DALAYAWON ining hingyo sang siyudad sang Iloilo sa paghiwat sang clean-up, ukon pagpanglimpyo, sang bug-os nga siyudad sang Iloilo sa Sabado, Agosto 18.
Matuod, kon ginatagaan naton sang importansya ang aton personal hygiene kag kalimpyo sang aton panimalay, ngaa indi ta man hiwaton ini sa bug-os nga siyudad?
Ini sa kaayuhan man naton nga tanan, indi bala, lakip na kon ginahimo ta man ini sa adlaw-alaw nga indi paghaboy sang mga basura sa mga dalanon kag kon diin lang? Kon maghaboy man, sa mga trash bins ukon sa mga natalana nga mga basurahan.
Una nga rason dira sa pagpanglimpyo sing ugyon amo nga ang paghimo sang ugyon nga hublag ga-cultivar ini sang civic consciousness sa aton.
Paagi sa civic consciousness, matalupangdan naton indi lang ang aton kaayuhan kundi pati na sang aton kasilingan kag sang aton katilingban sa siyudad.
Sa partikular nga pagpanglimpyo naton sang siyudad, matalupangdan naton nga kon nagapanglimpyo ang tanan, makabulig man ini sa ikaayong lawas sang tanan.
Indi bala maayo isipon nga kita tanan naga-enjoy sang maayong kalawason kag panghuna-huna kag ang magasto naton sa pagpabulong magamit ta pa sa iban nga kinahanglanon sa panimalay?
Sa karon, daku nga negosyo ang turismo, kag ang kalimpyo sang siyudad daku man nga rason kon ngaa makadto diri ang mga turista. Segurado indi ina sila magkadto diri kon ma-basura kag mabaho ang aton palibot.
Nga daan ang siyudad sang Iloilo ginakabig nga isa sang mga gateway sang turismo sa Western Visayas pakadto sa probinsya sang Iloilo, sa Negros Occidental, kag sa isla sang Guimaras.
In fact, kon indi man sila magtener malawig diri, makapahuway-huway anay sila diri sa aton mga hotel kag makaduaw man sa madamo ta nga mga tourism sites.
Ma-proteksyunan man naton ang aton palibot batok sa mga basura nga gabara sa aton mga drainage kag alagyan sang tubig agud malikawan ang pagbaha tungod sa barado nga mga guluwaan sang tubig.
Tungod malimpyo ang aton siyudad kag hilway sa pagbaha, ma-enggayo man naton ang mga investor (negosyante) nga magbutang sang ila negosyo diri. Ina tungod matahum, kay limpyo, ang aton siyudad kag makalikaw pa sila sa perhwisyo sang baha tungod sa gabara nga mga basura.
Kon madamo nga negosyo ang magtindug diri, syempre madamo man ang trabaho sang aton mga pumuluyo.
Tungod kon kis-a a la basura man ang mga ilegal nga istruktura sa mismo nga mga dalanon, mahawanan ta man ang dalan para magsulhay ang trapiko.
Ma-proteksyunan man naton ang aton mga makasaysayan nga mga lugar kag istruktura kon mapabilin naton sila sing limpyo. Indi lang sa basura kundi lakip na ang a la basura nga mga graffiti, ukon mahigko nga mga sinulatan nga ginahimo dira sang mga salawayon nga mga kabataan.
Of course, ma-proteksyunan ta man ang mga dunang manggad naton diri sa siyudad batok sa kahigko sang palibot.
In fact, matahum nga panublion sang aton mga kabataan sa ulihi ang limpyo nga siyudad, indi bala?
***
Ini nga pagpanglimpyo ginpahibalo ni Engr. Noel Hechanova, ang gapamuno sa City Environment and Natural Resources Office (City ENRO), sadtong Lunes, Agosto 13.
Sunu kay Hechanova, nahisugtan ini nila ni Mayor Jose Espinosa III bilang pagtamyaw kag pagselebrar sang City Charter Day sa palaabuton nga Agosto 25.
Angot diri, ginasaligan gid ang pagpartisipar sang tanan nga mga pumuluyo. Imbitado na ang mga eskwelahan kag mga national agencies sa pag-upod sa sining hublag sang siyudad.
Ang pagpati ta sini nga ang mga naga-partisipar pagatagahan sing partikular nga lugar nga ila pagalimpyuhan nga itudlo sa ila sang Barangay Captain.
Katulad ini sang paghiwat sang International Coastal Day nga sadto gintalana sa siyudad sa isa ka resolusyon nga ginpasar kag ginsuguran ni anay Konsehal Dave Jamora.
Ang International Coastal Day ginahiwat kada tuig sa ikatlo nga Sabado sang Setyembre. Sa nadumduman ko, daw wala na ugaling ini gina-selebrar sang siyudad. Kon gina-selebrar man daw pasapayan lang. (w_mateojr@yahoo.com/PN)
