MAISUG nga aktibista ang sadto dalaga pa ang nagtaliwan nga si Quezon City Judge Rita Bascos-Sarabia, nga sadto nangin konsehal man sang siyudad sang Iloilo.
Bata pa siya, mga 61 lang, kag ginkanugunan siya sang kapareho niya nga mga hwes, katulad ni retirado nga Judge Rudy Castrojas sang San Jose, Antique nga nakadungan ko sa haya sini sadtong Disyembre 30 sa isa ka funeral parlor sa Iloilo Coastal Road.
Si Rita, ukon Ritz, kon tawgon sang mga abyan, isa sang mga militante nga mga estudyante sadtong pagsugod mismo sang Marcos martial law. In fact, masami siya makita sa mga rally, katulad sang rally nga ila ginhiwat sa Mobil Gasoline Station sa atubangan sang amon puluy-an sa Lapuz Sur sadto.
Bag-o lang ako sadto nag-abot halin sa amon diutay nga uma sa Jordan, Guimaras sa diin “gintapok” ako sang akon masakiton nga iloy tungod indi siya luyag nga padayon ma-involve ako sa mga paghimakas batok sa Marcos martial law.
Isa ka matahum kag medyo brusko sing tingog nga dalaga ang nanawag sa amon gate nga ako mismo ang nakasabat. Gapangabay sa paggamit sang telepono. Ginpasugtan ko kag gintudlo ko siya sa telepono sa salas. Samtang, sige ang siniyagit sang iya mga kaupdanan sa atubangan sang Mobil Gasoline Station. Wala lang ko makadumdum kon ano ang isyu, although, ginhaum-haum ko nga may kahilabtan ini sa padayon nga pagtaas sang bili sang langis kag sa isyu nga US-Marcos Imperialism. Nagpasalamat si Rita pagkatapos kag nagbalik na sa iya hanay nga naga-rally.
Ang ining Mobil Gasoline Station nagtakop na kag ginbuslan sang isa ka bodega sa karon. Wala naman ako naga-istar diri sa amon puluy-an sa Lapuz Sur kay yara na ako upod sang akon pamilya sa amon kaugalingon nga puluy-an sa Mandurriao.
Nagkit-anay kami ni Rita liwat sang pagdaug sang Edsa Revolution batok sa rehimeng Marcos nga nagbutang sa pwesto sa kay Presidente Cory Aquino.
Nagdaug siya sang ulihi bilang konsehal sa siyudad sang Iloilo, nga ang matahum nga hinimunan masami unod sang akon mga report kag panugdaon (column writing) sa padayon nga pagsulat ko sa Panay News.
Isa siya sang ginahangad ko nga public servant tungod sa madamo kag mapuslanon nga mga ordinansa nga iya nahimo, labi na gid ang angot sa pag-amlig sang palibut (environment), kag tungod man sa iya maisug nga mga panindugan sa mga isyu pabor sa mga lupig kag pobre.
In fact, ang akon paghangad sa iya nagpadayon bisan hwes na siya. Nangin Facebook friend ko siya. Sa isa niya ka post, nakita ko gani ang iya maisug nga pagpangapin sa Simbahan sa pila ka isyu batok sini.
Gani, ginkasubo ko gid ang balita nga nagtaliwan siya sa isa ka masakit nga hitabo – ang mapatay sa paglupok sang may gas-leak nga LPG sa kusina sang ila puluy-an sadtong Disyembre 26.
Nagtaliwan siya nga dala ang kaisug sa iya nadangatan. Nag-sufrir siya sang third-degree burn, nga nagbutang sang iya kabuhi sa daku nga peligro.
Tungod seguro nahangpan niya nga indi na siya makaluas pa sa iya nadangtan, nagpamilin-bilin na siya.
Wala man nadula ang iya daku nga kabalaka sa iya panimalay – upod sa iya bana nga si Atty. Rene Sarabia kag duha ka hamtong nga mga kabataan, nga ang isa sini bag-o lang makakuha sang bar, ukon board para sa mga abogado.
Ginsugid sa aton ni Atty. Sarabia sa iya haya sadtong Disyembre 30 nga sang nagaantos na siya sang mga lima ka adlaw sa ospital sa Metro Manila nagpabutyag gid siya sang iya daku nga pagkabalaka sa ila.
Ginpabutyag niya sa iya bana nga tungod sa daku na nga kagastuhanan sa iya pagpabulong, tani kuhaon na lang siya sang Diyos sing dayon.
Natuman ini sunu mismo sa iya pangayo sa Ginoo bag-o ginahanda na siya sang mga doktor nga operahan.
Ritz, may you find peace with our ever loving God! (w_mateojr@yahoo.com/PN)
