, ika-duha na ini nga insidente nga nagluntad sa amo nga barangay./H
