SIN-O YADTONG mga pulo ka armado nga kalalakihan? Masobra isa ka semana na ang nakalipas apang wala sang athag nga imbestigasyon ang aton mga otoridad kon sin-o ayhan ang 10 ka armado nga kalalakihan nga nagsulod sa puluy-an nanday Melba Jeminillo sa Barangay Bakhaw, Mandurriao takna alas 11:30 sang gab-i sadtong Martes, Hunyo 20, 2023.
Nakasuksok sang bonnet, nagpamulpog kag ginbuka nila ang bintana nga jalousy gamit ang dos-por-dos.
Tubtob subong wala kita sang update kag posible nga malimtan na lamang ini. Padayon ini nga piuron sang mga matag-adlaw nga hitabu kag ihal-id sa kilid sang paminsaron nga halos indi na matalupangdan sa palaabuton.
Ayhan mangin kabahin naman ini sang mga hitabu nga wala sang kasolbaran, kasanagan, ukon kaathagan.
Apang, makatillingala lamang tungod nga daw sa wala sa bungog sang mga opisyal nga dapat kuntani magduso sang kawsa agud nga mabuligan nga maathagan ang mga pumuluyo tuhoy sa natabu.
Wala gid sang may nanindugan nga dapat ini nga imbestigaran kag ipaathag kon ngaa may mga armado nga kalalakihan nga naga-igsister sa syudad sang Iloilo.
Diin sila naghalin kag ngaa hinali nga nagtuhaw, naghimo sang senaryo kag nadula matapos ginlamon sang kadulom.
Wala bala sang mga opisyales nga namangkot kon ngaa may kasubong sini nga hitabu? Wala bala sila natingala kon ngaa may mga armado nga kalalakihan? Wala bala sang ihibalo ang kapulisan sa ila nga presensya?
Karon nga nagtuhaw sila, wala sang kapasidad ang aton mga otoridad sa pagtungkad kon ngaa nagtuhaw sila kag kon ngaa naga-igsister sila?
Ini bala ang kahulugan sang malinong kag hilway sa insurhensya nga syudad?
Makatilingala ang kalinong sang mga opisyales. Dapat nga matublag sila. May ideya na sila kon ngaa nagakatabu ini?
Ngaa may kaangay sini nga senaryo?
Kon may ginapangita sila, kag kon sala nga balay ang ila nakadtuan, sin-o sila? Mga otoridad man bala sila? Ngaa naka-bonnet? Ngaa wala sang presensya sang unipormado nga mga otoridad?
Indi pwede nga pabuyan-buyanan lang naton ang natabu kag kalimtan na lang ukon tabunan sang iban nga isyu. Dapat may magpaathag tuhoy sa hitabu.
Indi naton mabasol kon nagasarurot ang pagsalig sang mga Pilipino sa aton kapulisan.
Base sa 2023 Second Quarter Survey, nagnubo sa 49% ang approval rating sang PNP subong man ang trust rating sini nga nabalhag sa 39% sa pinakaulihi nga non-commissioned survey sang Publicus Asia Inc.
Madamo sang mga hitabu nga nagluntad nga wala sang kasolbaran. Sa una lang mainit ang balita apang sa paglipas sang panahon, kaangay na sang mabugnaw nga bahaw nga kan-on.
Kahibalo na ang kapulisan kon paano, basyahan ang ibwal sang kalayo sa nagluntad nga hitabu. Isa ka pamaagi amo nga islan ang hepe, ukon ang director agud nga ang ginabatalya indi na mapokusan kag ang bakol sang komentaryo mahagan-hagan.
Mapatahaw man ang kalayo sang isyu, apang ang marka sang paso kag halit ang indi mapanas sa pang-ino-ino kag nagaresulta ini sa pagtahaw man sang pagsalig sang pumuluyo.
Masubo lang tungod daw inutil sila sa pagpaathag kon sin-o ang 10 ka armado nga tawo. Kon diin gikan ang mga armas, kon ano nga sahi sila sang grupo kag kon ano gid ang ila tinutuyo sa ila nga ginhimo.
Kon may insidente sang holdap, ang tanan nagasawsaw kag nagatan-ay sang ila bulig ukon ayuda agud nga matumod ang mga suspek kag makasuhan.
Apang sa natabu sa Bakhaw, wala sang may nagkondenar, wala sang may nagtingog nga dapat pasabton ang mga armado nga tawo. Indi man ako magpati nga naningkoy sila tungod nga mapag-on sila manindugan kon kinahanglan.
Makatilingala nga daw ginabalewala, daw ginapawalaan na lang, daw kaangay nga wala sang may natabu.
Wala sang CCTV camera sa palibot? Wala bala sang video kon diin sila gikan kag diin padulong?
Kaangay nga yara kita sa dead-end, nagabunggo sa pader nga wala na sang lutsan kag ang opsyon amo nga magbalik na lamang nga nagalungo-lungo.
Indi lang gid ako maributay bangud sa kadamuon nila, 10 ka tawo, blangko ang aton mga otoridad sa ila presensya kag tion sang paghimo sang senaryo.
Kabay pa nga ang paghipos sang tanan maggahod indi magtayuyon. Kabay pa nga indi nila madangatan ang sitwasyon nga nadangatan sang pamilya Jeminillo.
May ginasiling nga “Wala sang likom nga indi mabuyagyag kag wala sang paghimbon nga indi mabungkag”. (bertladera@gmail.com/PN)
