MADAMO na ang nakatalupangod sa nadangatan sang syudad sang Iloilo. Madamo sang nagadayaw, madamo sang nakunyag, madamo man ang nagakaibog sa manami sini nga dagway.
Apang ang tanan nga maanyag nga rosas nagatambok, nagalambo kag abayan ang pagtubo bangud sa bastante nga abono sa duta nga iya ginatubuan. Kaangay sang syudad sang Iloilo nga nagpamukadkad bangud sa iya mga naglilipas, bangud sa matambok sini nga maragtas nga bastante sa eksperyensya kag paghimakas.
Sang Sabado, Agosto 25 ginasaulog ang ika-81 ka tuig nga Charter Day kag isa ka special nonworking holiday santu man sa pagdeklarar ni Presidente Rodrigo Duterte sang sini nga petsa.
Labaw sa deklarasyon nga wala sang trabaho para sa iban nga empleyado, dapat naton nga balikdon ang maragtas kon ngaa may ginsaulog kita karon nga Charter Day diri sa syudad sang Iloilo.
Nagsugod lang ang pagsaulog sang Charter Day sang syudad sang nagpungko bilang alkalde si Mayor Jed Patrick Mabilog sadtong Hulyo 1, 2010 bangud para sa iya daw wala gid sang may nakahibalo kon ano na ka tigulang sang syudad.
Suno sa maragtas, Hulyo 16, 1937 ang petsa sang nangin kasuguan ang Commonwealth Act No. 57 nga nagakambyo sa Iloilo bilang syudad.
Indi bastante ang 15 ka adlaw sa pagpreparar sa sini nga hitabu rason nga ang misa sang pagpasalamat ang ginhiwat lang sang Hulyo 16 kag ang highlight sang selebrasyon gin-isol sa Agosto 25 ukon 40 ka adlaw ang nakalipas agud nga maakomodar ang magkatuhay nga mga aktibidad nga nagapasundayag sa pinasahi nga karakter sang pagdumala sa syudad sang Iloilo.
Mas nagakadapat sa karon nga liwat nga id-iron kon ano ang husto nga petsa sa pagsaulog sang Charter Day, dapat santu sa maragtas kag santu sa napagkit sa mga kasulatan.
Indi masyado mabatyagan ang pagsaulog, kaangay sa kaadlawan kon ang selebrasyon ginahiwat nga abanse ukon atrasado kaysa sa matuod nga adlaw sang pagkabun-ag.
Nagakaangay lamang sa sini nga administrasyon nga tipunon ang mga hangkilan nga nakahangop sa maragtas kag sa nakalipas nga sugilanon tuhoy sa syudad.
Indi naton pagtugutan nga magtalang kita sa petsa kag magsaulog sa indi angay nga tion. Ang sayop nga makapila ka beses nga ginahimo ang maandan kag mangin tadlong sa mata sang wala sang nahibaluan kag mangin salandigan sang masunod nga henerasyon.
Samtang may panahon pa nga matadlong ang isa ka bagay, dapat nga himakasan ini sang gobyerno sang syudad kag indi pag-ibase lang sa huyog sang nagadumala sa renda sang city hall.
Ginagamit naton ini nga talaksan sa kon ano na ang aton nadangatan, kon ano na ka mauswagon ang syudad gikan sa nakalipas nga mga panahon kag kon ano pa ang madangatan sang syudad sa pila pa gid ka mga dinag-on.
Nagapang-agda kita sa mga Ilonggo sa diin man nga bahin sang kalibutan nga magbuylog, magpakig-isa kag magbulig sa pagpadayon sang kauswagan sang syudad, sang doog nga aton natawhan.
Samtang indi naton matadlong ang banas gikan sa gin-usoy nga maragtas, may magapamangkot kon san-o ang Charter Day sang syudad sang Iloilo. (bertladera@gmail.com/PN)
