GINAPALIBUTAN sang tanum kag tuman ka lutakon ang malahalon kag naga-inggat nga bulawan. Matuod nga pila lang ka tawo ang makaapresyar sang bulawan nga lutakon, sang bulawan nga ginabulad sa init kag sa ulan.
Sa karon nga sitwasyon, mas bulahan ang may gina-uma bangud nga siya ang indi magutman kon mapisan lang nga magtanum ukon magsagud sang kasapatan.
Nag-abot na ang panahon nga nagamahal ang mga balaklon, mahal ang bugas, mahal ang ulutanon kag mga karne. Ginakulang na sang suplay sang pagkaon ang kalibutan bangud man sa nagakatabu nga kalamidad nga nagahalit sa mga pananum kag mga propyedad. Magluwas pa diri, nagatuga man sang huol ang mga kinagamo sa iban nga lugar nga nagatublag sa normal nga pagsinarayo, sa ila pagpangabuhi. Indi na nila maatipan ang ila talamnan kag kasapatan rason nga apektado ang suplay sang mga produkto.
Bangud sa natublag nga sistema sa pagpatubas tunga sang mga kalamidad kag kinagamo, ginakulang ang suplay sang mga produkto gikan sa agrikultura kag mas nagadamo ang populasyon nga nagakonsumo sini.
Kon kulang ang suplay kag madamo sang nagakinahanglan, natural lang nga magmahal ang bili sang isa ka produkto, kaangay sang bugas kag mga ulutanon.
Lantawan ang mga nagdaku sa uma, nag-eskwela, nag-obra, nagpasad sang pangabuhi, nakatipon sang kwarta kag liwat nga nagbalik sa uma. Matapos ang ila malawig nga pagpasimpalad sa banas sang kabuhi, sa pag-atubang sa mga pagpanghangkat sa ila nga karera, kag pagsustenir sang bugal kag dungog, sila ang nahidlaw nga magpauli sa uma, maghaklo sang preska nga hangin, magkaon sang preska nga prutas kag utan, kag magbugtaw nga ginapukaw sang pagpanukturuok sang mga manok.
Indi naton mabasol ang mga lanubo nga magpangita sang ila kabuhi sa lasang sang mga matag-as nga edipisyo. Luyag nila nga takson ang ila ikasangkol, luyag nila nga lighuton ang pamusod sang kalibutan. Luyag nila nga makita ang maanyag nga duag sang tagsa ka komunidad. Ginahimo nila ini agud nga makatipon sang manami nga halandumon sa kabuhi, mga dulumdumon nga nagapagkit sa ila paminsaron kag balatyagon agud nga may yara sila sang isugid sa nagasunod nga henerasyon.
Apang sa pagtahaw sang pwersa, sa paghinunod sang kabuhi, sa ubos na nga natilawan ang tanan nga manamit nga sabor, sa tapos nga malagas ang tion sang kabuhi, magapahimunong na ini kag magalantaw sa nagatunod nga adlaw.
Iya igatigana ang nabilin nga kusog sa paglantaw sa mas maduagon nga mga tanum, sa mga makakulunyag nga mga nagalupad nga alibangbang kag buyog, mga pispis kag mga tibakla. Mas luyag sini ang matam-is nga duga sang preska nga prutas kag ang saboroso nga mga utan nga makita sa iya ugsaran.
Bisan sa diin ka man magapadulong, matapos ang imo pagpanglakaton, imo kahidlawan ang imo namat-an, liwat mo nga balikan kag saboran ang simple nga pangabuhi.
Mangin kalmante sa palibot mga berde, simple apang elegante kag indi ka matublag sa kamalahalon sang balaklon, sang bugas, prutas ukon ulutanon kon may tanum ka nga kaugalingon.
Aton nga amligan ang ulumhan kaangay sang malahalon nga bulawan./PN
