UNAHON ta anay ang aton panamyaw nga: A HAPPY AND BLESSED NEW YEAR TO ONE AND ALL!
***
Tarso gid ining abyan naton nga si Pedro. Gapamangkot siya kon ano gid ang pinaka-seksi nga parti sang babaye.
Katigulang na sini ni Pedro pero kon ano pa ang iya ginapang-usyosohan.
“Ti, ngaa amo gid ina ang imo gina-intresan?” pamangkot naton, “Daw indi ka naman pwede kay pareho na kamo nga laos ni Misis?”
“Basta lang,” pilit niya nga sabat nga ang rason indi naton matungkad.
Okey, kundi pasugtan. Siling ko sa iya nga indi kinahanglan nga ang babaye medyo maniwang kag nagahabyog ang balikawang, ukon tambok nga nami pisil-pisilon ang maunod nga pisngi, ukon naka-bikini kon diin madamo dira sa beach nga ginabandera pa nila ang malaw-ay nila nga forma.
Kon parti naman sa hublas nga lawas sang babaye, indi man ina makahatag malisya sa nars kag doctor kag sa mga painting artists kag enthusiasts nga luyag lang mag-admirar sang matahum nga lawas sang babaye nga indi kinahanglan malisyahan.
Ga-click na sa akon ang gapangagda nga bibig (katulad sang iya ni former French actress kag animal rights activist Brigitte Bardot) kag gayuhom nga mga mata sang leading lady sa Jack & Jill sitcom sa TV 5.
In fact, aware sini ang mga babaye kon ngaa kon ano na lang ang ginahimo nila sa ila mga mata, labi na gid ang pagpabayod sang ila mga amimilok agud ma-attract ka sa ila mga mata.
Of course, para sa akon, mas importante gid nga mapalanggaon siya nga ang bisan gamay lang nga pagpakita sang pag-angga gapukaw na sang imo balatyagon, labi na gid sa inyo paghanda sa pagtulog, he-he-he!
Hinali lang nagsaligbat si Pedro. “Kumporme ako sa imo nga ang pinaka-seksi nga parti sang babaye amo gid ang mata,” siling niya.
Nadumduman ko dayon si Frat Sis Sanchez nga converted Muslim, nga ang kadalagahan sa pila ka pungsod Muslim may tabon ang nawong nga mata lang ang nagagwa sa publiko tubtub indi pa makapamana.
***
Kabahin na naton ang traditional jeepney sa madugay na nga panahon, kag daku ang naamot sini sa aton kasaysayan.
Na-remodel ini halin sa army vehicles nga ginbilin sang US forces pagkatapos sang WW2 sadtong 1945.
Showcase ini sang Filipino ingenuity kag resourcefulness, nga gina-patronize sang low- to middle-income nga mga pasahero, nga tungod sini dapat ipabugal naton. Kag i-preserve katulad sang mga heritage home sang mga manggaran nga nagapakita sang arckitektura sang nagliligad, nga ginapilit naton i-reenforce agud mapabilin sa panghuna-huna sang mga ulhing tubo.
Indi kay basta i-phaseout na lang ining salakyan sa pag-abot sang Disyembre 31, 2023! Madugay nga mapuslanon ini sa mga kubos sa bentaha sini. Gamay ini ikumparar sa mga mini-bus nga amat-amat nagadalagan na sa madamo nga dalanon diri sa pungsod.
Tungod gamay ini madale mapuno kag mas madale maghalin agud dalhon ang mga pasahero sa mas madasig man nga pag-abot sa ila kaladtuan.
Ikumparar ini sa gina-proponer nga modernized nga jeepney nga ang hitsura daw sa traditional jeepney, ugaling kay mas daku ini.
kag may dugang nga upgraded features katulad sang mas mataas nga atop agud maka-akomodar sang dugang nga pasahero nga pwede makatindug sa tunga. May environment-friendly man nga Euro-5 engine. Ang iban pwede ma-convert sa e-jeepney nga ginapadalagan sang kuryente kag wala nagabuga sang makahililo nga greenhouse gas (GHG) nga nagatuga sang Global Warming nga nagadala sang mas mabaskug nga mga bagyo kag kainiton nga sobra sa indi kinaandan.
Ang reklamo – labi na gid sang myembro sang PISTON kag MANIBELA nga nag-tigil pasada gid – amo ang sobra ka mahal sang pagpatukod sini nga nagadangat sa P1.5M tubtub P2M, samtang pwede naman baklon ukon utangon ang bagay nga makina nga Euro 4 nga sadto gina-rekomendar sang LTFRB sa mga traditonal jeepney nga okey pa man ang kaha (body).
Ang ginabulig nga subsidy sang gobyerno sa modernized jeepney amo lang ang P160,000 nga kulang kaayo kay sobra sa mga PhP1M pa ang balayran sang mga jeepney owners nga madamo dira mga kubos.
Ano abe kon ihatag man ining subsidy sa mga tag-iya sang traditional jeepney nga maayo pa naman ang kaha kag makina lang dapat islan? Seguro naton nga kaya nila bayaran ini sing utay-utay sa husto nga kalawigon nga ila masarangan.
Kon mapasugtan ini, matagaan naton ang kadam-an nga pasahero sing mas manubo nga pamasahe kag mas madasig nga byahe sa ining traditional jeepney, nga dapat ta man dumdumon katulad sang mga heritage home sang mga manggaran./PN
