NATINGALA ka man bala kon sa diin na nagkadto ang ginhatag nga paskwa sa imo?
Kon madumduman mo, daw kadamo ka man sang nabaton nga paskwa, ilabi na ang kwarta, gikan sa mga tawo nga nangin maalwan sa imo sa sini nga panahon sang pagpaambit sang grasya.
Makasiling ka siguro nga madamo ka na sang nasuptan kon imo lang gintago kag wala ka na naghatag sang paskwa sa iban naman nga tawo nga imo kilala nga nagakaangay nga paambiton sang grasya.
Samtang ginabasa mo ini karon nga sinulatan, nagapaminsar ka na kon pila na ang imo nabaton kag kon pila na kuntani ang imo nga natipon nga mga ginpaskwa sa imo.
Nangin palaagyan ka lamang sang grasya agud nga makadangat ini sa idalom, sa mas nagakinahanglan kag mas makaapresyar sang magagmay nga bagay.
Ang imo nabaton nga paskwa husto mo lang man nga ipaskwa sa iban. Ang yara sa mas mataas nga estado sa kabuhi amo ang nagpaskwa sa imo. Sila nga mga tawo nga wala sang direkta nga mapakig-angutan sa mas manubo pa nga estado kaysa sa imo. Ikaw ang nangin palaagyan sang yara sa imo ibabaw kag yara sa imo idalom. Ang ila ginhatag sa imo, ginhatag mo man sa mga yara sa imo idalom. Nakahawid ka man sang gamay, apang mayoriya sini ang nakadangat sa mas nagakinahanglan.
Kaangay man ini sa isa ka tasa, kon may sulod pa indi mo masudlan sang likido bangud puno. Masudlan mo lamang kon naubos na ang iya nga sulod ukon bakante na.
Diri ko nareyalisar ang kahulagan sang pamaskwa. Kag mas bentaha kon may ginahatag ka bangud nga may nagahatag man sa imo.
Ang mga tawo nga yara sa imo ibabaw ang nagahatag sang kantidad nga angay para sa imo, samtang ikaw naman ginapahat-pahat mo ini kag ginahatag sa mga tawo nga yara sa imo idalom. Isa ang ginhalinan apang madamo ang napaambitan. Ginpamuad mo ang grasya nga nabaton mo paagi sa pagpaambit sa iban nga mas nagakinahanglan.
Nalipay ka nga may nagpaskwa sa imo, apang mas malipayon ka sang nakita mo nga malipayon ang ginhatagan mo.
Isa ka ehemplo diri nga nakayuhom ka bangud ginhatagan ka sang isa ka libo ka pesos kag bangud ini sa imo estado sa sosyudad. Posibilidad sini nga imo man gilayon nga ipanghatag bilang paskwa sa mga ordinaryo nga tawo. Ang imo isa ka yuhom sa isa ka ka libo ka pesos ang mangin 10 ka yuhom sang 10 ka tawo nga makaapresyar sang tag-100 ka pesos.
Ang aton gingamit nga ehemplo sa sini nga diskurso amo ang kwarta apang posible man nga kagamitan ini para sa iban. Ginhatagan ka sang isa ka butang, napinsaran mo nga duha na ang yara sa paghinakop mo kag ginpabilin mo ang bag-o kag ginhatag ang nagamit mo na.
Ginpaminsaran ko ini sing malawig kon amo ang kahulugan sang pamaskwa sa naghatag kag sa ginhatagan. Diri mo man mahangpan kon ngaa mas malipayon ang nagahatag kaysa sa ginahatagan.
Kon maalwan ka sa paghatag sang pamaskwa, nagatubod lang ang grasya kag ang imo ginpaambit naulian man sang imo ginabaton.
Ang tubig nga nagapondo sa imo baso mga wala mo nainom bangud wala ka pa nauhaw ang mahimo mo nga ipaambit sa nauhaw, kon iya imnon mangin bakante ang baso kag handa naman ini nga magbaton sa kon ano ang sa iya igabubo.
Ang importante lamang nga magtuon sa pagtipig sini kag binlan ang kaugalingon agud nga indi mawad-an tungod nga nangin sobra ang kaalwan.
Kon may nagahatag sa imo, ipaambit ini sa mga wala sang ginalauman nga regalo, sa mga tawo nga wala sang masyado nga koneksyon kaangay mo, sa mga tawo nga gindalukan sang higayon, sa mga tawo nga wala sang access nga makabaton sang paskwa.
Indi lamang ini akon obserbasyon. Isa ini ka eksperyensya, ginpadalman, ginhangop kag gintungkad ang kahulugan.
Makasiling ka nga matuod ang ginahambal nila nga ang kahibalo magpaambit wala nagakawad-an, ang matuod nga manggaranon amo ang wala nagakinahanglan sang mga materyal nga bagay, nga ang indi dalok mahamuok ang tulog.
Kabay nga ang masunod nga henerasyon makahangop sa matuod nga kahulugan sang gift-giving. Indi ini tuhoy sa kon ano man nga regalo kundi sa kaalwan sang isa ka tawo. Ipatudok gid nga importante ang ‘values’ kaysa sa materyal. Importante pa gid nga dapat maintindihan nila nga wala ginapangayo ang regalo, ginahatag ini santu sa kabubut-on.
Sa subong, posible nareyalisar mo na kon ngaa daw naglabay lang sa imo kamot ang madamo nga grasya.
Sa subong nareyalisar mo naman kon kanday sin-o ang ginhatagan mo sang kalipay sa gamay nga grasya nga ginpaambit mo sa ila.
Kabay nga sa kada tuig kag sa masunod nga henerasyon, ang kahulugan sang pamaskwa ang magapabilin kag indi pagpukanon sang kadalok kag kasakon.
Ang tasa nga puno sang tsaa indi na masudlan, magluwas lang kon bakantehan agud nga makaakomodar sang mas mainit nga tsaa.
Indi na makadawat ang imo palad sang grasya kon okupado na, dapat bakantehan na ini agud nga makaakomodar sa pagdaho sang bag-o nga grasya. (bertladera@gmail.com/PN)
