NAGSUGOD na sang hapon sang Hunyo 30 ang pagpangalagad sang bag-o napilian nga mga opisyales sang barangay kag sang Sangguniang Kabataan.
Sa ila mga kamot ginatugyan ang kahimtangan sang tagsa ka barangay bangud sandig sa kalidad sang ila serbisyo nakadepende ang kauswagan nga dapat mabatyagan sang tagsa ka pumuluyo.
Ang barangay nga basic political unit, nagaserbe nga panguna nga taghimo sang plano kag tagpatuman sang mga polisa sang gobierno. Diri sini ginalauman ang pagkasampaton sang mga punong barangay sa pagdumala kag pagpalakat sang affairs sang ila natungdan nga barangay sa bulig sang mga barangay kagawad, sang mga lupod kag mismo sa suporta sang mga pumuluyo.
Yara sa mga opisyal sang barangay ang otoridad bangud sa ila ang mandate sa pagpahamtang sang public order kag pagseguro sang protection sang kabuhi sang tagsa ka miembro, kahilwayan kag propriedad.
Nagatampad sa mga opisyales sang barangay ang pagdula sang illegal drugs. Indi malipod nga sa sulod sang duha ka tuig na karon nga pagpamuno ni Pangulong Rodrigo Duterte, ang kampanya kontra sa illegal drugs ang priority sang iya agenda. Dako nga hangkat ang pagbunggo kontra sa na-entrenched na nga galamay sang mga sindikato sang illegal drugs. Ginalauman nga ila ini dulaon sa ila area sin-o man ang yara dira kay kon indi mabutang sa listahan sang mga narco barangay ang ila ginapamunuan nga barangay.
Ang Punong Barangay amo ang hepe ehekutibo sa barangay government gani sa iya ang gahum (nga nasaad sa Local Government Code) sa pagpatuman sang tanan nga kasuguan kag ordinansa sa sulod sang iya barangay. Sarang man siya makipag-negotiate ukon magsulod sa kontrata sa ngalan sang barangay nga ginapamuan apang sa pagpasugot sang sangguniang barangay. Lakip sa iban nga katungdanan niya amo ang pag-preside sang sessions sang Sangguniang Barangay, ang paghanda sang budget, ang pagpamuno o pag-organize sang emergency group sa panahon sang emerhensya, ang pag-disburse sang kuarta sang barangay suno sa ginapanugyan sang kasuguan, pag-amlig sang environment, pagpalab-ot sang basic services sang mga pumuluyo kag madamo pa nga iban nga katungdanan.
Sa paglab-ot sini matalunsay nga pagpamuno, may nagakaigo nga kuarta ang barangay nga sarang magamit suno sa ginamando sang kasuguan.
Yara man sa gahum sang Barangay Captain ang pag-supervise sa Sangguniang Kabataan sa iya jurisdiction bisan pa nga may kaugalingon may nga pamalakat kag independent nga personalidad ang SK.
Karon nga ginbalik na ang SK, ginalauman nga makahimo man sila sang ila mga programa para sa ila mga constituents kag mahatagan sang nagakaigo nga serbisyo ang sector sang mga pamatan-on.
Honesty, trust and reliability ang kinaiya nga dapat yara sa mga lider sang pamatan-on, kon si Iloilo City mayor Jose Espinosa III pa ang pahambalon.
Panginbulahan sa tanan nga mga opisyales sang barangay kag SK. Handum namon ang inyo kadalag-an. Kabay nga inyo mauyatan sing husto ang pagsalig nga ginhatag sa inyo. (runjirjamolo@gmail.com/PN)
