MALAPIT na ang eleksyon. Sa palaabuton nga Mayo 13 na!
Daw mangamuti gid ang mga kandidato sang oposisyon, haw, labi na gid sa Senado sa diin 12 gid lang ang makapwesto. Ina kon patihan naton ang mga survey tubtub sa sining ulihi.
Of course, ang survey bisan ano ka “representative” (may representante and kada sektor) pwede man magsala. Indi lang tungod ang survey ginabase lang sa sample, nga sa masami wala gani sing 10 porsyento sang populasyon, kundi tungod man kay sa sige lakat sang panahon pakadto sa adlaw sa eleksyon pwede man magliwat ang sentimiento sang mga botante.
Sa sining ulihi nga survey sang Pulse Asia, si Bam Aquino lang sang Otso Deretso ang nakahawid, kag halos kuligot pa, sa nahauna nga 16. In fact, ang palangga naton nga Ilonggo nga si Mar Roxas wigit pa gani sa survey.
Kg ina bisan pa nga nagabulig na ang Iglesia Catolica sa pagkampanya batok kay Presidente Duterte kag sa iya mga kandidato nga naga-tolerar sang pang-atake niya sa Simbahan.
Indi manegar nga kinahanglan sang oposisyon ang tanan nga bulig, lakip na sang Simbahan nga naga-kritikar man sa Presidente sa ila mahuyang nga sitwasyon sa karon.
Importante gid kaayo ang isa ka mabakud nga oposisyon agud pamatukan ang ano man nga hagna nga itulod sang Presidente sa Senado sa nabilin niya nga tatlo ka tuig. Of course, ina kon indi na mag-ambisyon si Duterte sa pagdeklarar sang martial law sa bug-os nga pungsod kag ipilit ang iya a la Marcos nga pangginahum!
Well, admitido naton sa Filipinas nga ang pensamiento sang mga Filipino natunga sa ila pagtuo kag sa ila kinahanglanon sa pangabuhi nga indi mahatag sang Simbahan.
In other words, indi buot silingon sini nga kontra na nila ang Simbahan kon mapierde ang luyag sini, kay ang ila pag-ulikid sa Simbahan lain man sa ila tauhanon nga kinahanglanon.
Indi man ugaling buot silingon sini nga wala man sing balatyagon ang mga tumuluo sa ila Simbahan bisan pa gina-atake na ini, kay pwede man mag-simpatiya sila sa mga kandidato sang Simbahan tungod sini.
Sang sining ulihi gani, gin-udyok na ni Archbishop Socrates Villegas agud botohon ang mga kandidato nga naga-kritikar sa Presidente.
Ginpahayag ni Villegas, sa iya video, ang pang-insulto ni Presidente sa mga pari kag mga obispo, lakip na si Pope Francis, labi na gid ang pagtawag ni Duterte sa Diyos sang mga Kristiyano nga isa ka “Stupid God”.
Sa iya Facebook account, ginpa-konsyensya pa ni Archbishop Villegas ang mga pumuluyo sa iya pamangkot: “Are you betraying the Son of Man with a kiss (patungod kay Hudas Iscariote)? My dear brothers and sisters, are you going to betray God? Are you going to deny your faith by your vote?”
Sa aton pulong, luyag ipaathag ni Archbishop Villegas nga ang pagboto sa mga kandidato ni Duterte isa ka “denial of faith” ukon pagpakalain mismo sang pagtuluohan katoliko.
Gina-suportahan ining panawagan ni Archbishop Villegas sang mga kandidato sang Otso Deretso.
Nagtuhaw man gani ang isa ka inter-faith nga grupo (katoliko kag protestante) nga naga-oponer sa kay Presidente Duterte kag sa iya mga kandidato.
Gin-endorso sining People’s Choice Movement ang mga kandidato sang Otso Diretso, upod ang duha ka independiente nga mga kandidato sa pagka- senador.
Ini sila amo ang masunod: ang Otso Deretso nga mga kandidato nga sanday Bam Aquino, Mar Roxas, Chel Diokno, Samira Gutoc, Romulo Macalintal, Erin Tanada, Gary Alejano kag Hilbay upod ang independiente nga mga kandidato nga sanday Grace Poe kag Nery Colmenares.
Sunu sa People’s Choice, ining mga kandidato nagatindug sa mga Christian values nga “honor, competence and faithfulness to God and the Constitution”.
Apang mangin-madinalag-on gid bala ining hublag para sa “Catholic vote”? Makapadaug gid bala ini sang mga kandidato sang oposisyon sa Mayo 13 nga eleksyon?
Diyos lang seguro ang makasiling kon itugot ini Niya nga matabo. Kon indi, may rason ang Diyos kon ngaa indi. Kag indi kita makalalis sa sining kagustuhan sang Diyos.
Personal sa akon, indi pa gid ako makasiling sa subong. Apang kon ano ang luyag sang Diyos, sa akon padayon nga pagpakig-angot sa Iya, sundon ko. Lain gid ya kon may kalinong ang konsyensya mo. (w_mateojr@yahoo.com/PN)
