PAGSAMPOT mo pa lang sa Cagban Port, ang mayor nga entry point sa isla sang Boracay, sug-alawon ka dayun sang ginatawag nila nga Boracay Icon – isa ka tarpaulin nga nagapakita sang mas matahum kag matinlo nga Puka Beach.
Kun magbyahe ka naman, magasakay ka sa mga e-trike kag magalabay ka sa mas ginpasangkad nga mga dalan. Ini ang bag-o nga nawong sang isla makaligad ang anom ka bulan nga pagpasarado.
Oktobre 26, ginbuksan liwat ang isla sa mga bisita. Ginpakita ang Boracay nga kun sa mga hulubaton pa, “liwat ginbun-ag.”
Liwat ginbun-ag bangud sa kadamo sang mga ginbag-o kag ginkaayo. Handum nga mas magahatag ini sang matahum nga experience sa sin-o man nga magbisita sa isla.
Antes magpauli, ginlibot namon ang bug-os nga beachfront tubtob sa Station 1 gikan sa Station 3 kag nakasugilanon ang mga una nga nagbisita sa isla. Siling sang mga manunudlo gikan sa Ibajay West, sang una kun magpungko ka sa beachfront sa atubang sang mga restaurants nagahambal ang mga waiters nga indi pwede kay naka-reserve na kuno. Apang subong hilway na nga makapungko sa balas sa beachfront. Wala na sang nagapahalin bangud ginapatuman ang easement gikan sa baybay.
Indi mahimutig nga madinalag-on ang desisyon sang gobyerno nga pasaraduhan ang Isla.Ugaling madamo naman ang nadulaan sang palangabuhian. Madamo sa mga pagbag-o nga ipatuman nga ginapatihan mas makapaayo sa sitwasyon sang isla.
Ginapatuman subong ang hugot nga pagsulondan nga kun wala ka sang booking sa mga hotels sa isla, indi ka pwede makatabok. Maluwas lang kun may himata ka ukon kilala nga makapamatuod nga mahatagan ka niya sang ilistaran sa ti-on sang pagbisita. Indi naman pwede makalibod sang pagkaon sa beachfront. Ginadumili naman ang mga masahe kag fire dance lakip na ang mga sand castles. Mabudlay nga mga pagsulondan bangud may palangabuhian nga naapektuhan apang makapaayo naman sa isla sa pangkabilugan.
Madamo pa sang dapat himuon sa isla agud mas mapaayo pa gid ini sa maabot nga mga inadlaw. Kabay nga indi lang ini magatapos diri. Dako ang mabulig sang mga Envinronment Warriors kag Kaligkasan Volunteers. Pero mas dako ang mabulig sang mga ordinary nga residente kag torista sa pag-amlig sa katahum sang isla.
Ginkumpermar sang mga nagapaninlo sa isla nga madamo sa gihapon sang nagalinapta nga plastic nga basura. Buot silingon madamo sa gihapon ang wala nakatuon sang ila leksyon. (jpranco1975@gmail.com/PN)
