[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’Valentine letter ni Papa kag Mama ‘ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
BY JOEL FRANCO
[/av_heading]
[av_textblock size=” font_color=’custom’ color=’#0a0a0a’]
Thursday, February 16, 2017
[/av_textblock]
[av_textblock size=” font_color=’custom’ color=’#0a0a0a’]
DEAR Anak,
Sang una ka nga nag-abot sa kabuhi namon ni Mama mo, dako ang ginbag-o sang amon kabuhi. Ikaw ang naghatag sang kasanag kag kalipay sa atun panimalay. Ikaw ang naghatag sang indi mapaathag nga kasadya sa amon kabuhi.
Makalipas ang panahon madasig ka na magdalagan. Amon ginabantayan ang una nga imo namitlang kaangay sang “Mama” kag “Papa.” Nagatulo ang amon luha sang kalipay sa tagsa nga ginamitlang ini nga mga tinaga.
Ang imo una nga adlaw sa daycare nangin espesyal sa amon kay may anak na kami nga nagaeskwela asta nga subong naga teenager ka na. Sang una ang masami nga “Love you, Papa, love you, Mama” indi na namon mabati-an. Kun may ginahambal kami halos wala ka nagapamati kay may sungsong nga earphone ang imo dulonggan ukon masako ka sa pag-scroll sang imo gadget. Pero okay lang ina kay ginahangop namon ang inyo henerasyon. Moderno kag masami masako.
Valentine’s Day sadtong Martes. Kumusta naman ang imo selebrasyon? Nakita ko sa imo Facebook gintamyaw mo ang imo abyan kag ang isa pa gid ka espesyal sa imo dughan. Ako bala, anak, ara man sa Facebook pero wala ka gid nakatamyaw sa akon kag kay Mama mo. Nasubuan ako kay daw nalipatan mo na kami kun ara ka sa kasadya upod sa imo mga abyan. Madumduman mo lang kami kun wala ka na allowance. Kun may balayran ka sa eskwelahan nga wala ko na ginapamangkot kun tuod gid man nga balayran ukon pang-date mo lang?
Anak, wala ako nagapanumboy. Gusto ko lang ikaw pahanumdumon nga hatagan mo sang bili ang mga simple nga bagay sa palibot. Hatagan mo sang pagtamod ang mga tawo nga nagapalangga sa imo nga nabilin sa inyo balay.
Anak nahibaluan ko nga may kakulangan man kami nga mga ginikanan. Kadamo sang mga bagay nga indi namon mahatag sa imo kag sa imo nga utod. Pero sa pihak sini gusto namon ipahibalo sa imo nga palangga ka namon.
Anak kun masami ka man ginahambalan, indi ina tungod ginaakigan ka. Ini ubay lamang sa imo agud indi ka magtalang sang banas. Kun ano man ang ginakawilihan mo subong nga rason nga daw wala na ang imo atensyon sa balay, palihog paminsar ka gid sang madalum. Indi mo pagkabigon nga ginapabudlayan ka bangud kulang ang allowance mo. Indi man silot ang pagpahanumdom sa imo nga mag-eskwela sang tarong. Indi man ini para sa amon kundi para sa imo palaabuton.
Masadya ang may nobyo ukon nobya…pero mas masadya gid kun makatapos ka kag makaobra kay may pang-date ka na.
Anak, magtutom ka. Wala kami nagapugong nga maghigugma ka. Butangan lang sang latid kag limitasyon. Pasangkara ang imo panulokan. Kung baga sa Ingles, “Look beyond that mountain, sail beyond than ocean.”
Upod kita sa paghanda sang imo palaabuton subong. Ang masanag kag maayo nga palaabuton, ginasuguran na balay subong.
Halong anak, indi lamang sa gamo. Halong ka labi na sa pinalangga nga ara sa tupad mo. Kay kun madala ka sang imo balatyagon, bug-os na nga kabuhi ang ihigot mo.
Happy Valentine’s Day, anak.
Ang nagapalangga, Papa kag Mama./PN
[/av_textblock]
[/av_one_full]
