NATAPOS na ang pag-file sang certificate of candidacy nga malinong kag matawhay sa bug-os nga rehiyon, ilabi na sa syudad kag probinsya sang Iloilo.
Kadamuan sang mga nagparehistro agud nga magpapili amo yadtong mga kinaandan na nga mga pulitiko nga may dalagku nga ngalan sa patag sa pulitika. Wala na kita natigala sini. Apang may mga kandidato man nga indi pamilyar sa aton, wala sang dinahum-dahom nga hinali nagtuhaw sa opisina sang Comelec kag nag-file sang ila kandidatura kag sila ang mga wala ginalauman apang nagpapagkita sang ila ngalan sa listahan.
Madamo sang mga nagparehisto sa una nga adlaw kag may iban naman nga sa pinaka-katapusan nga adlaw nagdesisyon nga magparehistro, nga ang iban bangud sa hinali nga desisyon.
Kon kaisa makahalam-ot man paminsaron apang ang aton kultura kag panimad-on ukon lihi sa mga bagay ang naga-impluwensya sa paghimo sang aton mga desisyon. Madamo sang mga kandidato ang nagapili sang angay nga adlaw, sang kombinasyon sang numero nga makahatag sa ila sang swerte sa ila pagpasimpalad sa patag sang pulitika.
Natapos na ang ginabantayan nga pag-file sang certificate of candidacy apang mas balantayan ang mga adlaw antes ang Nobyembre 29, 2018 kon sa diin may lauman kita nga mga hitabu nga makapasorpresa sa aton tanan.
Kon nagkatingala kita sa mga persona nga nagparehistro sang ila kandidatura, mas matingala kita kon may pagbuslanay sa ila pwesto nga ginpadalaganan. Ini ang mas balantayan, ini ang mas puno sang sorpresa kag ini ang mas makapakibot sa tanan.
Gintuad ni Atty. Elizabeth Doronila ang Provincial Election Supervisor sang Comelec – Iloilo nga mahimo mabuslan ang nagparehistro nga kandidato sa isa ka pwesto sang kaupod niya sa partido.
Nagakahulugan ini nga pwede sila makaparehistro sa ila naluyagan nga pwesto apang mahimo nga may yara sang magasalili sa ila sa pag-abot sang husto nga tion. Makabig nga istratehiya ini sang mga kandidato nga may ginalantaw nga konsiderasyon sa ila pamilya, sa ila tagasuporta, sa ila kaupod sa partido kag sa ila mga kaalyansa nga partido.
Sa simple nga pulong, indi pa pinal ang tanan. Mahimo pa nga magligwat pag-abot sang husto nga tion. Posible nga ginahimo lamang ini nga tilawan ang reaksyon sang mga botante kon nagakomporme sila sa kandidato sa sina nga pwesto ukon may magabuylog sa iya gikan sa iban nga grupo.
Posible man nga ginahimo lamang ini agud nga patalangon ang iya mga kasumpong, pasalahon, kag liputon agud nga indi makapanghanda sang lubos batok sa iya.
Pagkatapos sang Nobyembre 29, 2018, lauman naman ang pagbulos sang kandidato sa iya kaangay nga kandidato nga may kapareho nga apelyido nga nagtaliwan ukon gin-disqualify. Ang ini nga sitwasyon makabig nga tumalagsahon bangud wala man ginadahom sang tanan nga may magtaliwan nga kandidato apang posible nga hingabuton agud ma-disqualify. Kag ang ini nga kaso ang mahimo matigayon nga mabuslan tubtub sa alas 12:00 sang udto sa mismo adlaw sang piniliay.
Lantawon naton ang pagtukal sang ila alukaba kag kon paano sila mag-ilis sang ila panit agud nga matigayon ang buslanay sa pwesto./PN
