TUGOTI ninyo ako nga ipakigbahin ang akun personal nga pagpanglakaton kaupod ang sigarilyo tubtob nga nagdesisyon ako nga dulogan ang pagsuyop sang mapait kag mabaho nga aso.
Tuig 2002 sang nagbalik ako trabaho diri sa syudad sang Iloilo, nagbalik man ako panigarilyo.
Una ako nga nakatilaw sang sigarilyo sang 1997 apang nag-untat ako sang 2000. Makalipas ang halos duha ka tuig nga pag-untat sa pagpanigarilyo, liwat ako naganyat sa pagsuyop sang aso.
Sa pamatyag ko nagatawhay ang akun pamatyagan kun makasuyop ako sang isa ka stick sang sigarilyo. Sang una ang per stick sang Marlboro P1.50 lang. Maluwas pa sa libre nga hatag sang mga kaupdanan.
Bisan sa balay sige lang ako panigarilyo. Asta nga ang isa ko ka anak nangin asthmatic na.
Sang una daw ginabalewala ko lang ang masami nga pag-atake sa iya sang hapo. Apang matuod gid nga kun ikaw na personal ang magbatyag, makapaminsar ka nga magbag-o.
Mid-March 2014 sang na-diagnose ako nga may tubig sa baga. Sang una in denial pa ako…Sa pagkamatuod nagkuha pa ako sang second opinion sang isa pa ka doctor. Ugaling bangud pareho ang diagnosis, nagdesisyon ako nga magpa-confine agud pasuyopan lang ang tubig.
Apang sa akon confinement nakita nga indi madala sa pasuyop lang kag kinahanglan gid ang operasyon. Sa malip-ot nga pulong nagpaopera ako kag naggasto sang tuiman ka dako. Ini tanan nalampuwasan ko sa bulig sang mga abyan.
Subong nga Abril 2018, ginadumdom ko ang ikaapat ka tuig ko na nga pag-untat sa pagpanigarilyo. Malawig na ako nga nag-untat pero nabatyagan ko pa ang halit sini sa akun.
Kun kaisa nagapin-ot pa ang akun dughan. Mas maayo na lang subong ang akun sitwasyon bangud wala na ako sang smoker’s cough kag wala naman ginatrangkaso sang masami.
Matuod gid nga bag-ong kabuhi ang akun naangkon sa pagtalikod sa pagpanigarilyo. Amo lang na ugaling ang asthma sang akun anak wala pa gid nakuha kag sina ginabasol ko ang akun kaugalingon.
Subong man malipayun ako nga madinalag-on ako nga nakabiya sa pagpanigarilyo. May nagapamangkot sa akun kun paano ko nabayaan ang sigarilyo. Simple lang…determinasyon kag desiplina sang kaugalingon.
Kamo man mahimo makabiya sa aso sang sigarilyo kun gusto kag desidido kamo. (jpranco1975@gmail.com/PN)
