SA TUNGA sang hugot nga kampanya batok sa mga ginahuptan nga armas-luthang kag ang wala untat nga paghiwat sang checkpoints kag saturation drives sang kapulisan, ang paghimo sang krimen sang mga riding-in-tandem suspects ang indi gid mapunggan.
Matuod nga indi mabantayan sang kapulisan ang tagsa ka hulag sang mga kriminal bangud nga indi mapulong kon san-o sila magyamar sa pagtuman sang ila bukho.
Nagapangita man sang ligwa ang mga taghimo sang krimen kon paano nila ipatigayon ang ila plano santu sa paborable nga kondisyon sang palibot kag sa kahuyang sang depensa sang ila target.
Tungang-udto, nagatagiti ang init apang liwat nga naglanog ang asud-asud nga lupok nga gintunaan sang kamatayon ni Lhuil Clemente sang Barangay East Baluarte, Molo, Iloilo City sang tinalikdan nga Sabado, Marso 2, sa dalan Mabini sa City Proper.
Kaangay sa kinaandan, patay na ang tawo sang mahibaluan sang tanan nga ginakabig gali siya nga high-value target sang kapulisan kag ginpapag-on pa sang pahayag gikan sa Philippine Drug Enforcement Agency (PDEA) Region 6.
Wala pa masuguran ang imbestigasyon apang ginakondisyon na ni Police Colonel Martin Defensor Jr. ang paminsaron sang pumuluyo nga mangin kabahin na naman ini sang istadistika bangud wala sila sang may matumod nga mga suspetsado.
Paano makalaum sang hustisya ang mga biktima kon sa panugod pa lang daw halos isungka na sang hepe sang Iloilo City Police Office (ICPO) ang ideya nga wala sila sang may mahimo sa natabu kag indi nila mahatag ang hustisya sa biktima kag sa halos tanan nga nabiktima sang riding in-tandem suspects?
Madamo na sang insidente kaangay sini ang natabu antes pa man nagpungko bilang city director sang ICPO si Defensor kag sa iya pormal nga pag-asumer sa palangakuan, iya gid nga ginpasalig nga tutukan ang mga kaso kag hatagan sang kasolbaran ang natabu nga mga insidente.
Umpisa Setyembre 12, 2018 sa pagpungko ni Defensor tubtub sa sini nga tion, mayoriya sang mga kaso ang wala sang klaro.
Madasig lang siya nga nag-akto kag nagpasaka sang kaso sa ginatudlo nga nagpatay kay Mercedes “Ging-Ging” Nava, 66-anyos, sang Mejorada Street, Barangay Oñate De Leon, Mandurriao kag naulamid si Erwin Fontillas, 45-anyos, sang Barangay Airport, Mandurriao sadtong Enero 4, 2019.
Ginsaka sa city hall kag gin-arestar nanday Defensor sanday Julius Rey kag Roy de los Reyes nga lunsay security aides ni Councilor Plaridel Nava kag ang duha amo ang ginatudlo sang kapulisan nga taghimo sang krimen apang ginapanginwala sang duha kag sa karon nagapadayon ang habuyanay sang kaso sa tunga sang magtimbang nga bahin.
Kuntani indi malipat si Defensor sa iya pasalig kag iya tutukan kag i-report sa pumuluyo kon ano na ang iya nahimo kag kon may progreso na sa mga kaso sang pagpatay.
Agud nga mapahanumdom naton ang ICPO sa ila katungdanan, aton gintipon ang tanan nga datus agud ila liwat nga matutukan.
* Hulyo 13, 2018 – Ranny Bibanco, 33-anyos, sang Trance Street, Barangay 2, Tigbauan, Iloilo nga ginluthang sa Iloilo Terminal Market
* Setyembre 7, 2018 – Don Azucena, 39-anyos, sang Barangay Calumpang, Molo nga ginluthang sa gwa sang ila balay
* Setyembre 7, 2018 – Rolando Puda, 41-anyos, sang Barangay Ingore, La Paz nga ginluthang malapit sa ila puluy-an
* Setyembre 11, 2018 – Gerardo Mamarion, 25-anyos, sang Barangay Tacas, Jaro nga ginluthang sa Zone 4, Barangay Ungka, Jaro
* Oktubre 5, 2018 – Neil Resma, 38-anyos, sang Barangay Bakhaw, Mandurriao kag ginluthang sa Barangay Calubihan, Jaro
* Nobyembre 7, 2018 – Marvin Vasquez, 34-anyos, sang Zone 3, Barangay Bakhaw, Mandurriao ang ginluthang sa Barangay Taft North, Mandurriao.
* Nobyembre 19, 2018 – Retired Senior Police Officer II Rolando Alag, ginluthang sa Barangay Villa Anita, City Proper samtang nagamaneho sang iya puti nga van
* Nobyembre 24, 2018 – Nestor Piagola Jr., 33-anyos, sang Barangay Zamora-Melliza, Iloilo City nga ginluthang sa Rima-Rizal Street, Iloilo City. (bertladera@gmail.com/PN)
