SA KARON, naga-problema gihapon si Presidente Duterte kon sin-o ang ibulos niya bilang Chief PNP sa lugar ni anay police chief General Oscar Albayalde.
Si Albayalde nag-resign sadtong Oktubre 14 samtang manug-retire pa tani sa Nobyembre 8, 2019.
Nag-resign ini pagkatapos sang iskandalo angot sa pag-recyle, ukon pagpalapaw, sang mga 160 ka kilo sang illegal drugs sa isa ka pag-raid sa Mexico, Pampanga sa tion nga siya ang provincial police chief sadtong 2013.
Gin-akusaran siya sa pag-cover up kag pagbutang pa sa key positions sang 13 ka pulis sa idalom niya, nga ginhingadlan sang media bilang mga “ninja cops”.
Tungod man sini, na-dismiss siya sadtong 2014. Ugaling na-dismiss man ini nga kaso batok sa iya kag nangin Chief PNP pa siya bilang tal-os kay anay PNP Chief Ronald dela Rosa, nga karon senador na.
Na-ungkat ang kaso ni Albayalde sa budget hearing sang Setyembre tubtub Oktubre sang sining tuig, sa diin gin-akusaran pa gani siya nga naka-remedyo sa ginpalapaw nga illegal drugs.
Nag-resign si Albayalde sadtong Oktubre 14, 2019, sa nasiling ta na, samtang manug-retire tani sa Nobyembre 8, 2019 pa. Tungod sini nadula na ang administrative case niya, samtang nagapabilin ang posibildad nga ma-paylan siya sing criminal case kon may bastante nga ebidensya kontra sa iya.
Na-frustrate gid si Presidente Duterte sa ining kaso ni Albayalde kay daku nga tap-ing ini sa imahen kag pag-respeto sa kapulisan.
Gani, daw indi na kahibalo si Presidente kon sin-o ang iya tugyanan sa pwesto sang Chief PNP.
Sang sini lang, sadtong Disyembre 3, nagpautwas na si Presidente sang iya daku nga pagka-dismaya kag nagpabutyag sa tri-media nga ang luyag niya nga Chief PNP amo ang nagatakam-takam gid sa pagpatay sang mga druglord.
Wala maluyagi ini sang mga human rights advocates tungod yara sa ila pensar ang ila akusasyon sa madamo nga “extrajudicial killings” sa idalom ni Presidente Duterte.
In fact, sin-o man abe ang matarong nga Kristiyano nga luyag sini (luas lang kon maimpitu)? Kag indi lang tungod sa ila pagtaha sa sugo sang Diyos nga “Indi ka magpatay” – luas lang sa self-defense kag pag-apin sa mga tawo nga wala inugbato, lakip ang just war. Yara man ang aton Konstitusyon nga naga-requirer sang pagpatuman lang sang Rule of Law kag paghatag sang tsansa sa pagpanibag-o sang mga nakasala kon pwede pa lang.
***
Sa karon, ang yara sa shortlist sa mga kandidato sa pagka-PNP chief amo sanday Lt. Gen. Archie Gamboa, Lt. Gen. Camilo Cascolan nga isa ka Ilonggo, kag si Major Gen. Guillermo Eleazar.
Ang pag-appoint sa bag-o nga Chief PNP kon sundon ang luyag ni Presidente Duterte nga manugpatay ini sang mga druglord, nagapadumdum sa aton sang berdugo ni Hitler – si Reinhardt Heydrich, ang chief sang Nazi Reich Main Security.
Gin-describe siya nga “…no hate, no disgust, just the cold calculation of how to best rid of them (lakip ang sobra isa ka milyon nga mga Jew nga ginpapatay ni Hitler sa iya paagi sa gas chambers)…and that frightened everyone!”
Kon amo man lang ang pagkilala sa akon bilang bag-o nga Chief PNP, indi ko ya pagbatunon inang pwesto – bisan ipapatay pa ako ni Duterte!
Ang maayo nga Chief PNP dapat maka-Diyos, honesto, kag advocate sang Rule of Law, nga amo lang ang pwede pagkilala sa akon, kon ako ang Chief PNP. Indi bilang Berdugo, ukon Chief Executioner! (w_mateojr@yahoo.com/PN)
