ANG mga Katoliko, segurado, naakig sa balita sadtong nagligad lang nga semana sa Bacolod nga isa ka pastor sang lain nga pagtuo Kristiyano ang hungod nga naglapak sang istatwa ni Santo Niño.
Indi lang ini pagtampalas sa pagtuluohan Katolico, nga nagakilala kag nagahatag sing padungog sa Bata nga Hesus, kundi isa man ini ka paglabag sa Freedom of Religion, nga isa sang founding principle naton sa Constitution.
In fact, nagadala gani ini sing penalidad sa nakasala sa idalom sang Article 133, Act 2815: “Offending the Religious Feeling”.
Tungod sini, ang naghimo sining pagtampalas kay Santo Niño nga pastor pwede matagaan penalidad. Wala lang kita ugaling kahibalo kon napasakaan na sing kaso ang ining barbaro nga pastor.
***
Pero, ngaa ayhan nahimo sang pastor nga ini ang pagtampalas sa Bata nga Hesus nga ginapadunggan sang mga Katolico?
Ang sin-o man nga normal ang panghuna-huna, nagahatag sing padungog sa ila mahal sa kabuhi sa nagakaigu nga paagi, lugar kag okasyon.
Ginahimo naton ini paagi sa pagbutang sang ila mga larawan, ukon istatwa man, sa espesyal nga lugar sa aton mga puluy-an kag, kon may ikasarang kita, luyag pa i-selebrar ang ila handumanan labi na gid kon madugay nga wala sa aton loyo, ukon nagtaliwan na.
Ti, ngaa abe indi naton mahimo ini sa aton gid mismo Ginuo nga aton ginatuohan agud pirme naton madumdum Siya sa Iya mga larawan kag istatwa sa aton palibut kag luyag pa i-selebrar ang Iya katutum sa paghatag sa aton sang Iya mga grasya kag bugay?
Gani, ang lain ulo lang ang magpakalain sang sining normal nga pamatasan. Ukon basi si pastor wala nagatuo kay Kristo kay lain ang iya ginapatihan kag akig nga makakita sang bisan lang representasyon sa larawan ukon istatwa ni Kristo.
Ukon tungod ini sang iya pagpati nga ining pamatasan isa ka “idolatry” nga daku nga sala sa Diyos, katulad sang pagtuo sa mga istatwa sang mga diyos-diyos sadto sang mga Griyego kag mga Romano sa panahon sang Roman Empire sa diin gin-persecute ang mga Kristiyano.
***
Pero, ano gid bala ang “idolatry”? Sunu sa Easton’s Bible Dictionary, “Idolatry is image-worship or divine honour paid to any created object.”
In other words, pagkilala ini ukon paghatag sing gahum sa isa ka tinuga ukon bagay nga dapat lang iya sang Diyos.
Lakip diri ang pagsimba (worship) sa isa ka kahoy, suba, bukid, bisan bato gani, hayop katulad sang istatwa sang “golden calf” sa panahon ni Moses, kag iban pa nga tinuga sa duta kag kahanginan kag kaidadalman.
Subong man ang pagpati kag pagkilala sa gahum sang adlaw, bulan, kag mga bituon sa kabuhi sang tawo.
Kalakip man diri ang pagsimba sa mga nagtaliwan nga mga katigulangan kag mga baganihan – katulad sang mga Rizalista sa Bicol nga nagapati nga si Dr. Jose Rizal si Kristo mismo kag nagapabilin nga Spiritual Guide nila.
Maathag sa sini nga definition sang “idolatry” nga indi “idolatry” ang pagpadungog kay Kristo kag sang Iya representasyon sa larawan kag istatwa, kag bisan ang mga larawan kag istatwa sang mga baganihan sang Simbahan nga nagapatuman sang ginatudlo ni Kristo sa katauhan.
Pagkilala lang ini sang ginatuohan ta nga Diyos kag paghatag sing importansya sa Iya mga alagad, katulad sang mga santos, agud pirme naton madumduman sila, nga indi naton mahimo sing subong kahapos kon sa aton imahinasyon lang sila.
Yara kita sa sosyedad – basi malipat kita – nga nagakilala sing Freedom of Religion, kag tungod sini gina-respeto naton ang pagtuo sang iban kag sang ila praktis sa ila pagtuluohan.
Gani, tani respetuhon man sang iban ang kaugalingon nga pagtuluohan sang mga Catolico katulad ko kag sang akon pamilya. (w_mateojr@yahoo.com/PN)
