Bulatsing lang gali ni Presidente Duterte

BULATSING ang kinalye nga tawag sang mga kabataan diri sa aton sa tawo nga gahinambog lang sang sugid nga indi mapatihan.

Siling sadto ni Presidente  Duterte nga masakay siya sa jetski agud itanom ang aton bandera sa isa ka isla sa West Philippine Sea.

Wala siya nagsiling kon ano nga isla, pero basi ang ginatumod ni Presidente Duterte nga isla amo ang Scarborough Shoal, nga papwersa nga gin-agaw sa aton sang China sadtong 2012, nga isa ka daku nga bato nga naga-ulhot sa dagat mga 120 ka milya halin sa Luzon kag Palawan nga nahamtang sa aminhan (north) nayon sang WPS.

Gintunaan ini sang pag-file naton sang kaso sa Hague Tribunal sadtong 2013, nga gindaug naman naton sadtong 2016 kon diin gin-confirmar sang Hague Tribunal ang aton “full sovereign rights” sa  200-nautical mile nga Exclusive Economic Zone nga gin-assign sa aton sang UN Convention on the Law of the Sea, ukon UNCLOS. Una nga ginpirmahan kag gin-ratify ining UNCLOS sang 164 ka pungsod, lakip gani diri ang Filipinas kag China. May 14 nga dugang nagpirma, ugaling nagahulat pa sang ratification.

Ang aton Constitution nagasiling man nga ang ining EEZ para lang sa “exclusive use”, kag wala na sing iban, sang mga Filipino.

***

Wala ugaling matuman ining paisug-isog nga pabutyag ni Presidente Duterte tubtub sa karon, mga apat ka tuig na ang nagligad. Gin-ungkat ugaling ini sang pila ka interesado sining ulihi lang.

Hinambog, ukon bulatsing, lang bala ini ni Presidente Duterte agud lingawon lang ang mga pumuluyo, ukon seryoso gid man ini agud ipakilala sa China nga aton ining isla kag wala sing makaupang sa aton agud kadtuan ini kag angkunon?

Indi kamo magpati seguro pero madamo ang nagpati sa sining paisug-isog nga pabutyag ni Presidente Duterte.

Isa lang kuno ato ugaling ka campaign bravado, ukon pahambog, sa kampanya sadtong pagpadalagan niya sa pagka-Presidente. Ang mapati kuno sadto mga “stupid”.

“Paano abe ako makalab-ut dira sa kalayo sadto, mga 150 ka milya ang layo. Sa kalayo sadto mahubsan sing gasolina ang jetski ko; kag basi mahulog ako kag malumos, nga daan indi ako kabalo maglangoy…” siling pa niya.

Sus, mga istupido gali kita sa pagpati sa sining paisug-isog nga pabutyag ni Presidente Duterte. Ayhan?

Tungod sa ginpakita nga kaisug ni Presidente nga bisan ang Diyos gintawag niya nga “stupid” kag gin-mulay man si Pope Francis nga lider sang mga sobra isa ka bilyon nga katoliko sa bug-os nga kalibutan, sin-o man abe nga ordinaryo nga pumuluyo ang indi magpati nga mahimo ini ni President Duterte bisan pabuang-buang lang?

Ako gani nagpati man nga mahimo niya ini, pero, excuse me, indi ako “stupid”, ukon kadlawan kamo sang nakakilala sa akon.

Paano? Simple lang. Sakay ka anay sa coastguard boat upod ang jetski tubtub malapit na gawa sa isla, dayon ihulog ang jetski sa dagat kag sakyan ini pakadto sa isla nga may sobra pa nga gasolina. Indi bala?

Kon matabo ina, luyag man gani makita sang mga pumuluyo kon paano ni President Duterte ipilit nga magdungka sa isla kag himuon ang iya plano nga itanom ang aton bandera dira. Masadya (nga indi masadya) seguro ang matabo.

Wala man seguro nga soldado sang China ang maghalit kag magpatay kay Presidente Duterte kon ipilit niya himuon ang ginaplano niya himuon.

Aba, may Mutual Defense Treaty kita sa United States, kag ang himuon nga pagpatay kay Presidente Duterte magadabuk lang sang gyera sa tunga sng China kag United States, nga segurado indi luyag matabo sang China.

Ang matabo seguro amo nga ulu-uluhan lang si Presidente Duterte nga indi gid ini pagahimuon kag pabalikon lang ini sa coastguard boat agud makabalik puli. Indi bala?

Kag, siyempre, labi pa gid ang pagdayaw sang mga pumuluyo sa iya. Ugaling lang kay bulatsing lang gali ining paisug-isog nga pabutyag ni Presidente Duterte.  Sus, a!/PN