ANG teoriya sa pagpatuman sang isa ka maduguon nga drug war, katulad sang nagakatabo sa Mexico kag kasubong nga drug war, amo ang pagkabig sa mga durugista nga mga kaaway, kag isa lang ang paagi agud mapauntat sila – ang tapuson sila sa isa tuod-tuod nga gyera!
Ngaa wala na gid paglaum nga mag-ayo pa ang mga drug addicts agud dulaon na sa kalendaryo? Sanday US President George W. Bush kag Barack Obama madugay nga nangin drug addicts apang nag-ayo man kag nag-presidente pa.
Kon gyerahon gid man, dapat may pagsulundan gihapon, katulad sang pagdakop lang kon mag-surrender ang kaaway.
Indi ugaling mapaiway nga may mapatay man gihapon sa isa nga naga-surrender. Ina kay wala man seguro sing luyag magtestigo sa pagpatay sang upod nga pulis sang isa ka durugista tungod sa personal nga gutgut, ukon dulaon ini kay basi ibuyagyag sini ang maitom nga sekreto sang pulis ukon sang iya grupo nga sindikato.
Kon matabo, nga laban-laban natabo gid man, ang masami nga alibi amo nga ang gindakop nga durugista indi magpadakop, mabato, gani naluthangan patay!
Diri na masulod ang role ni Vice President Leni Robredo bilang Drug Czar nga, sa iya panan-aw, mangin epektibo lang ang drug war kon sandig sa Kamatuoran kag Rule of Law nga ginatindugan niya sadto pa. Para sa iya, kon mahimo lang likawan ang pagpatay sa mga suspetsado.
Mayor gani niya nga reklamo amo nga daw ang mga pusher nga magagmay lang ang masami ginainitan sang kapulisan kag PDEA.
Natingala si Robredo kon ngaa kinahanglan gid mapatay ang mga magagmay nga mga isda, nga tani dakpon lang agud gamiton sa pagtudlo sa mga dalagku nga mga isda nga gamut gid sang salot nga droga sa aton sosyedad.
Samtang, ang dalagku nga mga isda kon lagson ang madakpan amo lang ang ila binagtong, nga milyon-milyon ang balor, nga wala sing lawas nga madakpan kay madasig nakapalagyo, ukon wala sa lugar sang pag-raid.
May kaugalingon bala nga intelligence unit ang mga sindikato sa droga agud madali masalisihan ang mga kapulisan? Pila sini na-identify na sa bahin sang mga ninja cops sang wala pa si Robredo. Apang gapati si Robredo nga may mas mataas pa nga yara sa ila likod, nga luyag mahibal-an ni Robredo.
Gani nakigkita siya sa mga nagakalain-lain nga mga anti-drug agencies sa Hongkong, Taiwan, European nations, UN drug groups kag sa Estados Unidos agud diskubrihon ini, dugang pa sa luyag man niya mahibal-an halin sa Inter-agency Committee on Anti-Illegal Drugs (ICAD), sa diin co-chair man siya.
Indi ugaling luyag ni Presidente Duterte ining lihok ni Robredo kay para sa iya pagpasalibut ini sang iban nga pungsod sa aton sobreniya.
Wala man siya salig kay Robredo kay “I do not know her…!”, labi na gid kon bala masaligan ini sa paghibalo sang mga classified information angot sa national security sang pungsod.
Notwithstanding sining tindug sang Presidente, ang tanan sa 20 ka myembro sang ICAD lakip ang PNP, luas kay PDEA Director-General Aaron Aquino, gapati nga masaligan si Robredo sa pagtagu sang classified information angot sa mga high-value drug personalities tungod sa iya position nga Vice President sang pungsod.
In fact, kinahanglan ini ni Robredo agud mapatigayon niya ang polisa kag direksyon nga ipatuman niya sa iya pagdumala sa drug war bilang drug czar.
Kon wala ining impormasyon, ano abe ang pag-away ni Robredo kontra droga, labi na gid sa “supply side” sang drug war diin naangot ang mga dalagku nga drug personalities?
In other words, ano man abe ang pulos ni Robredo agud mangin madinalag-on siya bilang drug czar kon wala siya sang mahibal-an sa iya paga-awayon? Wala!
Gani, siling ni Robredo: “Mr. Presidente, kon wala ka sing salig sa akon, siling lang kay mahalin ako bilang drug czar!”
Ano abe sa inyo, dapat na bala maghalin si Robredo bilang drug czar tutal wala man salig si Presidente Duterte sa iya? (w_mateojr@yahoo.com/PN)
