UPOD kita sa tindog ni Presidente Marcos Jr., sa iya pagpanguna sang aton foreign relations, nga mag-“abstain”, ukon indi magboto “Yes” man ukon “No”, sa resolusyon sang UN General Assembly agud mag-untat (ceasefire) na sa pag-inaway ang Israel kag Hamas militants nga nagagahum sa Gaza.
Ang iya rason, ugaling, basi indi man magtugma sa aton rason.
Sa UN Resolution vote, 120 ang nagboto pabor (Yes) sa ceasefire, 14 ang nagkontra (No) kag 45, lakip ang Filipinas, ang nag-“abstain”.
Bag-o sini, apat gid ka beses nga gintulod sang UN Security Council ang”ceasefire” apang gin-veto ini gihapon sang United States, gani indi ini mapatuman.
Tungod sini nagpasar na sang ceasefire resolution ang UN General Assembly. Wala ugaling sing police power ini agud ipatuman ining resolusyon, gani sige lang ang pag-ilinaway tubtub seguro sila na lang nga duha mag-desisyon nga untaton na ini.
Ayhan paagi sa isa ka “truce” para sa temporaryo anay nga pag-untat sang inaway ukon sa isa na ka final nga “treaty” para sa madugayon na nga kalinong sa tunga sang Israel kag Gaza.
Tani indi man pareho ka dugay ining ila gyera sa Great War sa Europe nga natapos lang pagkatapos sang pitu (7) ka tuig paagi sa Treaty of Paris.
***
Ang brutal nga pag-atake sang Hamas pasulod mismo sang Israel sadtong Oktubre 7 nagpatay gid sang mga 1,400 ka tawo. Wala sing ginpasin-o, soldado man ukon sibilyan, tigulang man ukon bata lakip ang mga lapsag.
Kag kon diin man sila makita kag masapwan nga gaharay-ad tadtad sang bala, napugutan sing ulo, kag na-rape nga mga menor de edad.
Nagdala pa sila sang mga 200 ka hostages agud seguro gamiton sa ila pagpanagang sa pagbalos nga atake sang Israel, nga pila sini naluas na sang Israel.
Tungod sa sining makangilidlis nga “invasion” sang Hamas indi na katingalahan kon ngaa terorista ang tawag sa ila.
Ginsabat naman ini sang Israel gamit ang ila bug-os nga pwersa sa hangin, sa kalalawran kag sang ground forces nga sang sini lang nagsulod na sa Gaza. Samtang nagabalos man ang Hamas halin sa Gaza sing missile attack kag bombardiyo nga may bulig sang mga Hezzbollah terrorists sa border sang Lebanon.
Sa sige pagbayluhanay sang pang-atake, naglab-ut na ang nagkalamatay sa mga 8,000 halin sa pihak kag pihak sugod sang nagpatuman na ang Israel sang malaparon nga pag-atake sa Gaza tubtub subong.
***
Tungod naga-gyera na sila, kag tungod sa sobra-sobra nga gut-gut nila sa isa kag isa, indi mo na matuod mapunggan pa sila sa ila gyera bisan pa sa pagsaway na sang na-konsyensya na nga mga kaalyado kag kasilingan nila.
Amo gani nga samtang daw luyag man kita mag-upod sa panawagan nga “ceasefire”, tungod lubos naman nakabalos ang Israel, luyag ta na lang mag-upod sa pag-“abstain”. Kag magbulig panugyan na gid lang nga seguruhon nga masunod nila ang International Rules of War kag mapaseguro nga malikaw ang mga sibilyan sa kapahamakan kag matagaan sang humanitarian aid ang mga biktima.
Mabudlay na matuod punggan pa ang ila gyera tubtub mabulong ang gutgot sang isa kag isa – ang mga Hamas nga handom “patyon ang tanan nga Jews” kag ang Israel sa handom sini nga dulaon ang paggahum sang mga Hamas sa Gaza.
Of course, nagalaum kita nga indi na magdugay ang ining gyera sang duha ka pungsod, tungod bisan ang mga kaalyado sa pihak kag pihak kag mga kasilingan nga mga pungsod indi man luyag maglapta pa ang ila gyera sa gwa sang Gaza.
Unless, gusto gid man nila mag-3rd World War na. Gusto nyo?
In fact, ang US, ang mayor ng kaalyado sang Israel, nagpanugyan gid sa Israel nga indi dapat ilakip sa ila gyera nga sakupon ang Gaza – “It is a mistake,” siling gani sang US. Nga ginpasalig man sang Israel, kay ang handom nila amo ang paglutos lang sa Hamas terrorists agud mabuslan ini sang gobyerno nga masaligan sa pag-respeto sang kalinong sang Israel.
Wala lang kita kahibalo kon ano man ang tindug sang Iran sa sining gyera. Mayor nga promoter ini sa proxy war sang Hamas kag Hezzbolah kontra Israel kag US. Pero seguro naton nga indi man luyag sini nga maglapta pa ang gyera tubtub sa Iran.
Meantime, buligan ta na lang ipangamuyo nga mahusayan na ini nga gyera nila sa indi na madugay kag indi na masulit. Amen!/PN
