IMPORTANTE nga ang Comelec makahatag gid sang husto nga desisyon sa “disqualification case” ni Bongbong Marcos (BBM) kag iban pa nga mga kaso nga na-file diri.
Syempre, indi malikawan ang pagpangduha-duha nga basi may paboran ini sa gina-protestahan ukon sa naga-protesta sa kon ano man nga rason.
Otherwise, kon kwestyonable ang desisyon sini, basi bala may kinagamo nga matabo, labi na gid sa kaso ni BBM, kon diin ang ano man nga desisyon nga mahimo sini mangin basehan (precedent) na sa kasubong nga sitwasyon sa masunod nga kahigayunan kon indi malubag sang Korte Suprema.
Gani, careful gid kamo nga yara sa Comelec. Indi gid ipadaug ang inyo Diyosnon nga Konsyensya sa kahadlok ukon tentasyon ni Taning agud ang husto gid nga desisyon ang inyo mahimo.
***
Sa bahin sang mga botante, panugyan naton nga indi gid magpadala-dala sa kon ano lang nga poll survey. Tandaan nga wala na sing maayo pa nga basehan sang aton boto sangsa aton KONSYENSYA agud pilion ang bagay gid saligan.
Madaug man ukon mapierde, basta ang ginapili naton amo gid ang dapat sa aton Konsyensya, wala kita sing problema dira sa atubang sang aton pamilya kag sang Ginuo.
Tandaan naton nga may mga survey dira nga “bogus” ukon “fake” nga ang tuyu amo lang ang magtuga sang “bandwagon mentality”.
Sa ina nga mentalidad, ukon ano pa nga “mind conditioning” nga mahimo nila, ginatentar nila kita agud botohon lang ang mga kandidato nga na-manipular nila nga manguna sa survey, bisan pa indi gid ini sila masaligan sa poder. Katulad ina seguro sang ginboto naton sadto nga pensar naton basi matarong man gali bandido.
Samtang ang dapat tani botohon naton amo ang mga kandidato nga may matarong nga pagkatawo, may ikasarang sa panghimanwa, indi “corrupt”, indi butigon, kag may “doable” nga programa del gobierno.
Kon may basehan man ang prediksyon ang isa ka survey para sa posible nga kadalag-an sang nagapanguna nga mga kandidato, pwede gihapon ini magsala. Katulad sang pila na ka beses nga natabo sa kampanyahanay sa Estados Unidos.
Indi pa malipatan sang madamo ang natabo sa resulta sang poll survey sang magpadalagan sa pagka-Presidente si Harry Truman.
Mga duha ka semana bag-o ang aktwal nga eleksyon, nagapanguna na ang iya kasumpong sing 9-1 kontra sa iya. Apang wala ini nawad-an sing paglaum. Kag gin-medyosan sini nga malab-ut ang madamo pa nga mga botante kag nag-todo na pagwa sing mabakud nga mga isyu kontra sa kasumpong. Tungod sini, sa wala ginpaabot sang kasumpong, nakahingagaw pa ini agud magdaug sa eleksyon.
***
Luyag ta man ipahanumdum sa aton mga pumuluyo
ang mga survey nga, nga samtang wala sing malisya, nagagamit lang sang pila lang ka sample respondent kag sang isa ukon pila lang ka grupo sa ila nagakalain-lain nga interes, nga indi “representative” sang kadam-an.
Kon si Senador Tito Sotto pa, indi pa masaligan ang resulta sini. “Good guide” lang ini, sunu sa iya, agud makita sang kandidato ang una nga balatyagon sang bisan pila lang anay ka pumuluyo nga pwede pa nila mapa-improve sa sige nila nga pagpang-kampanya.
Sunu gani sa Gallop Polls, nga kilala sa madamo sini nga positive prediction sa eleksyon sa Estados Unidos, dapat ang kadamuon sang random sample respondents indi magnubo sa 10% sang mga botante agud pwede na masaligan bisan may “margin of error” pa.
Sa mga poll survey sa subong, ugaling, halos 2,000 man lang ang mga sample respondent nga ginagamit halin sa aton mga 65 ka milyon nga mga botante sa Mayo 9, 2022 nga eleksyon. Mga 0.03 ka porsyento (%) lang ini, nga indi pa masaligan para sa ano man nga prediksyon.
Ini man gani ang rason kon ngaa gina-ban ang poll survey sang Fair Election Act, ukon RA 9006, kon malapit na ang eleksyon.
Ang Section 5.4 ngasiling nga indi na pwede ang pagpagwa sang mga poll survey 15 ka adlaw bag-o ang national elections kag pitu (7) ka adlaw bag-o ang lokal nga eleksyon.
Ginapatuman ini agud indi na mahaylo pa ang mga botante sa pagboto tungod lang sa “bandwagon mentality” kag kasubong nga “mind conditioning”, kag botohon gid ang angay nga botohon.
Merry Christmas & a Happy New Year to Everyone!/PN
