MADAMO nga driver sang depasahero kag pribado nga salakyan ang nagareklamo tuhoy sa bag-o nga iskema sa pagsolbar sang guot nga ilig sang trapiko sa bahin sang circumferential road kag coastal road sa Barangay Balabago, Jaro.
Ang masulhay nga ruta ginpatiyog, ginpalayo, ginpaliko, kag ginpaguot paagi sa pagpalawig sa ruta kag didto maga-u-turn sa una nga slot antes ang lugar kon sa diin nahamtang ang subdivision.
Ang mabudlay pa sa sina nga u-turn kon indi power steering ang salakyan, nagakaguot bangud nga kapila mag-atras kag mag-abante antes makatalunsay sa linya sang dalan. Mas mabudlay pa gid tungod nga natabunan ang imo panan-awan sang mga tanum nga nakahilera sa center island. Peligroso ini tungod nga nagahagunos ang mga salakyan, ilabi na ang mga dalagku nga trak, kag posible nga may madalasa gid kag madugmok sa pila ka adlaw.
Bisan ako nagahawat-hawat ang ginhawa kon nagasakay sa jeep, ilabi na sa front seat, kon may nagahagunos nga trak nga basi indi gilayon makapreno ukon magday-os ang preno, sigurado nga madunot ako.
Dapat butangan sang warning device ukon paandam sa mga motorista kag nagabiyahe nga maghinay-hinay tungod nagapakadto sila sa bahin nga may yara sang naga-u-turn agud nga makapanigana kag indi makadalasa sang iban nga salakyan.
Dapat man nga tapson ukon buhinan ang kataason sang mga tanum agud nga makita na bisan malayo pa ang nagapaliko nga salakyan kag ang nagapadulong nga salakyan.
Apang, mas manami kuntani nga kakason nila ang barikada nga ila ginbutang agud nga diretso ang dalagan sang salakyan gikan sa Bitoon padulong sa Balabago. Kon diretso ang salakyan, malikawan ang huol sa biyahe kag risgo sa u-turn slot sa tunga sang center island.
Sa akon paglantaw, posible nga ginhungod ini nga solusyon agud nga magdiretso ang mga pribado kag pampubliko nga salakyan sa bahin sang dalan kon sa diin may patindugon nga establisemyento-komersyal.Sa akon paghangop, luyag nila nga mahibaluan sang tawo ang ini nga bag-o nga negosyo, hatagan sang ideya ang mga motorista kag paanaron ang mga pasahero sa sini nga ruta agud nga kon magtindog na ang negosyo indi na matingala ang mga tawo.
Wala na kita dira sa ila diskarte, basta ang tawo indi mag-antus, indi magsakripisyo kag indi mangin eksperimento sa kon ano man ang ila mga plano. Kuntani, indi lang paglisu-lisuon ang alagyan nga nagahatag sang huol sa pumuluyo.
Mas maayo kuntani nga lisuon ang alagyan kon may tuhay nga alternatibo nga dalan. Apang, lantawa, nag-u-turn ang salakyan, ginpatiyog, ginpalayo, ginpalawig, apang didto lang man gihapon sa kinaandan nga alagyan malusot. Klaro nga ginpabudlayan ang mga motorista kag pasahero.
Kon ang punto nga agud indi maggutok ang coastal road, dapat hawanan ang dalan sang mga naga-parking nga mga trailer ukon ang may ginaguyod nga mga container van. Ang dalan nga four-lane, kon kaisa nangin two-lane na lang bangud nahimo nga parkingan ang magtimbang nga kilid sang dalan.
Ang solusyon sa sini nga problema indi ang pagbutang sang barikada kag mag-u-turn didto sa malayo kag peligroso nga bahin sang dalan. Kinahanglan lamang diri ang husto nga pagdumala sa ilig sang trapiko. Dapat may unay nga traffic aide nga nagaderiher ukon pabutangan sang traffic lights tungod masaku ang dalan kag dalagku ang nagataris nga mga salakyan.
Indi na kita dapat maglab-ot sa punto nga kwestyunon kon ano ang poder sang Iloilo City Public Safety Transportation Management Office sa pagbutang sang u-turn kag barikada sa sina nga dalan, kon angay nga may ordinansa para dira antes sila magpatuman, kag kon may poder sila nga magpangdakop kon wala sang ordinansa angot dira.
Madamo ang nagsiling, mga nagalabay sa sina nga dalan sa halos kada adlaw, nga mas naglala ang sitwasyon, mas nabudlayan sila, kag wala sang may nabulig ang barikada kag ang pagpa-u-turn sa mga salakyan didto sa malayo nga bahin nga puno sang risgo kag kabalaka.
May nagluntad na nga mga pagbunggu-anay sang mga salakyan, duha ka asud-asud nga hitabu, sang damlag lang bangud sa u-turn nga tuman ka budlay. Wala nagasantu ang desinyo sang dalan nga mag-akomodar sang tanan nga sahi sang salakyan nga maka-u-turn.
Antes ginpatuman ang ini nga padugi, kuntani gintun-an anay sing maayo kag ginlantaw ang sitwasyon. Kuntani gin-usisa kon bala may daku nga risgo nga matuga ini sa mga motorista.
Kon indi ini pagtadlungon, lauman naton nga mas madamo pa nga aksidente ang matabu, ilabi na nga nagapadulong na sa panahon sang paskwa kon sa diin madamo dira ang nagalabay nga mga salakyan bangud nga nagalikaw sila sa ruta nga Tagbak-Tabuc Suba sa Jaro bangud sa guot nga trapiko kag diri nagalusot sa coastal area.
Kinahanglan lang naton nga magkonsiderar kag maghatag sang solusyon nga angay kag nagakabagay. Indi naton pag-ipilit ang solusyon nga balik-awot nga imbis makapasulhay, mas makapabudlay sa mga nagataris sa sina nga dalan. (bertladera@gmail.com/PN)
