HALOS tanan na nga “Power” ang nadumduman sang mga tawo nga may hilway nga panghuna-huna agud i-away ang ila mga kawsa.
People Power! Women Power! Youth Power! Student Power! Kag ano pa nga Power agud tumbahon lang ang Dictatorial Power!
Indi man kita gali malipat sa Media Power, nga nagapadumdum sa aton sang away sang Duterte Administrasyon kag sang ABS-CBN Media Network.
Daku nga tunok sa Duterte administrasyon ang ABS-CBN, ang pinakadaku nga media network sa pungsod, sa ginadala sini sing wala kahadlok nga mga balita, opinyon kag bisan pa sa ginapagwa sini nga pangkalingawan nga mga programa.
Tungod sini gin-medyosan gid nila nga mapunggan ang renewal sang franchise sini sa sulod sang dugang pa nga 25 anyos bisan pa wala man sing kaso nga napamatud-an batok sini.
Sa matuod, tunok gid man sa mga balat-sibuyas nga mga pulitiko ang hilway (independent) nga media sa Demokrasya, labi na gid kon ang luyag lang nila mabatian ang pagdayaw sa ila kag indi ang pagsaway sa ila kakulangan.
Nalipat ugaling sila nga indi ini (ABS-CBN) lubos-lubos nga mapatay tungod sa convenient access sa free TV nga bukas sa international media – katulad sang YouTube kag Facebook – kag bisan paano masunod gihapon sang mga supporters ang pila ka programa sini. Yara man ang Social Media sa internet nga bisan sin-o lang pwede makapamati kag makatugda sing libre.
Of course, and traditional media, nga kinahanglan may pahanugot (franchise) sa pagpalayag sang gobyerno, importante gihapon tungod makalab-ut ini sa labing madamo nga mga pumuluyo tubtub sa mga pinakalayo gid, nga importante sa aton “right to information” sa Demokrasya.
Kutlon mo ang isa lang ka daku nga media network – radyo man ukon TV katuld sang ABS-CBN – daku na nga “krimen” ini sa aton Demokrasya, labi na gid sa mga kubos naton nga mga utod nga indi makasarang magpanag-iya sang smartphone.
***
Sa Kamara (House) nag-file na gani liwat sadtong Enero 18 si Representative Vilma Santos (Batangas 6th District) sang House Bill No. 8298 agud iduso ang franchise renewal sang ABS-CBN sa sulod pa sang 25 anyos sa bahin sang mga myembro sang Kamara nga halso tanan sini madalagan man for reelection.
Sa Senado naman, 16 sa 24 ka senador ang nagpahayag na nga pabor sini sa pagpanguna ni Senate President Vicente “Tito” Sotto sa iya Senate Bill No. 1967.
Lakip diri si Senador Grace Poe, upod ang 15 nga nakapirm na sa bill ni Sotto nga sanday Senate President Pro Tempore Ralph Recto, Senate Majority Leader Juan Miguel Zubiri, Senate Minority Leader Franklin Drilon;
Mga senador nga sanday Panfilo Lacson, Sonny Angara, Nancy Binay, Sherwin Gatchalian, Richard Gordon, Lito Lapid, Manny Pacquiao, Joel Villanueva, Risa Hontiveros, Francis Pangilinan, Aqulino “Koko” Pimentel III, kag Leila de Lima.
Nahibal-an naman ninyo seguro kon sin-o ang wala nag-co-author sang Sotto bill.
***
Ngaa ayhan ginadalian gid ining pagduso sang renewal sang franchise sang ABS-CBN? Kag sin-o ang sa ila pwede mag-interest sa suporta sang ABS-CBN kag sang fans sini sa 2022 presidential election tungod sa Media Power sini?
Ang 10 sang 16 nga mga senador nga nagpahayag sa pagsuporta sa renewal sang ABS-CBN franchise mga reelectionist sa 2022, nga pila sini basi maghandom man sa mas mataas nga pwesto sang Bise Presidente kag Presidente.
Ini sanday Leila de Lima (Liberal Party), Win Gatchalian (NPC), Richard Gordon (Independent), Risa Hontiveros (Akbayan), Panfilo Lacson (ndependent), Manny Pacquiao (PDP-Laban), Francis Pangilinan (Liberal), Joel Villanueva CIBAC) kag Juan Miguel Zubiri (Independent).
Sa mapadaug nila ukon indi ang renewal sang ABS-CBN franchise, daku na nga abanse ini nila sa mga bumoloto nga naglain ang buot sa pagpasara sang Duterte administrasyon sa ABS-CBN.
Kon pensar sang anti-ABS-CBN ma-kontrol sini ang media tungod yara sila sa poder, I don’t think nga mahimo nila ini tungod sa Social Media Power nga magamit libre sang oposisyon kag sang coalition sini sa mga independent.
***
Meantime, sin-o ang inyo botohon para Presidente kag Vice Presidente sang opposition/Independent nga grupo? Pwede ang Leni Robredo for President kag Joel Villanueva for Vice President, ukon ang Robredo-Lacson tandem.
Ang maki-Duterte nga grupo syempre may ara man sila nga mga kandidato nga wala pa kita ugaling ideya bisan katiting./PN
