MAY ESTUDYANTE man o wala, tagsa ka tuig, ang tanan nagapanghanda sa pagbukas sang klase.
Ang mga ginhikanan kag guardians nagaupod sa ila mga bata sa pagpalista sa eskuelahan sa pagsugod sang enrollment period. Nagapaidalom kita sang maid-id nga screening – halin sa entrance examination, pag-submit sang mga dokumento, pag-interview pati na ang pagpagunting (labi na sa mga lalaki).
Tagsa ka tuig, ini ang aton ritual bilang mga adult member sini nga katilingban bangud lakip sa pagpalangga sa mga bata, importante nga sila mapatun-an man sang maayo para sa paghurma sang ila karakter.
Ang mga wala sang estudyante padayon nga naga-involve paagi sa pagbulig handa sang mga eskuelahan. Sa karon nangin kinaandan na ang pagpaninlo sa idalum sang “Brigada Eskuela” nga ginahimo duha ka semana antes ang pagbukas sang bag-o nga school year. Ang komunidad ginalauman man sa pagbulig sa mga ginhikanan kag mga manunudlo sa pagseguro nga masulhay sa mga hulutklasehan ang mga bumulutho sa pangpubliko nga mga eskuelahan.
Suno sa Department of Education, bastante ang mga manunudlo kag mga hulutklasehan diri sa Kabisay-an Nakatungdan sa pagbukas sang School Year 2019-2020.
Ginpahayag ni Department of Education (DepEd) Region 6 assistant director Victor de Gracia na nalubad na ang classroom kag teacher backlogs. Sang mga nagliligad nga tuig, ginhimulatan nga ma-construct ang mga school buildings kag sunodsunod ang “hiring” sang mga manunudlo.
Ginpahayag ni Dr. Lea Belleza, Education Program Supervisor kag concurrent Regional PIO, hecho na ang tanan para sa pagbaton nga mas o menos 2.2 milyones ka estudyante sa nagkalainlain nga halintang – halin Kinder I tubtub Grade 12 sa una nga adlaw sang school year.
Nauna sini, madinalag-on nga ginbuhat ang Brigada Eskuela kag mahugod nga ginbantayan ang enrollment paagi sa “Oplan Balik Eskuela”. Madinalag-on naman nga nahimo ang in-service training sa mga manunudlo sang semana antes agud magabayan sila sang mga lab ing ulihi nga polisa sang Dep Ed sa pagbukas sang klase.
Karon nga school year, ginabanta nga sobra sa duha ka milyon ka learners ang magabalik sa mga eskuelahan pangpubliko. Sobra sa tunga sini nga kabilugan nga mga bumulutho sang rehiyon ang yara sa Negros Occidental.
Ang DepEd nagabanta (estimate) sang 10 porsiento nga increase sang enrollees kada tuig. Sang nagligad nga tuig, yara sa 1.8 milyones ang mga learners sa public schools halin Kinder 1 tubtub sa Grade 12.
Gina-project nga may 170, 248 ka bumulutho nga magasulod sa Kindergarten. Mas o menos isa ka milyon ka bumulutho sa elementarya, 669,000 ang sa Grade 7 – 10 (Junior High School ) kag sobra 232,000 ang sa Grade 11 kag 12 ukon Senior High School.
Ginapahamtang sa 40 tubtub 45 ang average classroom size. Naga-vary ang kadamuon o kagamayon depende sa location sang public schools.
Pangatlo nga “balik-eskuela” na ini sang Labay Man Akon column bangud padayon ang aton pagbantay sa pag-eskuela sang aton mga bata. Tuig tuig gina-monitor naton ang mga nagakalanabo sa eskuelahan, labi na sa public school system bangud dako nga porsiento sang pamilyang Filipino nagasalig sa public school system sa patudlo sang aton kabataan. (runjirjamolo@gmail.com/PN)
