TAPOS na ang inisipay sang mga balota para sa nagligad nga eleksyon sadtong Mayo 13. Ang mga nagdalaug kag ang mga napierde nahibal-an na.
Balik na ang tanan sa “normal” nga mga hilikuton sa pangabuhi sang aton mga pumuluyo kag mga katungdanan sa bahin sang gobyerno.
Syempre, indi “normal” ang aton pagpangabuhi sadtong panahon sang eleksyon tungod ang kada isa nagahimo sang “extra mile” sa ila hilikuton angot sa eleksyon.
Ang mga kandidato kag ang ila mga sumulunod – halin sa sulod sang gobyerno pakadto sa gwa – masako sa pagpahabok sang ila personalidad kag sobra nga pagka-alwan nga sadto wala nila ginahimo.
Ang mga pumuluyo masako man sa pag-“take advantage” sa dugang nga ma-earn nila halin sa ginapalagaw nga kwarta sang mga kandidato nga nagapasanyog sang negosyo kag pangabuhian.
Well, may nalipay tungod sa pagdaug sa eleksyon; may nahanusbo kay nalutos; kag may naghibi kag nanawagan sing Hustisya tungod sa mga halit nga nadangatan nga bunga sang kainit sang pagbanggianay sa kampanyahanay.
Padayon man sa subong ang mga reklamo kag protesta tungod sa kapalpakan sang Comelec kag batok sa mga dinayaay sa eleksyon, labi na gid ang pagbinaklanay sang boto.
***
Sa karon, handom ta nga mag-uliay na ang tanan sa maayo nga pagtamdanay kag atubangon ang bag-o nga pangabuhi nga may paglaum sa idalom sang bag-o nga pang-gobyerno.
Sa siling gani ni outgoing Mayor Jose Espinosa III, nga nagpakita sing maayong buot gihapon bisan sa iya kalutosan: “Tapos na ang eleksyon kag ang pulitika ipahigad na naton.”
“Ang mga pilas nagapali, “dugang niya,” Isa lang ang aton siyudad nga dapat serbisyuhan naton sing maayo kag updan nga wala sing kahisa.”
Gin-agda pa niya gani si Congressman kag Mayor-elect Jerry P. Treñas nga magbisita sa city hall bisan ano oras, kon may lugar siya, kag makigkita sa iya agud maka-“familiarize” ini sa upisina sang mayor sa diin mapungko na siya sa Hulyo 1.
Labi gid nasaktan si Mayor-elect Treñas, sunu sa iya, sa “word war” nila sang iya bilas (Mayor Espinosa) sadtong kampanyahanay, apang galaum man siya nga malipatan man niya ini sa ulihi, “although indi pa sa subong”.
Ambot kon nabaton ni Mayor-elect Treñas ang pagpangagda ni Mayor Espinosa nga magbisita ang nahauna sa city hall kag makigkita sa naulihi, apang sa masunod nga adlaw sadto nagbisita na sa city hall si Mayor-elect Treñas. Nakigkita siya diri sa pila ka mga department head kag mga empleyado sa city hall, sa diin gin-abi-abi siya sing mainit.
Galaum kita nga indi na gid man madugay ang pagsungguddanay nila kag sang ila mga pamilya, kag mag-uliay na gid man ang ila maayo nga pagtamdanay.
Kon matigayon na ini – sa indi madugay, sa pagpati gani naton – nga matuod gid man nga “All’s well that ends well!”
***
Samtang, amat-amat na nga ginatukod ni Mayor-elect Treñas ang iya “kitchen cabinet” nga amo mismo ang maupod sa iya sa iya pagdumala sang siyudad.
Galakip ini sang mga executive officers nga sanday MelchorTan bilang city administrator; Butch Panaguiton, assistant city administrator; Jonas Bellosillo, chief of staff; lawyer Edgar Gil, city legal officer; lawyer Kit Magsico, assistant legal officer; kag Mitch Antiqueña, building administrator kag personal security officer.
Ang mga executive assistants nagalakip kanday Benito Jimena sa tourism; Katherine Tingson sa revenue generation; Salvador Sarabia Jr. sa promotions; kag Dr. Sandra Gomez, liaison sa private sector.
Wala man nalipat si mayor-elect agud pahibaluon ang pila ka opisyales sa idalom ni Mayor Espinosa sa ila kasaypanan (electioneering) sa idalom sang Civil Service Code tungod sa ila pag-entra sa kampayahanay sang mga pulitiko.
Ginhingadlan gid gani sini ang pila sa ila. “Pasakaan naton sila sang kaso,” siling ni Treñas.
Samtang, ang city government nagahanda naman sing transition team nga ginapangunahan mismo ni outgoing Mayor Espinosa, nga ginapatuman sa idalom sang iya Executive Order No. 22-A. (w_mateojr@yahoo.com/PN)
