DUHA na ka tuig ang COVID-19 pandemic sa bug-os nga kalibutan. Ang iban nga pungsod nakabangun na. Ang Pilipinas padayun pa nga nagakamang-kamang kag nagapanglaghap kun ano ang mga estratihiya nga himuon agud mapahagan-hagan ang impeksyon sa tawo.
Isa ang sector sa edukasyon sa mga naapektuhan. Minilyon ka estudyante ang apektado. Gikan sa Kinder tubtob sa Grade 12 kag pasaka sa Kolehiyo. Bisan ang mga Graduate Studies apektado man. Sigurado ang kalidad sang mga nagatapos kada tuig apektado man.
Bangud sini madamo nga mga manunudlo ang nagahimakas nga maghimo sang mga bag-o nga estratihiya agud mapalambot ang kalidad nga edukasyon sa mga kabataan.
Diri sa Rehiyon 6 dalayawon ang programa nga ginpatuman sang pamunuan ni Director Ramir Uytico. Ini ang Innovation Showdon. Diri ginpakita ang mga pagbag-o nga ginahimo sang kada eskwelahan agud mas epektibo ang pagdala sang kinaalam sa mga kabataan sa pihak nga wala sang face-to-face classes.
Tanan nga mga innovations matahum. May kinaiya nga nagasanto sa kinahanglan sang mga kabataan . Kaangay sang “hayub-hayub sang kauswagan” sang Balasan nga gintukod ang mga payag-payag nga nagaserbe nga hulot-klasehan sang mga kabataan sa nagkalainlain nga purok nga sakop sang eskwelahan.
May ara man nga “Mobile Eskwela” ang banwa sang Sara samtang may “Project HBI” ukon Handset-Based Instruction ang Lambunao. Katahum nga mga innovations nga mapuslanon sa mga kabataan.
Sining karon lang nag-viral ang manunudlo sang Calinog National Comprehensive High School bangud sang iya estilo nga daw may face-to-face lang sa iya klase. Ginpangtapik ni Sir Jessie Comprendio ang laragway sang iya mga estudyante sa tagsa ka pulungkuan. Pamaagi niya ini agud mangin pamilyar sa iya ang nawong sang mga ini kag makilala niya kun magsumalangay sila bisan diin lang.
Suno kay Director Uytico, ini nga innovation ni si Jess makabulig man sa mental health sang mga manunudlo. Ini malipod nga may pagbag-o sa ila sistema sang pagtudlo gani apektado man ang ila paminsaron. May nagakasubo kag nagaka-stress sa sitwasyon.
Sa sini nga sitwayson, kinahanglan natun ang mga masangkad nga paminsaron sang manunudlo, estudyante kag ginikanan. Magbuligay para mapabilin ang kalidad sang edukasyon sa atun pungsod.
Mabudlay, apang kun nagabuligay ang pagpanglakaton magatawhay!/PN
