Ni Cyrus M. Garde
Syudad sang BACOLOD – Ginsabyahan sang gasolina kag gintutdan sang 35-anyos nga amay ang iya 15 anyos nga bata nga babae sa ila balay sa Brgy. Vista Alegre sining syudad sang tinalikdan nga Biyernes sang aga.
Ang bata naka-angkon sang sunog sa liog kag wala nga kamot kag ginpadangat sa Corazon Locsin Montelibano Memorial Regional Hospital agud bulngon.
Sunu sa amay, naakig sia sa panabat sang iya bata sang ginhambalan niya ini nga mag-eskwela. Dugang sang amay nga indi niya hungod ang pagtutod sa iya bata, apang gin-aku niya nga nabulagan sia sa panabat sini kag iya ini nasabyahan sang gasolina nga nasulod sa botelya sang cologne spray.
Ang amay nga isa ka manog-kaayo sang sapatos ginpa-priso sa Police Station 7 apang ginpagwa pagka-Sabado.
Daku naman ang paghinulsol sini sa natabo kag nangayo sang pasensya sa iya bata./H
