SA TUNGA sang wala untat nga pagsaka sang numero sang mga nagpositibo sa COVID-19, nagatuhaw man ang bag-o nga sakit. Ini amo ang sakit nga “Binasolay”.
Ang pagpamasol sakit gid sang tawo kun madakpan ang kapaltahan. Apisar nga may balasehan man ang pagpamasol, ngaa abi indi anay paghatagan sang sabat ang problema antes ipasa ang salabton sa iban?
Halimbawa diri ang viral nga post sang pamilya sang isa ka iloy nga nagbata sa St. Therese Hospital nga karon quarantine facility sang syudad. Alegasyon sang pamilya, ginpabay-an ang babaye gani nagbata ini nga wala sang pag-alalay sang doktor ukon midwife man lang.
Siling sang syudad napilitan lang sila nga ibutang sa ila pasilidad ang babaye bangud wala sang hospital nga magbaton sa iya mentras indi pa manuggguwa ang bata sa iya taguangkan. Tuman man ka balingag nga rason.
Ang pagbun-ag indi mo mapaktan kun san-o. Bisan ang doktor nagahatag lang sang pagbanta sang petsas anto man sa ginasugid sang iloy kun san-o natapos ang iya katapusan nga regla. Indi gani mapaktan kun san-o ka abuton sang imo palamus-unon ayhan pa ang pagbun-ag.
Ini nga hitabu nagapakita sang mga kakulangan sang atun gobyeno sa pagresponde sa kaangay sini nga sitwasyon. Sa malawig na nga binulan nga naatubang ini nga problema, ang pamunuan nasyonal wala gid nakadihon sang protocol para diri?
Madamo na nga mga lapsag kag iloy ang napatay bangud sang hugot nga pagsunod sang COVID protocol nga indi basta magbaton sang pasyente kun wala negative RT-PCR test result. Masubo batyagon nga sa tagsa ka matabu ini, mansig lang tinudluanay kag binasulay.
Tapuson na ang binasolay, himuon ang nagakadapat para sa publiko.
Samtang, indi man siguro magsakit ang atun buot kun mabasulan kita ngaa nagalala ang kaso sang COVID-19 sa syudad sang Iloilo.
Sa report sang Iloilo City Police Office (ICPO) kay Mayor Jerry Treñas sa tion sang Iloilo City Peace and Order Council Meeting, nakita ang tuman ka damo nga nagalapas sang pagsulondan sa minimum health protocols.
Sa 808 ka operations para sa curfew, 428 ka tawo ang ginlaygayan kag ginpaandaman; isa ka naglapas ang ginmultahan, anom ang arestado para sa inquest sa paglapas sang curfew ordinance kag duha man ang arestado para sa inquest bangud sang disobedience.
Ginreport man sang ICPO nga may 210 ka tawo ang ginpaandaman kag 152 ang ginmultahan bangud sa indi pagsoksok sang facemasks kag 279 ka tawo man ang ginpaadaman bangud sang indi pagsoksok sang face shield.
Samtang, 374 ka tawo ang ginpaandaman sa paglapas sang physical distancing kag 19 ang ginmultahan.
Onse naman ka tawo ang naglapas sang quarantine prtocols.
Bisan manubo man ang ratio sini sa atun total population, ginapakita sini ang pagpatumbaya sang tawo. Wala sang paghalong kag wala nagatuman sang mando bisan pa ini para sa ila kaayuhan.
Ayhan husto man nga basulon kita sa atun kapatumbayaan.
Pahanumdom lang nga mataas na ang multa sa magalapas sang Regulation Ordinance (RO) No. 2020-085 “Amending the Penalties of RO No. 2020-061 Mandating the Wearing of Facemask or Face Covering in Public During Pandemic Period to Increase the Fine and Include the Community Service.”
Una nga paglapas: P1,000 ang multa ukon walo ka oras nga community service kada adlaw sa sulod sang tatlo ka adlaw.
Ikaduha nga paglapas: P2,000 nga multa ukon walo community service kada adlaw sa sulod sang tatlo ka adlaw.
Kag ikatatlo nga paglapas: P5,000 nga multa ukon walo ka oras nga community service kada adlaw sa sulod sang lima ka adlaw.
Tanan ini depende sa korte. Mahimo pa nga duha gid ang imo mangin silot.
Teh, masinabad ka pa?/PN
