MALABA ang pila sang mga luyag magsakay sa pumpboat padulong sa Jordan wharf agud nga makasaksi sa mga kahiwatan angot sa ginasaulog nga Manggahan Festival.
Ginalauman na sang probinsya sang Guimaras ang pagdugok sang mga tawo bangud man sa kinaandan nga pagpadulong sang mga luyag magpakigbahin sa tagsa ka tuig sa ila nga kahiwatan kag dugang pa diri ang pagsarado sang isla sang Boracay nga ang Guimaras amo ang nagaserbe nga isa sa mga alternatibo nga kaladtuan sang mga nagabakasyon.
May ginasiling nga plano ang Guimaras kon paano matatap kag maatipan ang mga bisita nga magapadulong sa ila probinsya, may gin-imbentaryo nga mga hulot kon pila ang ila sarang nga maakomodar kag kon ano ang iban pa nga opsyon kon engkaso nga kulangon sila sa pag-akomodar sa mga bisita.
Gintalalakay man ang pagpalawig sang tion sang biyahe sang mga sakayan paagi sa paghingyo sang gobyerno probinsyal sa Maritime Industry Authority nga makabiyahe tubtub sa gab-i bisan lagpas na sa gintalana nga oras agud nga maakomodar ang mga luyag magbalik sa syudad sang Iloilo.
Nangin masaku ang tanan, ang ginalauman nga preparasyon ang nalampasan sang aktwal nga kadamuon sang mga nagpadulong nga mga tawo.
Apang ang nag-agaw sang atensyon sang tanan amo ang malawig nga pila sa Ortiz wharf patabok sa Jordan wharf nga may mga pagpalumbaanay sa pila, may nagadinalagan, kag halos indi na mahangpan kon may yara pa sang sistema nga ginapatuman.
Dapat nga tutukan sang provincial government sang Guimaras ang paghatag sang atensyon sa duha ka pantalan sa Iloilo nga ginaagyan sang mga nagapadulong sa ila probinsya. Indi ini mahimo mga patumbayaan ukon pawalaan lamang nga daw sa wala lang labot ang probinsya.
Mas maayo nga maghiwat sang sinapol upod sa duha ka banwa, ang Jorda kag ang Buenavista, lakip ang duha ka barangay sa syudad nga nahamtangan sang mga pantalan agud nga matalakay ang mga problema nga dapat hatagan sang atensyon kag solusyon.
Dapat nila hangpon ang kabudlay sang duha ka barangay sang syudad, hatagan sang bulig santu sa ginasaad sang kasuguan ukon magpakig-angot sa city government agud nga malantaw ang sitwasyon kag kon ano ang angay nga solusyon.
Dapat mag-istoryahanay ang tanan agud nga indi mabutang sa alang-alang ang turismo sang Guimaras kag ang imahen sang syudad bangud nga ang benepisyaryo sa mga nagadugok nga pasahero amo mga salakyan sa syudad sang Iloilo.
Talagsa man lang nga may kaangay sini nga sitwasyon, ilabi na kon may okasyon, apang dapat may yara sang ginapatuman nga sistema sa tagsa ka higayon kaangay sini.
Tion na nga pasangkaron sang Guimaras kag sang syudad sang Iloilo ang ila kaantanan, dapat nga talupangdon ang ila tagsa ka katungdanan, kag kon paano maamligan ang mga pumuluyo nga nagatabok kag kon paano mahatagan sang responsibilidad kag benepisyo ang mga barangay nga nagahimakas sa pagpatuman sang sistema kag kalinong kag katawhay.
Dapat magbiya na sa kinaandan nga gawi kag atubangon ang bag-o nga pagpanghangkat para sa kaayuhan sang mga nagatabok kag ila nga dapat buylugan ang pag-imprubar sang mga pantalan./PN
