ISA ka “surprise announcement” ang ginpahayag ni DILG Sec. Benjamin Abalos Jr. sa isa ka presscon sadtong Enero 4.
Nanawagan siya diri sa mga matag-as nga mga opisyales (halin koronel tubtub heneral) sang PNP agud mag-sumiter sang ila courtesy resignation. Mga 1,000 ini sila tanan, sunu sa isa ka balita.
Sugot sini si PNP Chief General Rodolfo Azurin Jr, kag wala nagpaulihi ini sa pag-sumiter sang iya courtesy resignation sadtong Enero 5.
Upod diri ni Azurin sanday Deputy Chief for Administration, Lt. Gen. Rhodel Sermonia, Deputy Chief for Operations, Lt. Gen. Benjamin Santos Jr., si Chief of Directorial Maj. Gen. Michael John Dubria, kag si PNP Internal Affairs Service Director Alfegar Triambulo.
Tungod sa sining courtesy resignation ni Azurin, ginalauman nga tanan sini sa ila magatuman sa sining panawagan ni Abalos.
In fact, una gid nag-sumiter sang ila courtesy resignation ang 2 ka heneral kag 28 ka mga koronel sang PRO-7 (Central Visayas) sadtong Enero 6. Ginapangunahan ini ni PRO-7 chief Brigadier General Jerry Bearis.
Sunu kay Bearis, lakip diri ang Deputy Regional Director for Administration, Deputy Regional Director for Operation, kag ang Deputy Regional Chief and Directorial Staff.
Diri sa PRO-6 (Western Visayas), may mga 29 ka mga heneral kag koronel nga gina-expect man nga mag-sumiter sang ila mga courtesy resignation.
***
Ngaa sila gid nga tanan ang kinahanglan mag-sumiter sang ila courtesy resignation?
Sunu kay Abalos, ina tungod nabutang gid ang kredibilidad sang bug-os nga PNP sa paglamita sini sa ila sa droga. Labi na gid kay ang na-involver amo ang mga matag-as nga mga opisyales sang pamunuan sang PNP.
Sa matandaan pa, sa isa ka regular nga buy-bust operation sa Tondo, Manila, gintudlo gid sang suspect si Police Master Sergeant Rodolfo Mayo Jr. sang PDEA bilang isa sa mga mayor-mayor sa pagpalapta sang droga sa pungsod.
Gintultol siya kag nakita gid sa isa ka storage area upod ang 990 kilos sang shabu. Nagwa man sa imbestigasyon ang rebelasyon nga may pila gid kay mga heneral kag koronel ang naangot gali sa illegal drug trade.
Daw indi pa magpati si Abalos, apang ang iya kabalaka nagtulod gid sa iya agud mag–apelar sa ining matag-as nga mga opisyal sang PNP nga mag-sumiter sang ila courtesy resignation. May bendisyon ini ni Presidente BBM.
Pila pa man lang ang na-suspetsuhan sa ila, sunu kay Abalos, apang dalhon na gid lang ang iban tungod ang problema sang kredibilidad sang PNP nasandig gid sa pagpamuno sang mga heneral kag koronel.
Imagine, siling niya, kon sin-o pa gali ang dapat mag-protejer sa mga pumuluyo batok sa droga, sila pa gali ang promotor.
In fact, nagapati siya nga ang courtesy resignation gid lang ang pinakamadasig nga paagi agud masabat ang problema sang PNP sa droga sa pungsod.
Gani kinahanglan na gid ang “thorough cleansing” sang PNP, pamat-ud pa niya.
***
Kumporme kita sa ginapangayo ni Abalos nga mag-sumiter sing courtesy resignation ang ining mga matag-as nga mga opisyal sang PNP, basta matuman lang ang kasuguan.
Kag mapatuman lang ang “due process” kag wala sang paglabag sa Civil Sevice Law, among others.
Sa Idalom sang aton Bill of Rights, ginapaseguro diri ang “due process of law”, partikular ang kinamatarong sang akusado sa “presumption” nga inosente siya tubtub mapamatud-an gid nga “guilty”, kon guilty gid man, siya sang competent court.
Ang Civil Service Law naman nagasiling nga ang tanan nga empleyado sa gobyerno may kinamatarong sa security of Tenure. In other words, indi sila mapahalin (dismissed) sa serbisyo except for “just or authorized cause, kag “only after due process”.
***
Natuman bala ini nga mga requisitos sang layi sa panawagan ni Abalos agud mag-sumiter sang courtesy resignation ining mga high ranking PNP officials?
Sa aton ordinaryo nga paghangop, hue! Sunu kay Abalos ang courtesy resignation nila wala man nagakahulugan nga na-dismiss na sila.
Pa-imbestigahan pa sila kon ano gid ang ila involvement sa illegal drug trade kag kon ano gid kadalom sang ila involvement tubtub mahusgaran sila kag kon ano ang bagay nga pamatbat sa ila. Meantime, makapabilin pa anay sila sa serbisyo.
May natukod na nga Committee of 5 agud maghimo sini nga imbestigasyon sa sining mga matag-as nga opisyales sang PNP.
Isa dira si Baguio City mayor Benjamin Magalong, nga retired na bilang Director sang Criminal Investigation Detection Group./PN
