TAPOS NA ang tuig 2018 kag madamo ini sang ginbilin sa aton nga mga inagihan kag handumanan.
Natapos ang nagabalud nga pagpasimpalad sa aton pagpanglakaton sa lasang sang kabuhi, sa pagsumalang sa madamo nga mga pagtilaw, mga pagpanghangkat, mga panghaylo kag madamo nga higayon nga nakapilas sa aton balatyagon, yari kita sa gihapon nga padayon nga nagalaum sang maayon nga palaabuton.
May mga tinion nga kita ang daw mapuklid apisar sang mabakod naton nga tindog, may higayon nga kita ang nagakalingkang bangud sa kahangawa nga nagapangibabaw sa aton paminsaron kag balatyagon, apang bisan pa nga kita ang ginbaklid sang higayon, liwat kita nga nagbangon, liwat nga nagapakigbatu agud nga aton makita ang pagsanaaw sang palaabuton.
Napagkit na sa aton paminsaron kag balatyagon ang mga handumanan nga ginhalad sang panahon. Kon aton nga handurawon, kita ang makayuhum ukon makatayhum, ukon magamiraw-miraw ang aton mata, kag ulihi na lang mamulalungan nga nagaagay na ang luha sa aton guya. Ang pagbasa sang aton mata bangud ina sa nabatyagan nga kasubo sang pag-isahanon, bangud man sa kaluoy sa kaugalingon kag kon kaisa bangud mas nakita naton ang balor sang aton kaugalingon kon paano kita nakabutwa gikan sa makalulumos nga mga palaligban sa kabuhi.
Nangin magarot ang aton pag-usoy sa banas sang aton kabuhi, nagakapilasan ang aton balatyagon kag sa pagpanghagpas naton sa mga sablag nga hilamon may mga mapilasan man kita nga mga balatyagon.
Kon kaisa nagahinay kita, kon kaisa nagadulog kita, agud nga magpahuway kag agud nga balikdon ang kalayo na sang aton ginlakbay.
Tapos na ang tuig nga puno sang handumanan, nagalaum kita sang bag-o nga tuig nga puno sang paglaum nga kita ang makatibawas, kita ang mangin magmadinalag-on sa aton mga aton kag mga paghimakas.
Nagadata naman ang mga pagpakot sa palaabuton, may mga sinulatan na tuhoy sa mga pagtagna. Indi madula dira ang astrology, numerology, tarot card reading, horoscope kag chinese zodiac.
Ginasiling sa Chinese horoscope nga ang tuig 2019 amo ang year of the pig. May mga swertihon kag may mga dimalason. Kinaandan na ini nga pagtagna kag may nagapati kag may yara man sang wala nagapati.
Sa kinaandan na, ang tanan nasandig sa aton pagpati kag sa aton paghimakas. Kadungan man diri ang aton preparasyon sa pagsug-alaw sang bag-ong tuig nga madamo sang ginahanda sa ibabaw sang lamesa. Mga prutas nga bilog kag mga pagkaon nga mapilit kag malaba nga nagapatimaan sa aton paghandom nga magasulod ang dagaya nga pangabuhi kag malawig nga kabuhi.
Apisar sang aton nga tradisyon kag kustombre nga ginasunod ukon ginapatihan, padayon ang pagpahanumdom sa aton nga ang tanan nasandig sa pagbakas, sa maayo nga pagtinguha nga wala sang may ginatapakan agud nga ang positibo nga enerhiya ang magapalibot sa aton.
Padayon man ang aton nga pagpangamuyo nga kita ang ubayan kag hatagan sang bugana nga grasya. Indi kita dapat magkalipat nga ang tanan nasandig sa mas gamhanan nga amo ang mas nakahibalo sa kon ano ang aton madangatan.
Kabay nga aton maagom ang mahamungayaon nga palangabuhian sa pagsulod sang bag-o nga tuig. (bertladera@gmail.com/PN)
