AMAT-AMAT na nga makita ang daku nga benepisyo sang ginahandom nga kaayuhan ni 4th District Board Member Rolando Distura para sa mga pumuluyo sang probinsya sang Iloilo.
Iga-instolar na sa Alimodian District Hospital ang 30 kilowatts peak solar photovoltaic. Ginhiwat ang capsule laying ceremony sadtong tinalikdan nga Martes, Abril 11, 2023.
Ginpahayag ni Board Member Rolly Distura nga kabahin sang pondo para diri ang gikan sa I-PORE ukon ang Iloilo Provincial Ordinance for Renewable Energy kon sa diin siya ang principal author kag sponsor sang sini nga ordinansa kag gikan sa Energy Regulations (ER) – 194 ukon ang host communities dapat makakwa sang rasonable nga ambit sang ginansya gikan sa power plants nga naga-operate sa sina nga lugar. Sa bahin sang probinsya sang Iloilo, may isa ka sentimo sa kada isa ka kilowatt nga ambit ang probinsya gikan sa power generating company.
Ginsiling sini nga ginasuguran na ang proyekto kag ila ginalauman nga makahatag ini sang supisyente nga kuryente para sa emergency room sang Alimodian District Hospital.
Pagkasunod nga adlaw, Abril 12, 2023, gintambungan man sini ang pagtugyan sang solar project sa Iloilo Provincial Hospital sa Pototan, Iloilo.
Gintugyan sang UNDP DREAMS Project, sa pagpanguna sang ila Project Manager nga si Mr. Ricardo Torres, ang 75 kilowatts Solar PhotoVoltaic Rooftop Project sa Iloilo Provincial Hospital.
Kaupod sini nga nagtambong si Governor Arthur Defensor, Jr. nga nagpadalamat sa UNDP kag sa Department of Energy para sa sini nga proyekto kag komitido siya nga pasangkaron ang kaangay sini sa iban pa nga talatapan sang gobyerno probinsyal.
Nahibaluan nga ang tiglawas ni DOE Undersecretary Sharon Garin sa sini nga okasyon amo si Cong. Lex Colada sang AAMBIS-OWA party list.
Ginpabutyag sini nga naga-umpisar na nga ginagamit ang proyekto nga ginlunsar sadtong Abril 2023 nga nagabalor sang PhP 6.8 million sa idalom sang Development for Renewable Energy Applications Mainstreaming and Market Sustainability (DREAMS) Project sang Department of Energy (DOE) kabuylog ang Global Environment Facility (GEF) kag ang United Nations Development Program (UNDP).
Ginpahayag sini nga ginplastar ang proyekto sa parking lot sang ospital kag ang power sini ang igadul-ong nga wala sang sablag sa emergency room, operating room kag COVID-19 laboratory.
Makakinot ang ospital sang 113,000 tubtob 115,000 pesos kada bulan sa sini nga proyekto.
Nahibaluan nga ang Iloilo Provincial Hospital amo ang pinakauna nga ospital sa pungsod nga naka-avail sang nasambit nga solar energization project.
Kon aton lantawon, ang pag-usar sang renewable energy indi lamang makapaayo para sa aton palibot kag makabulig sa aton pag-away sa climate change. Ini man ang matinlo nga kuluhaan sang enerhiya nga dagaya kag duna nga yara sa aton palibot. Indi ini makahalit sa aton palibot, kag paagi sa aton maalam nga paggamit mangin tuman ini ka mapuslanon kag daku ang mabulig sa pagtin-ad sang aton pangabuhi.
Tuman ka importante ang renewable energy para sa subong nga panahon tungod nagadaku ang aton konsumo sa kuryente kag kon kaisa ginakulang na kita sang kuryente nga nagatuga sang sablag sa aton ginahimo kag mga hilikuton.
Nakita ni 4th District Board Member Rolando Distura ang kaimportante sang kuryente sa operasyon sang ospital kabangdanan nga iya gid ginduso nga dapat prayoridad sa solar power project sang probinsya sang Iloilo.
Ginpahayag sini nga indi dapat masablagan sang hinali nga pagkadula sang power supply ang serbisyo medikal sang mga ospital sa mga pasyente, ilabi sa operating room kag emergency room.
Ginsiling sini nga mabudlay para sa mga doktor nga mawad-an sang power supply ang emergency room kag operating room samtang may ginahingagaw nga madapatan sang pagbulong kag atensyon medikal.
Ginapasalamatan sini sanday Vice Governor Christine “Tingting” Garin kag mga kaupod sa 14th Sangguniang Panlalawigan tungod nabutang sa limelight ang probinsya sang Iloilo nga pinakauna sa bug-os nga pungsod nga may ordinansa nga I-PORE ukon Iloilo Provincial Ordinance for Renewable Energy.
Gintuad sini nga madamo na ang luyag nga mangin ka-partner sang sini nga programa nga kabahin na sang MorProGRess Iloilo ukon “Movement for a Robust, Progressive and Globally competitive and Resilient Province of Iloilo” nga programa ni Governor Arthur Defensor, Jr.
Magluwas sa una nga duha ka ospital nga natumod, malipayon nga ginapaalinton ni 4th District Board Member Rolando Distura nga pahamtangan man sang solar photovoltaic ang Ramon D. Duremdes District Hospital sa Dumangas, Iloilo; Governor Niel D. Tupas, Sr. District Hospital sa Barotac Viejo; kag isa pa gid sa bahin sang tercer districto sa probinsya sang Iloilo nga may 5 million pesos kada isa gikan sa 25 million pesos nga pondo nga napain sa sini nga tuig tungod nasaad sa I-PORE ukon Iloilo Provincial Ordinance for Renewable Energy nga painan ini sang pondo nga katunga sang isa ka porsyento sang kabug-usan nga badyet sang probinsya sang Iloilo.
Ginsiling nga mangin tayuyon na ini kada tuig kag tubtob nga malikop ang tanan nga district hospital nga mapahamtangan sang solar PV kag igasunod naman ang mga istruktura kag pasilidad sang Iloilo Provincial Government kaangay sang Iloilo Sports Complex, ang kapitolyo kag iban pa; kag ang matumod nga mga pampubliko nga buluthuan sa elementarya kag high school.
Ginapasalamatan man sini nga madamo na sang international non-government organizations nga luyag mangin partner sang programa nga naga-adbokasiya nga mag-usar sang renewable energy nga dagaya sa palibot kag maamligan ang kalibutan batok sa climate change.
Nakita man ni Distura nga kon makakinot ang mga ospital sa ila balayran sa kuryente tungod bahin sang ila konsumo ang nagagikan na sa solar energy, ang ila makinot nga balor sang kwarta ang mahimo magamit agud ibakal sang bulong kag iban pa nga kagamitan sa ospital agud nga mangin masulhay ang pag-operate sang mga ospital.
Nagapati si Distura nga daku ang makinot sang mga ospital kag ini ang daku man nga bulig sa pagpasanyog sang ila serbisyo medikal kag madamo ang madapatan sang bulong, ilabi na ang mga pigado kag nagakinahanglan.
Ipadayon naton ang adbokasiya tuhoy sa renewable energy, tungod indi lamang ini tuhoy sa enerhiya kundi lakip man sa ekonomiya, medisina, serbisyo, benepisyo para sa tawo. (bertladera@gmail.com/PN)
