KON madayon ang school opening sa Agosto 22 kag mapatuman na ang Face-to-Face nga klase, panugyan ta lang nga indi kita tani malipat sang mga dapat himuon agud ma-protejeran sing maayo ang aton mga kabataan sa ila na pagbalik sa eskwelahan.
By the way, ang masunod nga mga panugyan naton diri base man sa mga panugyan mismo sang mga health authorities sa ila advisory kag press releases.
Pero, kon indi magsantu ang ano man nga panugyan naton diri sa inyo nahibal-an halin sa inyo kaugalingon nga health sources, sa inyo na ina kon ano ang sundon ninyo.
Dapat ugaling ā kag dapat gid ā kaugyon ini sa panugyan sang aton mismo Deparment of Health kag Inter-Agency Task Force (IATF) batok sa Covid-19, samtang nagapadayon ini sang pagpabakuna sang mga pumuluyo lakip na ang mga kabataan.
***
Syempre, lakip man sa aton pagpahanumdum ang mga manunudlo, iban pa nga empleyado sa eskwelahan, mga ginikanan kag mga bantay sang mga kabataan, mga drayber nga magadala sa ila pakadto sa eskwelahan kag pauli, kag mga iban pa.
Sa panugyan mismo sang aton Department of Health, una na dira ang padayon nga paggamit sang publiko sing DOH-recommended nga face mask.
Kinahanglan man ang pagpatuman sang isa tubtub duha ka metro nga distansya sa tunga sang mga tawo agud malikawan ang pagpanglaton sang mga mikrobyo sa malapitan, nga importante mapatuman gid sa mga klasehan.
Magpalayo man sa mga naga-ubo, nagapangatsi, ukon nagasugilanon malapit sa inyo kay mayor ina nga kabangdanan sang pagpanglaton sang COVID-19 virus kag iban pa nga mga mikrobyo nga dala sang hangin.
Obligahon man ang kaugalingon sa pagtalikud ukon tabunan ang baba sang panyo ukon tissue, ukon, wala na gid, sang siku kon kita man ang mag-ubo ukon mangatsi.
Makapanglaton man ang mga mikrobyo nga makuha naton sa mga bagay nga makaptan naton kag madala sa aton ilong, baba kag mata kon diin makasulod ang mga mikrobyo, gani likawan ang pagtandug sang kamot sa ini nga bahin sang kalawasan.
Maghugas sang kamot gamit ang limpyo nga tubig kag habon ukon sang sanitizer, katulad sang 70% alcohol, sa una nga kahigayunan nga makakapot kita sa mga bagay nga masami mateneran sang mikrobyo, katulad sang lilisuan sang ganhaan.
Indi pagdal-on ang sapatos ukon ismagol sa sulod sang balay kay ang higko sini posible may dala sing mikrobyo nga makuha sa duta nga madala naton sa sulod sang balay kag mahaklo sa pagpanglimpyo sa balay.
Sa pag-abot sa balay, maligo dayon kag ilikaw anay ang mga nasuob nga panapton sa iban nga panapton kag ugaling labhan ini sa tubig kag habon bag-o ihalay.
***
Kinahanglan man ready ang eskwelahan sa pagpatigayon sang mga health measures nga makapaseguro sang pagpangamlig sa mga kabataan, kag iban pa, batok sa COVID-19 virus kag iban pa nga mga mikrobyo.
Lakip na diri ang kinahanglan nga necessary test sa mga sintoma sang COVID-19 bag-o magsulod sa eskwelahan ang estudyante, mga ginikanan ukon bantay, mga manunudo kag iban pa nga masulod kag magtener sa eskwelahan.
Dapat may Nurseās Room kon diin madala dayon kag matatap ang mga kabataan kag iban pa nga magapakita sang sintoma sang COVID-19 kag kon ano man nga kabangdanan.
Dapat man may easily accessible nga handwash facility ukon sanitizer kag na-sanitize nga lalapakan sa pagsulod sang eskwelahan kag mga klasehan.
Kinahanglan may mga posted signs man sa immediate premises sang eskwelahan nga nagapahanumdum kon ano ang dapat ukon indi himuon.
***
Sa salakyan, dapat tanan nga kabataan naka-mask, nakapungko nga may āsneezing/cough guardā sa bal-ot nila.
Ang drayber mismo may face mask kag may available nga sanitizer sa salakyan. Ang salakyan dapat bukas ang salandigan sa kilid kag, kon mag-ulan, mabinlan sang bastante ka daku nga giha para maagyan sang hangin. Para ini sa pagpaseguro nga maka-circular pagwa ang hangin kag indi magtener sa sulod.
May paagi man sa pagbayad pasahe nga wala sabad. Maglikaw man sa indi kinahanglan nga pagsugilanon, kag kon ano pa nga indi bagay himuon.
Dapat naga-obserbar gid sing good hygiene ang salakyan agud mapaseguro ang pagka-limpyo sini.
Amlig gid mga boys and girls, maāam and sir, kag ang tanan para sa mabungahon nga āNew Normalā na sa eskwelahan!/PN
