KON wala nagsala ang aton pagpamati sa interbyu sa radyo kay Uswag Ilonggo Partylist Representative Jojo Ang, ini ang nakuha naton nga pahayag niya.
Ginpahayag niya nga ang ginaplano niya nga mga proyekto kag mga programa, kon magdaug naman ang iya partido sa 2025 election, amo ang paghatag gihapon sang iya bug-os nga ikasarang sa pagbulig pasanyog pa gid sang kauswagan … sa bug-os nga isla sang Panay! Sang Panay lang?
Wala gani niya ma-mensyonar ang Guimaras, nga, sa karon, amo na gid lang, upod sa Panay provinces, ang sakop sang Western Visayas, tungod wala na ang Negros Occidental kay kabahin na ini sang Negros lsland Region.
Hulat anay, daw indi man amo na gid lang ini nga mga lugar ang dapat serbisyohan sang Uswag Ilonggo. Indi man Ilonggo gid lang ining mga pumuluyo tungod gapuyo sila sa magkaingud nga mga probinsya sang Iloilo, Antique, Aklan, Capiz, kag Guimaras.
Sa matuod, ang mga Ilonggo indi lang Ilonggo tungod nagapuyo sila diri sa Western Visayas kundi tungod sa ila gid ethnicity, ukon pagkapinasahe sa iban nga grupo sang katauhan sa ila ginamat-an nga mga bagay regadless kung diin man sila nagapuyo sa Filipinas ukon sa luwas man sang aton pungsod.
Ining ila shared attributes galakip sang ila pagpati/pagtuo (beliefs), gindak-an nga practices (tradisyon), kag pag-share sang lenggwahe nga mahangpan man sang tanan in common, bisan indi gid man lubos pareho gid ang paggamit nila tanan sang mga tinaga sa paghambal kag pagsulat.
Diri ginahambal ang Hiligaynon, ang lenggwahe sang kadam-an, labi na gid sa Iloilo kag Negros Occidental, lakip na sa Capiz. Ang iban nga mga lenggwahe galakip sang Kinaray-a sa Antique kag pila ka banwa sa Iloilo katulad sang Guimbal kag Nueva Valencia sa Guimaras (kon diin natawo kag nagpuyo ang akon Lola Felen), kag ang Akeanon sa Aklan.
In fact, makit-an man ang mga Ilonggo nga nagadominar sa Cotabato, South Cotabato, Sultan Kudarat, kag pila ka bahin sang Saranggani sa Mindanao.
***
Well, indi lang ini ang kapaslawan – ang makilala ang mga Ilonggo bilang sakop lang sang nagainingod nga mga probinsya sa Western Visayas.
Kag, tungod man sa sina nga pagpati, indi na matagaan sang bulig ang mga Ilonggo sa gwa sang Western Visayas.
Fortunately, sadtong pagduaw sang delegado sang Liga ng mga Barangay sa South Cotabato sadtong Pebrero 20, 2025 sa Iloilo, ginpat-ud gid ni Iloilo Gov. Arthur Defensor Jr. kay Rep. Ang nga ini sila mga Ilonggo man.
Kag ugaling nakamarasmas siya nga nagsiling nga “malapit sa iya tagipusuon” ang mga Ilonggo bisan dira pa sila nagapuyo sa South Cotabato. Nangako pa gani siya sa pagsuporta kag pagbulig sa ila. Indi man lang gani sa Rehiyon 6, kundi pati man sa Rehiyon 12, kag syempre pa sa iban pa nga mga Ilonggo sa iban nga lugar, labi na gid ang luyag mangayo gid sang bulig sang Uswag Ilonggo Partylist.
Ang Region 12 gasakop sang Soccsksargen (South Cotabato, Cotabato, Sultan Kudarat, Sarangani kag ang highly urbanized city nga General Santos). Ang regional center sini amo ang Koronadal sa South Cotabato.
***
Nonetheless, gapasalamat kita sa kay Rep. Ang, upod sa nabuligan na, sa nabulig sini nga mga proyekto kag programa sa ila.
Katulad sang pagpatigayon sang Uswag Ilonggo Partylist nga mahatagan sang sobra PhP30 ka Million nga financial assistance ang 13,500 ka residente sang Iloilo City kag 2nd District sang Iloilo Province sadtong Agosto 21-22, 2024 didto sa Iloilo Sports Complex, paagi sa Department of Social Welfare and Development (DSWD) sa idalom sang Assistance to Individuals in Crisis Situations (AICS) kag sang Ayuda para sa Kapos ang Kita Program (AKAP).
Subong man ang pagbulig sa sobra 1,000 ka libo nga market vendors sa siyudad sang Iloilo nga gintagaan sang PhP15,000 kada isa para sa ila sustainable livelihood sadtong Disyembre 5, 2024.
Kag ang 7,000 ka mga estudyante sa Himamaylan, Negros Occidental, Binalbagan, kag Hinigaran nga nakabaton sa kay Rep. Ang sang educational financial assistance sadtong Setyembre 27, 2024.
Ang 600 ka Uswag scholars sang Roxas City natagaan man sang PhP10,000 kada isa para sa ila edukasyon.
Nagbaton man sang PhP10,000 kada isa ang 1,114 ka student beneficiaries sa idalom sang One-Barangay-One-Scholar Program sang Antique sadtong Agosto 2, 2024.
Nagpatigayon man ang Uswag Ilonggo sa pagtukod sang PhP400M Guimaras Arena and Convention Center kag sang lima (5) ka mga school building nga nagabalor sang PhP78.750 Million sa kada munisipyo sang Guimaras sadtong Agosto 30, 2024. Nagtambong pa gani si Rep.Ang sa groundbreaking sang Convention Center.
Sa Aklan, ang Uswag Ilonggo naghatag man sang PhP10,000 sa na-enrol nga mga estudyante sa private kag public school.
***
Ang Uswag Ilonggo five-point agenda amo ang masunod: “The well-being of every Ilonggo family comes first; proper healthcare for the poor; consistent programs on infrastructure and tourism; progress in agriculture and aquaculture (fishing); and uphold more scholarships for the youth.”/PN
