PUEDE gali maka-confiscate sang driver’s license ang lokal nga gobyerno sang Siyudad sang IIoilo kag indi lang ang Land Transportation Office (LTO).
Ina suno sa decision sang Regional Trial Court (RTC), Branch 26 angot sa Regulation Ordinance 338 sang siyudad sadtong desisyon sini sang nagligad nga Mayo 22, 2017.
Sa pagpaathag ugaling sang anay tsip sang LTO nga si Alberto Suansing, nga secretary general of the Philippine Global Road Safety Partnership (PGRSP) man, kinahanglan nga LTO-deputized ang lokal nga mga traffic enforcer agud maka-confiscate sang driver’s license.
Dapat man sila ma-otorisahan sa pag-isyu sang Temporary Operator’s Permit (TOP) sa mga drayber nga nakalapas sang mga kasuguan kag regulasyon sa trapiko,sunu pa gid sa iya.
Dugang man ni Suansing nga wala sing deadline agud kuhaon balik ang na-confiscate nga driver’s license, apang ang TOP balido lang sa sulod sang 72 ka oras.
Gani kon lapaw na sa deadline, ang buot silingon sini nga puede na madakop ang drayber kay indi na niya magamit ang TOP sal-i sa iya driver’s license.
Kon wala sing ma-isyu nga TOP, indi ta lang ugaling segurado kon puede gihapon makapangdakop kag makasukot penalidad ang traffic enforcer nga LTO-deputized sa iban nga paagi.
Basi ang mga LTO agent na gid lang seguro, ukon sa bisan ano man nga mahisugtan sang LTO kag sang siyudad. Ano bala ini tsip sang Public Safety and Transportation Management Office (PSTMO )?
Nangutana kita sini tungod natabo ining indi pagbaton sang mga TOP sang PSTMO sang nagligad nga tatlo ka bulan, sunu sa balita halin sa city hall.
Ina tungod nawad-an sing pormas sang TOP ang LTO sa central office sini sa Manila sa diin gina-imprenta ini. Nakabaton lang kuno sila sang pormas sadtong Mayo 2.
Tingala ko gani nga daw wala man ginasapak sang mga traffic enforcer sa siyudad sang sining ulihi nga binulan ang mga balingag nga mga drayber.
***
Sunu kay Jeck Conlu, ang tsip sang PSTMO, ang masami nga violations sang mga drayber sa siyudad amo ang indi pagsunod sa signal lights, hand signals sang traffic enforcers, traffic signages kag markings, kag ang pag-obstruct ukon ang pagpabudlay sang free passage sang iban nga salakyan.
Ag penaldad diri P200 sa kada violation. Sa mga mas mabug-at nga violation ang penalidad galab-ut sa P300, P500, tubtub P5,000 nga may upod sang pagka-priso.
Ang P5,000 nga penalidad kag/ukon pagka-priso sa sulod sang lima ka adlaw nagalakip sang driving under the influence (DUI) of intoxicating or prohibited substances. (w_mateojr@yahoo.com/PN)
