NAKALAB-OT na sa konseho sang syudad ang yamo kag reklamo sang mga pumuluyo ilabi na sang mga apektado sa ginaobra nga mga proyekto sa dalanon.
Una na nga nagsapol sadto si Councilor Ely Estante ang chairman sang committee on infrastructure sang Sangguniang Panlungsod sa talatapan rehiyunal sang DPWH kag didto iya nahibaluan nga may 32 ka mga atrasado nga mga proyekto nga ginapatuman sa syudad sang Iloilo kag wala pa nalakip diri sa kadamuon ang mga atrasado man nga mga drainage project kag school buildings.
Ginasaad sa report ang madamo nga rason kaangay sang gutok nga dalan kag indi sila makahulag bangud sa trapiko, problema sa road right of way, problema sa mga sablag sa dalan, problema sa kulang nga tawo nga magatrabaho, kag madamo pa nga mga rason.
Mahimo lang mahangpan nga maatrasar ang trabaho kon tuga sang duna nga sablag kaangay sang mamunog nga ulan, nagbaha, ukon may pangabay nga mag-untat anay bangud sa may okasyon, may selebrasyon ukon may dapat nga unahon nga hilikuton.
Nagakatingala man si Estante kon ngaa tuman ka damo sang alibi ukon palusot nga rason ang mga kontraktor bangud ang tagsa ka proyekto may yara sang plano kag desinyo antes hiwaton ang bidding kag ang nagdaug sa bidding ang nakahibalo na sa sitwasyon sang proyekto nga iya ipatuman.
Dapat nakita na sang kontraktor ang lugar kon sa diin ipatuman ang proyekto. Nakita na niya ang posible nga mangin sablag kag magatuga sang huol. Kon indi niya makita sang maathag, dapat nagapakig-angot siya sa mga utility company agud mahibaluan kon may linya sang tubig, linya sang kuryente ukon linya sang telepono nga nalubong sa dalom nga maapektuhan. Kon may poste nga nagabalabag, dapat nagapakig-angot man sila sa tag-iya sang poste.
Mga mahapos nga bagay nga kon kaisa nagatuga sang dsku nga problema kon pawalaan ukon patumbayaan lang sang mga kontraktor.
Paagi sa imbestigasyon matukiban man kon sin-o sa mga kontraktor ang wala sang lisensya nga nagahulam lang sa iban nga mga kontraktor agud nga makapangontrata, kon sin-o ang wala sang kapasidad sa paghuman sang proyekto, kag kon sin-o sa ila ang wala sang kagamitan nga nagahulat lang sa kaluoy sang iban nga kontraktor agud sila ang makaarkila kag makasugod sa ila obra.
Madamo sang proyekto nga ginapatuman, madamo pa sang nakalinya nga ipatuman kag bangud sini sambot ang tanan ukon indi makaarapal ang DPWH sa pagpatuman sang dululungan nga mga proyekto. Indi nila mabantayan ang progreso sang ginaobra sag mga kontraktor kag may mga madugay na nga ginsuguran apang tubtub karon wala pa nahuman.
Yara sa kamot sang DPWH-6 ang pagdumala sa mga kontraktor kag ang pagpena sa mga salawayon nga kontraktor. Dapat indi magkonsentihon ang ila kauyaya ukon kalaminday, indi pagtabunan ang ila kasaypanan bangud nga may dapat nga protektahan.
Dapat nga pahulagon ni Engr. Rodney Gustilo ang iya opisina nga magbantay kag magkadto sa mga proyekto nga ginatrabaho agud iya mapasiguro nga ang ila pag-obra indi makatuga sang atrasado nga paghuman sang proyekto. (bertladera@gmail.com/PN)
