Admitido sang Pulse Asia ang kasaypanan sang ila survey

WALA sing survey, ukon pagpanalawsaw, nga himo sang tawo parti sa iya panghuna-huna kag desisyon, nga maka-predict sing lubos kon ano ini tubtub ipatuman na niya ini. Kag ina bisan ginpatigayon pa ini sa isa ka scientific nga paagi.

Daku nga rason diri ang mabudlay nga pagkuha sang madamo nga random sample respondent para mangin “representative” gid sang kabug-usan, given ang kinahanglan nga budget kag ang kadamuon sang sectoral groups.

Ang ideal nga kadamuon sang isa ka political survey sunu sa bantugon nga Gallup Polls amo ang 10% sang populasyon nga tuyu kuhaan sing prediction. Mga 11 ka milyon ini sang mga Filipino.

Sa masami diri sa Filipinas, ginakuha na gid lang ang pila ka libu  nga sample respondents, mga 2,000 lang, kag liwat-liwaton ang survey sa pareho nga lugar ukon demographic group, katulad sang 100 times tubtub maangkon ang isa ka consistent nga resulta.

Tungod sini, ang prediction kon kis-a husto, kon kis-a sala, nga tungod sini madamo ang wala nagapati sini. Although kon ano man ang resulta makabulig ini sa pagpamuklat sa mga isyu nga luyag sang mga botante tagaan importansya, nga importante man sa mga kandidato samtang sige ang kampanya.

In fact, experyensya ini mismo sang Gallup Polls sa survey sini sa pag-predict kon sin-o ang madaug nga Presidente sa Estados Unidos.

Hambalon pa, wala ma-predict sini kon sin-o ang nagdaug nga kandidato sa pagka-Presidente sa eleksyon sadtong 1948, 1976, 2004, 2012 kag 2016.

Sa wala na-predict sang Gallup Polls nga nagdalaug sa presidential election, pinasahe ang kaso ni Harry Truman (D) batok kay Thomas Dewey (R) sadtong eleksyon sang 1948.

Sa walo (8) ka monthly survey halin sang Pebrero tubtub Oktubre, isa ka bulan bag-o ang eleksyon, wala gid maka-abanse si Truman. Pirme siya wigit sa survey sang indi magkulang sa 10% nga abanse (average) ni Dewey.

Apang sa adlaw na sang eleksyon sang masunod nga bulan sang Nobyembre, si Truman ang gindeklarar nga nagdaug.

***

Tungod sining experyensya sang Gallup Polls, indi imposible nga magsayop ang Pulse Asia sa Election 2022 diri sa Filipinas nga sang nagliligad nga binulan nag-predict sang padayon nga pag-abanse sing daku ni Marcos Jr., samtang naga-abanse man si VP Leni sa survey sang CEAP, Veritas Truth Survey kag latest OCTA Research.

Gin-aku sang Pulse Asia nga wala nila nalakip sa survey ang Class A kag B nga respondents. Lakip diri ang mga manggaranon kag may ikasarang sa pangabuhi nga mga professional.

Importante ini nga mga grupo tungod, samtang indi gid man sila madamo, mga “influencers” ini sila sa madamo tungod sang ila respetado nga tindug sa sosyedad kag bilang dalangpan sang bulig sang mga kasilingan.

Tungod sini, upod ang mga “more credible” endorsers, pwede ini sila matagaan sing “weighted score” bilang separado nga grupo sa survey, nga maka-impluwensya bisan sang panghuna-huna sang iban.

Diri sa mga “influencers” kag “more credible endorsers”, no doubt, pinakabakud si VP Leni ikumparar sa iban nga kandidato sa pagka-Presidente.

May 160 ka ekonomista nga nag-endorso sang iya kandidatura. Yara man ang 150 ka law professors upod si retired Supreme Court Chief Justice Hilario Davide, grupo sang health frontliners, teachers’ groups, retired AFP chiefs of Staff, halos tanan nga anay cabinet officials nanday Presidente Ramos kag Arroyo, leading celebrities sa entertainment world, kag iban pa halin sa academe, entertainment world, health workers, business, kag bisan foreign investors.

In fact, madamo nga mga sektor sang mga kubos kag “disadvantaged”ang nag-endorso kay VP Leni, lakip ang mga “influential” nga labor groups (moderate kag militant) nga segurado naton wala natagaan sing bulag nga pagtalupangod sang Pulse Asia.

Gin-ako man sang Pulse Asia nga samtang madamo ang  nagpahayag sang ila preference kay Marcos Jr., ginsiling man nila nga luyag nila ang kandidato nga  “…has the greatest concern for the poor, most honest and trustworthy, and least corrupt”.

Ini nga “inconsistencies” gapahangop lang nga wala sila kahibalo kon ano gid ang pagkatawo ni Marcos Jr.

Tungod sini, kinahanglan gid sang grupo ni  VP Leni – nga limpyo ang pagkatawo, wala bahid sing corruption,  may excellent service track record, kag programa – kag sang iban nga opposition candidates nga mahublasan si Marcos Jr. sa nabilin pa nga sobra isa ka bulan nga pang-kampanya.

Dapat mahibal-an gid sang mga pumuluyo ang kamatuoran nga wala nagbayad si Marcos Jr. sang buhis sadtong 1982-1985, ang iya kahilabtanan sa ill-gotten wealth sang ila pamilya, mga binutig parti sa iya kuno diploma kag napasar nga kasuguan, kag kuno Golden Era ang Marcos martial law samtang, sa matuod, ginsikway ini sang mga pumuluyo paagi sa 1986 Edsa Revolution./PN