MADAMO sang mga Ilonggo ang nagahandom nga makasakay sa barko kag nakapanglugayawan sa bug-os nga kalibutan nga libre lamang kag may sweldo pa nga ginalauman nga mabaton sa tagsa ka bulan.
Kapin sa 280,000 ka mga estudyante ang nagagradwar gikan sa mga maritime school sa kada tuig.
Masobra sa ikaapat nga bahin sang kadamuon sang mga seafarer sa bug-os nga kalibutan gikan sa Pilipinas. Sadtong 2019, yadtong 380,000 ka Filipino seafarers nagkontribwer sang $6.14 Billion sa ekonomiya sang Pilipinas.
Suno sa pinakaulihi nga Manpower Report sang BIMBO kag International Chamber of Shipping (ICS) nga ginpagwa sadtong Mayo 2016, may yara sang 1,647,500 ka ginabulubanta nga suplay sang seafarers sa kalibutan nga ginalakipan sang 774,000 ka mga officers kag 873,500 ka mga ratings ukon skilled seafarers nga nagahatag sang suporta para sa mga officers.
Base sa dugang nga datus sang seamanrepublic.com, nagapanguna ang China sa may pinakadamo nga suplay sang seafarer para sa tanan nga seafarers, nagasunod ang Pilipinas, Indonesia, Russian Federation kag Ukrain sa lima ka mga pungsod nga may madamo nga seafarers.
Sa bahin sang madamo nga officers, nagapanguna ang China, ginasundan sang Pilipinas, India, Indonesia kag Russian Federation; samtang, sa bahin sang madamo nga ratings, nagapanguna ang Pilipinas, ginasundan sang China, Indonesia, Russian Federation kag Ukraine.
Indi man malipod sa aton nga tuman ka damo sang mga Ilonggo ang seafarers kag pamatuod diri nga may buluthuan diri sa aton nga naga-dedikar gid sa sini nga kurso kag nagapatubas sang madamo nga gradwado.
Naganyat ang iban bangud nag-ayuhan ang pangabuhi sang mga may kabataan nga seafarer, nakapatindog sang dalagku nga balay kag nagabakal sang mga salakyan.
Madamo man sang mga barko nga nagalayag sa lawod sang kalibutan, ilabi na ang ginasiling nga mga container ship.
Suno sa ginbalhag sang Statista Research sadtong Hunyo 14, 2021, ang Danish container shipping company nga APM-Maersk amo ang naga-oprate sang pinakadamo nga container ships sa bug-os nga kalibutan nga may 713 ka container ships sa iya nga fleet, apang ang APM-Maersk nagapanag-iya lamang sang 306 sini diri, ang iban ang chartered ukon yara sa order book. Ang fleet sang kompaniya may total capacity nga kapin sa 4.1 million twenty-foot nga equivalent units sini nga tuig 2021.
Yari ang mga masunod nga kompaniya sang barko kag ang kadamuon sang ila mga barko: APM-Maersk nga may 713 ka barko; Mediterranean Shg Co nga may 605 ka barko; CMA CGM Group nga may 544 ka barko; COSCO Group nga may 497 ka barko; Hapag-Lloyd nga may 260 ka barko; ONE (Ocean Network Express) nga may 218 ka barko; Evergreen Line nga may 202 ka barko; Wan Hai Lines nga may 146 ka barko; Zhonggu Logistics Corp. nga may 110 ka barko; Antong Holdings (QASC) nga may 104 ka barko; Zim nga may 98 ka barko kag SITC nga may 96 ka barko.
Sa 56,000 ka merchant ships nga naga-trading sa bug-os nga kalibutan, internationally, kapin sa 17,000 ka mga barko ang general cargo ships kutob sang Enero 1, 2020. Ang general cargo ships nagabug-os sa 30 porsyento sang mga world merchant fleet sa kalibutan.
Ang pantalan sang Shanghai amo ang pinakadaku nga container port sang tuig 2020, nga makaakomodar sang mga container nga may kapasidad nga 43.5 million ka twenty-foot equivalent units ukon TEU.
Sang 2020, siyam sa 10 ka pinakamasaku nga pantalan ang nahamtang sa Asya.
Ang pinakamasaku nga container ports sa Asya ginalakipan sang Shanghai, Singapore, kag Hong Kong.
Sa United States, ang mga magkatupad nga pantalan sang Los Angeles kag Long Beach ang kabahin sa mga dalagku nga container hub sang pungsod.
Ang mga syudad sang Rotterdam, Hamburg, kag Antwerp amo ang may pinakadalagku nga pantalan sa Europe.
Ang PSA International sang Singapore amo ang nagapanguna nga marine terminal operators sa kalibutan, ginasundan sang Hutchison Port Holdings nga nahamtang sa British Virgin Islands. Ang PSA International naga-operate sa pila ka mga pantalan sa bug-os nga kalibutan nga nagatuga sang kapin sa 4.2 billion Singapore dollars nga revenue sang tuig 2020.
Kapin sa 25 million ka mga twenty-foot equivalent units ukon TEU ang gina-transport sa ruta sang Trans-Pacific sang tuig 2020 kag ginakabig ini nga largets shipping zone kon load size ang pagahambalan, 23 million sa ruta sang Europe-Asia-Europe kag 7 million sa ruta sang Transatlantic.
Naga-eksperyensya sang economic boom ang mga ekonomiya sa Asya. Diri nahamtang ang mga nagapanguna nga container ports sa kalibutan nga ginalakipan sang Shanghai, Singapore, kag Guangzhou. kag ang largest container ship fleets sang kalibutan ang narehistro diri.
Ang China, South Korea, kag Japan ang nagapanguna nga shipbuilding nations sang tuig 2019. Nakahuman sang barko ang China nga may tingob nga gross tonnage sang kapin sa 22.3 million. Ang CSSC ukon China State Shipbuilding Corporation amo ang nagapanguna nga shipyard sang China.
Ginapresentar naton ini agud nga indi madulaan sang paglaum ang mga mananagat naton nga nawad-an sang trabaho bangud sa epekto sang pandemya.
Lauman naton nga kon magbalik na sa normal ang sitwasyon, liwat nga makakita sang maayo nga palangabuhian kag masanag nga palaabuton ang aton mga mananagat.
Kadaku sang ila ginabulig sa aton ekonomiya kag sa sahi sang pangabuhi sang mga nagasalig sa ila.
Mabinag-binag mo na kon ano ang kapalaran sang imo mga himata nga nagasakay sa barko kag kon ano ka daku nga palamugnan ang yari diri nagahulat.
Ganyaton naton sila nga magtuon kag indi maglisa sa ila handom agud mahatagan nila sang realisasyon ang ila mga damgo. (bertladera@gmail.com/PN)
