MAY REKLAMO kami sa PLDT, nga tani masabat sini sing lubos sa indi na magdugay.
Sa sobra tunga sa bulan (Enero 15 – Pebrero 6) na ang ugtas namon sa bisyohan nga wi-fi connection, pero wala kami tubtub subong makabaton sing deduction sa amon bill angot diri sa sulod na sang duha ka bulan (Pebrero kag Marso).
In fact, sadtong Disyembre 2018 pa ang pagbisyo sang amon wi-fi, nga importante gid kaayo para sa akon.
Sa masami naga-email ako sang madamo nga mensahe, sang gina-edit ko online, kag sang akon kolum nga ginapadala ko sa Panay News duha ka beses kada semana.
Apang gin-antos ko lang ini, kag sang iban pa nga myembro sang amon pamilya nga masami man nagagamit sang wi-fi, tubtub nga indi na gid kami makaagwanta. Gani nagreklamo ako sa upisina sang PLDT Iloilo sadtong Enero 15, 2019.
Nagbalik ako sa upisina sang PLDT Iloilo sadtong Enero23 kay nagbisyo liwat ang wi-fi. Liwat nagbisyo ini kag liwat ginreklamo ko sang Enero 26. Kag liwat nagbisyo nga ginreklamo ko naman sadtong Pebrero 4. Ginkadtuan ini sang contractor duha ka adlaw despues kag nakaayo na ini liwat.
In fact, isa lang ka semana ang nagligad kag nagbulubisyo naman ining wi-fi connection namon tubtub karon. Indi gid man masyado kaulugtasan gani ginapasensyahan ko anay.
Kon sumahon mo gani ang perhwisyo sa amon, daw indi mo mabayaran ini sing linibu ka pesos. Na-obligar na gani ako sa paggamit sang isa ka wireless nga wi-fi nga gadget agud lang makasulod sa internet sa madamo nga kahigayunan. Kag halos P50 gani ang ginagasto ko diri sa kada tion nga ginagamit ko ini.
Kon makapaabot pa kami sing deduction sa perhwisyo sang amon wi-fi connection, palihog lang Mr. PLDT indi na kami pagpaugtasa pa gid sing hulat. Amen!
***
WALA naluyagan kag ginkasubo gid sang mga senior citizen ang panugdaon kontra kay Gobernador Defensor, nga isa man ka senior citizen, nga ginatudlo sang pila ka pumuluyo sa kay Congressman Ferjenel Biron.
“Si Gobernador Defensor tam-an na katigulang, dali na lang ina mapatay…,” sugid kuno sang isa ka taga-Passi kay Gob nga ginsiling mismo ni Congressman Biron sa isa ka miting nila.
Mga 78 anyos na seguro si Gob, apang mapagsik pa ini kag wala nagapalya sa pag-report sa kapitolyo kag sa kon diin pa agud atubangon ang iya mga obligasyon. May nahibal-an gani ako nga 104 anyos na ang edad nga nakapangasawa pa sing tinedyer kag nakabata pa sila. Ano pigaw!
Nabatian man ni Gob ining sugilanon sa banwa sang Leon sang nag-miting sila didto. Sa ila miting sa Alimodian, may nagpalapit gani nga mga senior citizen nga nagpautwas gid sang ila kaakig kag kahanusbo sa sining pag-wish sing malain, ukon pagtuloy, kay Gob. Naghibi gani ang pila sa ila.
“Tani mag-amlig man ang aton mga kontra sa pagbuhi sang kasubong nga panugdaon kay samtang luyag pa sang iban nga maglawig pa ang aton kabuhi tungod madamo pa kita sing kaayuhan nga mahatag sa pumuluyo, sila iya luyag nga mapatay kita dayon,” siling gani ni Gob.
Gin-deny kuno ining pagtuloy kay Gob ni Mayor Kalay sang Alimodian, kag gin-deny man ini sang chief of staff ni Congressman Biron.
Sin-o ayhan sa ila ang nagasugid sing matuod? Si Mayor Kalay bala? Ang chief of staff bala ni Biron? Ukon ang mga tigulang nga nagsugid sini kay Gobernador Defensor?
Kon si Gob ugaling ang pahambalon, natural lang nga apinan ni Mayor Kalay (kag sang chief of staff ni Biron) si Congressman.
Wala ugaling nagtugda si Gob kon bala mapatihan ang mga tigulang nga nagsugid sining malain nga panugdaon kontra sa iya. Ano bala ang pakot n’yo?/PN
