NAGAKADUSLI ang nagadali. Ini ang hurubaton nga ginapatudok sa aton sang katigulangan. Ang tanan nga bagay nga ginadalian ukon ginapadalian ang mangin marugawraw, indi manami ang resulta kag indi paborable para sa nag-obra.
Sa karon nga panahon nga tuman ka dasig, lunsay nagadali, lunsay luyag lang ang mahapos, yara ang teknolohiya nga isa lang ka paglab-ot nga makahatag sang bulig sa mga ulubrahon.
Matuod nga ang teknolohiya makapadali sang obra, apang ang sobra nga pagsalig kag sayop nga pag-apresyar sa mabulig sang teknolohiya nagatuga sang mas malala nga epekto kag makabig nga nagapa-inutil sa tawo.
Ginasiling nga ang moderno nga hulot-klasehan isa ka hulot nga selyado, mabugnaw bangud sa aircon, may yara sang projector imbis nga pisara, kag ang tanan nga pagtulun-an ang ginapaagi na lang sa power point presentation agud mahapos para sa nagatudlo kag para sa ginatudluan.
Sa medyo indi pa mas abanse ukon may ikasarang nga buluthuan, nagamantenir sila sang white board bilang tal-os sa pisara nga chalk ang ginagamit bangud sa malain nga epekto nga matuga sa paghaklo sa pulbos sang chalk.
Bisan pa nga moderno ang hulot-klasehan ukon kaangay sa kinaandan, apang indi dapat pagkalipatan nga ang mga estudyante ang pasulaton agud nga magtuon kag ang ila pagginawi ang ila madala sa ila pagtigulang.
Matuod nga makapoy ang magsulat ukon magkopya sa nasulat sa pisara ukon sa whiteboard, ukon sa ginapakita sa projector, apang ang pangmalawig nga maayo nga epekto sini sa tawo amo ang dapat nga konsiderahon sang nagatudlo. Ang pagsabat sa mga pamangkot dapat isulat kag indi pag-i-type sa computer kag ipasa nga ginpaprinta na, magluwas lamang sa mga final output.
Suno sa pagtuon ni Dr. Arnold Glass, ang nagapanguna nga manugpanalawsaw para sa pagtuon kag isa ka propesor sang sikolohiya sa Rutgers University sa New Jersey sa Amerika, nga ang cellphones kag laptops makatublag sa mga estudyante sa sulod sang hulot-klasehan kag ang paggamit sang electronic devices makapanubo sang ila nga grado.
Guntan-an ang mga epekto sang natunga nga atensyon sang mga tawo kag kahibalo ang mga siyentipiko nga kon ang atensyon matunga sa duha ka katungdanan, ang pila ka mga bagay may kaantanan sa sini nga katungdanan ang mahimo lang madumduman sa ulihi kag ang ini nga konsepto ang gintawag nga ‘retention’ sa sikolohiya.
Dugang sa pagtuon nga ang electronic devices makapabuhin sa abilidad nga makapaminsar ang isa ka tawo kag suno pa sa pagtuon gikan sa Stanford University nga ang lubos nga multitasking makapabuhin sa ka-episyente sang pagkumpleto ukon paghuman sa gintugyan nga katungdanan.
Maathag nga mapahapos sang teknolohiya ang aton obra kag bangud sa konsepto nga mahapos na, mas ginadugangan ang aton ulubrahon kag mas nagakaapektuhan aton pagtuman sini.
Sa akon personal nga eksperyensya, bisan sa klase namon sa Masteral kag sa Doctoral, ginaduso ko gid nga dapat magsulat kag sulaton ang tanan agud nga mas magpagkit sa paminsaron ang mga leksyon kag ginatalakay nga topiko sa sulod sang hulot-klasehan.
Aton panumdumon ang benepisyo sang pagsulat labaw sa reklamo nga makapoy./PN
