MADAMO na sang ginatan-ay nga trabaho para sa overseas Filipino workers (OFW) kag madamo na sang mga Ilonggo ang nakatigayon nga maka-angkon sang trabaho sa sini nga panahon.
Sagunson naman ang job fair nga ginapatigayon sang mga ahensya sang gobyerno kag mga local government unit nga nagapatimaan sang madamo nga trabaho nga nagahulat, ilabi na sa mga Ilonggo.
Daku ang bentaha nga ginaagom karon sang mga Ilonggo sa amat-amat nga paghalog sang mga polisa nga ginapatuman angot sa pandemya. Madamo na ang nakasakay sa barko, madamo na ang nakadangat sa iban nga pungsod kag madamo sang pamilya nga nabilin diri ang may lauman nga benepisyo gikan sa kita sang ila mga himata nga nagatrabaho sa luwas sang pungsod.
Nahibaluan nga ang Probinsya sang Iloilo may ginabulubanta nga 197,144 ka overseas Filipino workers nga ginabug-usan sang temporary (overseas workers) kag permanent migrants.
Tuman ka daku sang kantidad sang remittance nga ginapadala sang mga OFW sa pungsod, kag mismo sa Western Visayas. Kapin sa 26.8 billion pesos ang remittance sang mga overseas Filipinos workers (OFWs) gikan sa Western Visayas kon sa diin masobra 14 billion pesos ang ambit sang probinsya sang Iloilo.
Kahibalo ang tanan nga tuman ka daku ang bulig ang mga remittance nga ginapadala sang mga OFW kag ginabaton diri sang ila mga benepisyaryo nga ila man ginagamit sa pagbakal sang ila mga kinahanglanon sa panimalay, sa pagbakal sang bulong ukon medisina, sa pagtuon sang mga estudyante pag-imprubar sang ila puluy-an, pagtukod sang negosyo kag pagpaayo sang ila pangabuhi.
Samtang nagapasulod diri sila sang kwarta, mas nagapagsik ang ekonomiya tungod may kapasidad ang ila mga himata nga maggasto kag gamiton ang ila ginapadala nga kwarta sa pagpamalaklon sang ila kinahanglanon.
Bangud sang ila paghimakas para sa ila panimalay, sa ila pamilya, sa ila komunidad, angay man nga hatagan sila sang pasulabi kag igtalupangod paagi sa pagplastar sang talatapan nga makabulig sa ila.
Matuod nga indi tanan may maayo nga kapalaran nga madangatan, may pila sa ila ang nagasumalang sang problema kag palaligban.
Dapat nga may opisina nga magaatipan sa ila, kon ano man ang ila kahimtangan, agud mabatyagan nila nga may naga-ulikid sa ila, nga may masandigan sila kag makapakalma sa ila paminsaron kag balatyagon.
Nakita ini nga sitwasyon sang Sangguniang Panlalawigan kabangdanan nga ila ginhatagan sang igtalupangod paagi sa pagpasar sang ordinansa.
Ginpasar sang Sangguniang Panlalawigan ang Provincial Ordinance No. 2020-219 nga may tigulo “An Ordinance for the Creation and Institutionalization of the Iloilo Provincial Overseas Filipinos Migration and Development Center Under the Iloilo Provincial Public Employment Service Office (Peso), Defining its Powers, Functions and Appropriating Funds Therefore” ukon sa lip-ot lang ini ang “Iloilo Provincial OFMD Center”.
Magaserbe ini nga information hub sang Ilonggo migrants kag workers kag venue para sa diskusyon sang mga isyu tuhoy sa migration kag dvelopment kag kaangot nga mga programa kag mga serbisyo apang indi limitado sa information tools kag Information, Education, and Communication (IEC) materials.
Magahatag sang mga serbisyo tuhoy sa safe migration kag reintegration sang migrants sa tion sang kinagamo, giyera, economic depression, biological hazard, maltreatment ukon human rights violation, employment contract violation, kag iban pa.
Magahatag sang economic opportunities paagi sa pagpatigayon sang employment kag livelihood assistance kag pagpakig-angot sa provincial local economic and development and investment promotions unit para sa community enterprise paagi sa investment and incubation center for micro-enterprise development.
Magahatag sang psycho-social services kag training opportunities para sa migrants kag ila nabilin nga pamilya kabuylog ang Provincial Social Welfare and Development Office (PSWDO).
Maga-develop sang database bilang sistema sa pag-monitor kag referral sang migrants kag ila pamilya sa magkatuhay nga stages sang migration gikan sa pagbiya tubtub sa pag-abot sa lugar, pagbalik kag reintegration.
Maga-develop sang kapabilidad sang magkatuhay nga stakeholders sa paghatag sang economic, social kag developmental services para sa migrants kag ila pamilya sa Probinsya sang Iloilo.
Nahibaluan nga ang author kag sponsor amo si 4th District Board Member Rolando Distura kag co-sponsor sanday Ex-Officio Board Member Dorothy Paes, 3rd District Board Member Matt Palabrica, kag 4th District Board Member Domingo Oso, Jr.
Nagakadapat lamang nga atipanon kag ulikdon ang mga OFW nga naghimakas para sa ila pamilya kag sa aton pungsod. Sila ang ginakabig naton nga mga moderno nga baganihan. Sila ang dapat nga amligan. (bertladera@gmail.com/PN)
