SANG sini lang, may isa ka balita nga gin dala sang pila ka pahayagan kag online report nga nagpakibut sa bug-os nga katilingban Kristiyano.
Ang ining balita gin kuha sa kaundan sang interbyu kay Pope Francis ni Eugenio Scalfari, ang 93 anyos nga editor sang La Repubblica, nga nabasahan sa online site sini sadtong Marso 29, 2018.
Sunu kay Scalfari, ang Papa nagpahayag kuno sa iya sa isa ka wala ma-rekord nga pag-sugilanun nila nga ang Impiyerno (Hell) wala naga-existir.
Sa pagbadbad (translation) sang Catholic blog nga Rorate Caeli, nga nabalhag man sa amo nga petsa, ini kuno ang gin siling ni Pope Francis kay Scalfari (nga gin badbad man naton diri):
“Ang mga kalag nga nakahinulsol sa ila mga sala makabaton sang kapatawaran sang Diyos kag maga-upod na sa Iya Himaya, samtang ang wala sing paghinulsol indi mapatawad kag indi man kinahanglan mag-sufrir kay dulaon na sila sing lubos (disappear, vanish).”
Kon matuod ini nga pahayag sang Papa, sunu sa pagsulat ni Scalfari, daku ini nga kabaliskaran sang maathag nga pagkilala sa Bibliya sang pag-existir sang Impyerno sa indi magkubos sa isa ka gatos ka dinalan (passages) nga nasaad mismo sa Bibliya.
Maabtik nga ginpanginwala ining report ni Scalfari sang Vatican.
“Iya-iya lang ini nga gin taod-taod halin sa ila sugilanun sang Papa nga wala niya ma-rekord kag wala man gani ma-quote (sa sulod sang quotation marks) sa iya sinulatan sa pagpamatuod nga amo gid ina ang gin siling sang Papa,” siling gani sang Vatican.
“Indi ini ‘faithful transcription’ nga dapat saligan,” dugang pa sang Vatican.
Samtang, wala gilayon nakuhaan sang komento si Pope Francis sa sining kaundan sang report ni Scalfari, nga nag-aku man nga possible nga indi man insakto ang iya pagsulat sang gin sugid sa iya sang Papa labi na gid kay wala man niya ma-rekord ini.
***
Gapati kita nga nagsala lang si Scalfari sa pagtul-id sang kon ano gid ang gin sugid sa iya sang Papa. Kon ano gid man ang bug-os kag tul-id nga gin siling sang Papa, tani gin-“quote” niya ini, santu sa kaugalian sang mga mamahayag, sa pagpaseguro nga amo gid man ang gin siling sang Papa.
Kilala si Scalfari sa paghimo sang report nga wala niya gina-rekord (sa tape ukon recording machine). Sa pila gani ka beses gin-reklamo siya sang Vatican parti sa sala niya nga report parti sa Papa.
Bisan pa sa sining aton pagpati sa sala nga report ni Scalfari, segurado nga madamo ang interesado, lakip kita, kon ano gid ang insakto nga gin siling sang Papa kay Scalfari.
Ugaling, wala kita nakabaton sang ano man nga official statement halin sa Papa parti sini samtang ginasulat naton ining aton kolum.
Ano gid bala ang gin siling ni Pope Francis kay Scalfari? Indi naton ini mahibal-an ugaling tubtub makahatag sang opisyal nga pahayag ang Papa mismo.
Angot sini, nangin interesado kita ugaling sa ining isyu sa kon ano gid ang posible pa nga matabo sa mga kalag sa Impiyerno luas sa ila padayon nga pag-antos diri.
Isa na dira amo kon bala possible nga dulaon na gid lang sila sa lugar nga pasigehon ang ila pag-antos sa katubtuban.
Ang Diyos ang naga-isahanon nga Tagtuga sang tanan, lakip na si Lucifer kag ang iya hubon nga nagrebelde sa Diyos. Gintuga man sang Diyos, sa lawas kag kalag, sanday Adan kag Eba kag ang ila kaliwat diri sa kalibutan.
Kay angD iyos ang Tagtuga sang tanan, natural lang nga Siya man mismo ang may gahum nga dulaon ang ano man nga gin tuga Niya.
Tungod man sini, possible ayhan – sa walay katapusan nga kaluoy sang Diyos– nga matagaan man Niya sing kaluoy ang mga kalag sa Impiyerno paagi sa pagdula na sa ila sa pag-abots ang nagakaigu nga panahon agud indi na sila mag-sufrir pa sang dugang?
Kag, ano naman ayhan ang madangtan ni Lucifer kag sang iya mga sinakpan sa pag-abut sang Ulihi nga Paghukom (Last Judgment)?
Kon ano gid man ang desisyon sang Diyos, segurado naton nga para ina sa lubos nga kadalag-an sang Iya Himaya kag sang bug-os nga kalangitan. Tani, ang kapatawaran kag kaluoy sang Diyos aton tanan maangkon. (w_mateojr@yahoo.com/PN)
