Nagasakripisyo sila paagi sa boluntaryo nga pagtuman sa katungdanan. Nangin talawgon na sang ila pumuluyo sa kon ano man ang nagakahinabu sa ila lugar. Nagabantay sa palibot agud mapabilin ang kalinong kag katawhay, lakip ang pagpulaw sa kada gab-i agud kampante kag mahamook ang tulok sang mga residente.
Mas pa gid nga nagsakripisyo sila sang nagpaidalom na sa community quarantine agud nga mapunggan ang paglaton sang COVID-19.
Nakita sang tanan kon paano nagasakripisyo sa panahon sang pandemya ang mga Barangay Tanod.
Sadto pa sang 2015, ginduso na ni Second District Board Member June Mondejar nga hatagan sang benepisyo kag insentibo ang mga barangay tanod sa probinsya sang Iloilo agud nga may inspirasyon kag may motibasyon sa pagpadayon sang ila katungdanan sa barangay.
Paagi sa 13th Iloilo Sangguniang Panlalawigan, liwat sini nga ginduso kag natigayon nga mapasar ang ordinansa tuhoy diri. Lauman na sang mga barangay tanod ang benepisyo kag insidentibo nga para gid sa ila.
Ginpahayag ni 2nd District Board Member June Mondejar nga luyag niya nga maapresyar ang serbisyo nga ginahatag sang mga barangay tanod ilabi na nga sang community quarantine sila ang nagbulig sa mga checkpoint, sa pag-ronda,pagtukod sang mga quaratine facilities, kag pagbantay sa mga ginapaidalom sa quarantine.
Nangin salaligan man ang mga barangay tanod sa pagpatuman sa mga ordinansa kag naga-upod sa kapulisan kag barangay officials sa pagpatuman sini.
Ang maka-avail sang benepisyo kag insentibo amo ang mga aktibo nga katapo sang barangay tanod nga naga-perform sang duty kag function, may identification card nga pirmado sang ila punong barangay, liga ng mga barangay president sa ila banwa, municipal/city mayor, kag ang ila pirma ang makapamatuod nga sila aktibo kag naga-perform nga barangay tanod.
Pagabasehan ang listahan gikan sa Department of Interior and Local Government ukon DILG kon sa diin kapin sa 20,600 ang barangay tanod sa probinsya sang Iloilo kutob sang Hulyo 30, 2020 kag ini ang sandigan sa paghatag sa ila sang first release sa Disyembre kag masunod nga releases sang financial assistance.
Bisan gamay lang anay sa panugod tubtub nga makatupong ang kantidad sa masunod nga mga tuig.
Wala sang problema sa pondo sa karon bangud nasugilanon na sini kag nagpasalig na sa iya si Governor Arthur Defensor Jr. nga matigayon ini nga benepisyo kag insentibo para sa mga barangay tanod.
Ginsiling sini nga bisan indi kaanay sa kantidad nga ginabaton sang mga Barangay Health Worker kag Barangay Service Point Officer ang mabaton sang barangay tanod apang ang importante nga may yara sila sang mabaton nga makabulig sa ila.
Ginsiling sini nga magluwas sa financial assistance, may yara pa gid sang free legal assistance agud makatabang sa ila sa tion nga may ginapangatubang nga problema sa legalidad sa pagtuman sang ila katungdanan, may medical kag dental assistance sa mga pasilidad nga ginapanag-iyahan sang provincial government, prayoridad ang ila kwalipikado nga kabataan kon naga-apply sang trabaho sa job fair nga ginapatigayon sang Public Employment Services Office ukon PESO, libre sa paggamit sa mga pasilidad sang provincial government, may loyalty service incentive, kag AICS ukon Asistance to Individual in Crisis Situation ukon bulig engkaso nga mahalitan ang ila balay kon may kalamidad.
May pagabatunon man financial assistance ang mga nakaserbisyo sang kapin sa 10 ka tuig tubtub 40 ka tuig kon sa diin sa tagsa ka 10 ka tuig may yara sang kantidad nga napain para sa ila.
Matuod nga indi tuman ka daku nga kantidad ang ila madawhat gikan sa Iloilo Provincial Government apang ang isa ka panid nga papel ukon sertipikasyon nga ila mabaton nga pamatuod sang ila dedikasyon kag wala mantsa nga pagserbisyo ang mas labaw sa kantidad nga ila batunon.
Ginakabig man sila nga front liner, sa panahon nga matawhay kag may pandemya, sila ang una nga nagaresponder kag nagarisgo.
Nahibaluan nga ang Proposed Provincial Ordinance No. 2020-08-11 may tigulo nga “An Ordinance Granting Benefits and Incentives to the Members of Barangay Tanod and Providing Funds Thereof (Repealing for the Purpose Provincial Ordinance No. 2015-119, ‘An Ordinance Granting Benefits and Incentives to the Registered Members of Barangay Tanod and for Other Purposes’)” ang ginaduso ni 2nd District Board Member June Mondejar kag pasado na sa Third and Final Reading sa 59th Regular Session sang Sangguniang Panlalawigan.
Nagakaangay nga dumdumon, balikdon kag talupangdon ang kahimtangan sang mga barangay tanod sa probinsya sang Iloilo.
Matuod nga boluntaryo ang ila pagserbisyo apang angay nga pasalamatan paagi sa sini nga mga insentibo kag benepisyo. Makahatag ini sang dugang nga inspirasyon sa ila trabaho agud nga mas mangin mahugod kag mas responsable.
Lauman naton ang ila dedikasyon kag serbisyo nga wala sang pagpang-alang-alang bangud nakahibalo sila nga may lauman sila nga bulig, ilabi na ang free legal assistance, kag libre nga medical kag dental assistance.
Mabatak na ang kahimtangan sang mga barangay tanod. Malipay na sila bangud sa ginhatag nga pagtalupangod. (bertladera@gmail.com/PN)
