Ang pwede matabo sa pag-inaway sang Ukraine kag Russia

SI RUSSIAN President Vladimir Putin nagpahayag sa Forbes Business News sadtong Pebrero 16, 2022 nga luyag ini makig-negosasyon sa kay US President Joe Biden angot sa seguridad sang ila mga pungsod.

Luyag sini punggan ni Biden ang pag-deploy sang medium-range missiles sang US sa mga pungsod sang North Atlantic Treaty Organization (NATO) sa Uropa, kag pamalabagan man ang pagsulod sang Ukraine sa NATO.

Sadtong Disyembre 25, 10 ka bulan pagkatapos nga ginsalakay na sang Russia ang Ukraine sadtong Pebrero 20,  liwat nagpahayag si Putin sang iya intensyon nga makig-negosasyon.

Indi na ugaling kay Biden lang kundi sa “everyone involved” para sa “acceptable solutions” sa padayon na nga away sang Russia kag Ukraine.

Wala diri ni Putin ginpahayag kon ano gid ang iya luyag, ukon ang pwede niya mapasugtan.   

Ano ayhan ini?  Mahibal-an ta pa ina seguro kon matabo gid man ining negosasyon.

***

Nakita seguro ni Putin ang dugang nga “security threat” sa iya pungsod sa liwat nga paghugpong sang 30 ka myembro sang NATO sa pagbulos ni US President Joe Biden  kay Donald Trump.

Dugang pa diri ang pagpa-itin-itin sang kasilingan sini nga Ukraine sang luyag sini sa pagsulod sa military alliance sang NATO.

Sa pag-dissolve sang Union of Soviet Socialist Republics USSR) sadtong 1991, lubos na nakigbugras ang Ukraine sa ano man nga relasyon sa Russia kag nangin myembro na sang United Nations.

Ginkaakig gid ini sang Russia, labi na gid sa pagpungko na sa poder ni Putin. Ginbuligan pa gani sini ang mga rebelde sa ila kawsa batok sa Ukraine tubtub maagaw ang Crimea kag gingamhan na ini ni Putin sugod sadtong 2014.

***

Sa negosasyon nga ginpaabot ni Putin kay Biden, luyag sini, sa nasiling ta na, nga indi mag-pahamtang ang US sang medium-range missiles sa mga pungsod sang NATO sa Uropa, nga malapit sini nga mga kasilingan.

Ugaling kay sige man taya sang Russia sang iya mga missiles sa mga pungsod sang NATO sa Uropa, luas pa sa “nuclear threat” sini  sa United States sa North America. Unfair!

Luyag man ni Putin kumbinsihon ni Biden ang Ukraine nga indi magsulod sa NATO. Indi ugaling ini mahimo sang US tungod sa “open policy” sang NATO.  Dapat nga ang Ukraine gid ang magtanyag sang iya luyag sa pagsulod sa NATO.

Segurado naton ugaling nga indi mamati si Ukraine President Zelensky sa katulad nga suhestyon halin sa Russia. Akig gid ini sa pag-okupar sang Russia sang Crimea, nga luyag bawion ini bisan sa paagi lang sa United Nations sa bulig sang NATO.

Mabudlay man ugaling nga makasulod sa NATO ang Ukraine, kay kinahanglan sini ang pagpasugot gid sang tanan nga mga myembro.

Isa sa sini nga indi magpasugot ang Turkey. Nakapahayag na gani ini nga “neutral” ini sa away sang Ukraine kag Russia.

Daw wala na aputan ugaling ining panugyan ni Putin nga negosasyon sadtong Pebrero 16. Gani ginpa-atake na ni Putin ang Ukraine sadtong Pebrero 20 kay kuno “clear and imminent security threat” na ini sa Russia. Ginpamahog man sini ang iya nuclear power sa kon sin-o man ang may gana nga atakehon ang Russia.

No problem. Wala man sing luyag atakehon ang Russia tungod gani isa ini ka nuclear power. Luas lang kon ini ang manguna! Ang Russia pa gani ang may gana mang-gyera, nga ginhimo gid sini batok sa Ukraine sadtong Pebrero 20. Pwede ugaling ang magbulig sa both sides, tutal ang gyera yara man lang sa Ukraine.

***

Nagsala si Putin nga madale lutoson ang Ukraine. Tubtub karon, sa pagligad na sang mga 10 ka bulan, pila lang ka lugar ang naagaw sini.

In fact, nabawi na sang Ukraine ang mga 54% sang naagaw sang Russia nga mga 15% nga teritoryo sang Ukraine.

Nag-abanse gid sing maayo ang Ukraine sa pag-abot sang taglamig (winter) sugod sadtong Disyembre sang sini nga tuig.

Ini ayhan ang kabangdanan kon ngaa  makig-negosasyon na si Putin sa “everyone involved”? Kay pwede malutos na sing lubos ini? Kag mahawiran man lang gihapon ang Crimea, ukon pila pa ka lugar nga na-okupar na sini?

Indi seguro matabo ina. Nanumpa gid ang Ukraine nga bawion ang tanan nga lugar nga gin-annex sang Russia halin sa Ukraine. Gani, madugay pa seguro ang gyera sang Russia kag Ukraine.  

Samtang ginpagamo man sining gyera ang kalibutanon nga ekonomiya tungod sa pagsalakay sang Russia sa Ukraine./PN