
ABYAN sang aton pungsod ang tanan nga myembro sang United Nations nga naga-respeto sa aton, lakip na ang pungsod sang Russia.
Apang indi kita kunsintidor sang sayop sang abyan kag gina-kondenar naton ang desisyon ni Russian President Vladimir Putin agud salakayon ang halos wala inugbato nga pungsod sang Ukraine.
Aba, kag wala gid ini sing kaluoy! Labi na gid sa pagpaulan sang mga “killer missiles” sa Ukraine, nga wala sing pili kon sin-o ang iguon. Soldado ka man ukon sibilyan kag bisan ang mga “helpless” nga mga pumuluyo.
Lakip diri ang mga pasyente sa ospital, mga tigulang sa “elderly homes” kag ang mga inosente nga mga kabataan. Pati na gani ang yara pa sa taguangkan sang mga iloy nga manugbata sa maternity wards.
Sunu sa ulihi nga pagpahibalo sang United Nations (Marso 10, 2022), luas sa linibu nga nagkalamatay nga mga soldado, mga 549 ka sibilyan ang napatay kag 957 ang nahalitan (injured), although nagapati ang UN nga sobra dira ang kabug-usan nga nabiktima.
Myembro ang Russia kag Ukraine sang United Nations, kon diin ang mga myembro may sinumpaan, pagkatapos sadtong Second World War, para sa “peaceful coexistence” kag paglikaw sa “outbreak of violence” nga indi ma-“justify”.
Sa pagpasalakay ni Putin sa Ukraine, maathag nga na-violar sini ang kasugtanan para sa “peaceful coexistence”.
Ang rason lang ni Putin amo nga ang kasilingan nga Ukraine isa ka daku nga pamahog sa iya seguridad.
Paano abe mangin pamahog ang isa ka mahuyang nga pungsod katulad sang Ukraine batok sa isa ka world power nga may kusog nuclear katulad sang Russia?
Bisan gani ang mga pumuluyo nga Ruso nag-kondenar sining desisyon sang ila president paagi sa malawakan nga protesta sa mga dalanon.
In fact, ginpakamalaut man ini ni Pope Francis, ang lider sang sobra isa ka bilyon nga mga Kristiyano, kag gintawag ini nga “armed aggression” nga indi ma-“justify” ni Putin.
Pang-bully lang ini! Indi lang ni Putin seguro luyag makita ang malipayon kag hilway nga panghulag sang kasilingan nga Ukraine nga sadto Komunista apang Demokrasyahon na ang pagpangabuhi sa karon.
Imposible ugaling nga mag-surrender na gid lang ang Ukraine kay para sa bisan isa ka gamay nga pungsod nga palangga ang kahilwayan maayo pa mapatay nga nagaaway sangsa i-surrender ining ila kinamatarong, nga amo na gani karon ang nagakatabo.
Ugaling man kay indi mabatas sang iban nga pungsod ang ining “unjustified aggression” kag pagpanglupig sang Russia.
Gani, samtang wala pa sila makita nga aktwal nga peligro sa ginahimo sang Russia kontra sa ila, luas sa pagpangaman, naghimo na sila sing mga lihok agud diri pa lang sa Ukraine mapunggan na ang posible nga pag-abanse sang Russia sa ila mga pungsod.
May nagapatuman na gani sing mga “sanction” agud mapabatyag ang ekonomiya sang Russia. May mga humanitarian aid man sa mga nahalitan sa Ukraine. Ang iban nagahatag armas diri agud bisan paano mapangapinan nila ang ila pungsod.
***
Sa bahin sang mga magagmay kag may kabalaslan nga mga pungsod sa Russia, lakip ang Filipinas, katulad sa ginhatag sini nga mga COVID-19 vaccines sa aton, indi man dapat naton i-surrender ang aton kinamatarong sa paghimo sing matarong nga panindugan.
Otherwise, ang gwa naton daw robot nga wala sing konsyensya kag erehes nga wala sing ginatuohan nga matarong nga Diyos.
Hambalon naton si Putin nga ginapasalmatan naton ang nabulig sini sa aton, apang prankahon ta ini nga indi naton naluyagan ang daw binuang niya nga pagsugo agud salakayon kag dugmokon gid ang Ukraine.
Updan man naton ang mga panawagan na sang madamo nga mga pungsod nga untaton na sang Russia ining iya malain nga buhat sa Ukraine.
Ipanugyan ta man nga makigsugilanun lang ang duha ka pungsod para mauntat na ang ila pag-inaway kag ipadayon ang commitment sa “peaceful coexistence” bilang myembro sang UN.
Indi man imposible ini bisan pa magkasilingan sila kag lain ang ila ideolohiya – Komunista ang Russia kag Demokrasya ang Ukraine.
Katulad bala sa tunga sang North kag South Korea, nga bisan magkatuhay ang ila ideolohiya, wala man sila problema bilang magkatupad nga teritoryo.
Abyan naton ang tanan nga pungsod sa UN, kag tungod mag-abyan kita, obligasyon ta man nga sawayon ang nakasayop kag patung-an ang ila problema nga indi na maglain pa kag mapabalik ang ila “peaceful coexistence”./PN