MASAKIT ang mahul-an, masubo ang madulaan, nagabatyag kita sang kanugon kag nagakabalaka kita sa mangin palaabuton.
Duna sa tawo ang magkahangawa, ilabi na kon ang iya naandan nga pagsinarayo ang matublag. Indi kita luyag nga mahamulag sa aton ginatawag nga ‘comfort zone’ sa kabuhi.
Sa bisan diin man nga aspeto sang aton pagpangabuhi, sa aton man palibot, sa trabaho ukon sa mga pagbakas, kon nagahana ini nga matublag, dayon naton pahayag sang aton kahangawa.
Kaangay sa ipatuman nga pagpasarado sa isla sang Boracay, madamo sang ispekulasyon, madamo sang negatibo nga panan-awan, madamo sang kahadlok nga nagatublag sa paminsaron kag balatyagon.
Ang tanan nga kahangawa tuga sang kahadlok kag kaangay sa ambahanon ni Coritha nga “Oras na (Tayo na sa Liwanag),” ginasiling sini nga “Ang takot ay nasa isip lamang.”
Matuod, ang tanan nga kahangawa tuga sang kahadlok, nahadlok nga madulaan sang trabaho, matublag ang normal nga pagsinarayo kag madulaan sang adlaw-adlaw nga pangita ang mga nagaprobitsar sa kadagaya sang maganar sa isla sang Boracay.
Malawig na ang panahon nga ginkamasaan sang mga negosyante ang isla sang Boracay, nagpinagusa sila sa pagpatindog sang mga istruktura, nagpatarasak sa paghimo sang mga bagay nga makapatubod sa ila sang kwarta.
Nagtungtong sila sa bulawan apang ang ila higko ginalamhit nila sa ila tiilan. Nalipat sila sa ila obligasyon nga amligan, indi pag-abusaran, kag tipigan ang lugar nga nagapamuad sang ila nga manggad.
Tion na nga papahuwayon sang makadali ang kapoy na nga balas sang isla, pila na ka tiil sang madamo nga rasa ang naglinas. Maluya na ang hampak sang balok nga masami ginasumalang sang mahigko nga tubig gikan sa kanal kag duga sang ila mga kasilyas.
Nadulaan na ang esensya sang matuod nga pagdumala sa isla bangud mismo ang mga opisyales sa lokal kag nasyunal nga panguluhan ang nabuyo sa pagganar kag ginpahigad nila ang katungdanan nga dapat hatagan sang balor ang isla imbis nga hatagan sang balor ang maganas sa isla.
May mga programa kag proyekto ang tagsa ka ahensya sang gobyerno agud nga mabuligan ang tagsa ka mga apektado, wala sila ginapabay-an kag natural lang nga magreklamo bangud nga mangin indi normal kaysa kinaandan ang mangin senaryo.
Aton lang hatagan sang higayon nga makapahuway kag makapabalik sa dapat sini nga kahimtangan ang isla.
Ginasiling nga sa tagsa ka kalamidad may yara sang oportunidad. Kaangay man sini ang madangatan sang Boracay. Bangud sa sini nga pagpasarado sa isa ka bintana, may higayon ang tanan nga makalantaw sa isa pa ka bintana kag posible matukiban ang mas manami nga lalantawon, mas masanag nga palaabuton, kag makita ang mga bagay nga mas makagalanyat sa panulok.
Kon luyag naton nga magdabong ang isa ka tanum, aton ginapunggulan, aton ginahagbasan, ginaligto ang sanga agud nga mahatagan sang tsansa nga mas makapanalingsing ang iban pa nga dahon kag mas makatubo ang bag-o nga mga sanga.
Kaangay sang ulod nga nagahulat kag naga-antus, sa pag-abot sang tion, siya ang mangin maanyag nga alibangbang.
Ang pagkahulog sang dahon nga laya indi pagkanugunan bangud ini liwat nga higayon agud magadabong. (bertladera@gmail.com/PN)
