GINADUSO ang aton kalag sang aton mga paghimakas, nagapanikasog agud nga malab-ot ang handom, mahatagan sang katumanan ang mga damgo kag mabatak gikan sa kumunoy sang kapigaduhon ang kabuhi.
Kaangay sa pila ka mga komunidad sang mga tumandok ukon ang Panay-Bukidnon kag ang mga Ati sa pila ka mga maligwin nga doog ukon mga komunidad diri sa aton sa isla sang Panay, sila ang may mga kaliwat nga nakatapos na sang pagtuon, mga propesyunal kon tawgon, kag may yara man sa ila nga nakahangop na sa sitwasyon rason nga nagahimakas nga mabuligan ang ila mga kaangay nga mabatak sa ila kahimtangan.
Manami lang lantawon nga may mga day care worker sa ila nga hubon nga nagahimakas agud nga maatipan ang mga kabataan sa ila komunidad, mahatagan sang kaalam, matuytuyan sa angay nga direksyon kag mas mapamuklat ang ila mata sa masangkad nga kalibutan nga ila ginahulagan.
May mga nagaboluntaryo kag nagapakigbahin sang ila tinion kag kusog agud nga mabuligan ang ila mga kaangay nga makabaton sang bulig gikan sa gobyerno, nagapanguna sa pagpatigayon kon ano ang angay nga himuon agud nga ila maagom ang ginatan-ay nga programa kag proyekto nga may daku nga benepisyo sa ila pagpangabuhi.
Madamo sa mga kauturan naton nga mga Ati kag mga Panay-Bukidon nga mas nakahibalo kon paano ipatuman ang mga programa kag proyekto sang DSWD, mas may ihibalo sila sa proseso kag mas tampad kag hayag ang ila pagpatuman sini para sa benepisyo sang ila komunidad.
Sila ang ehemplo sang mga wala nagadalok sang ila kaugalingon agud nga mahalad ini sa iban para sa kaayuhan sang ila kahimtangan. Nagasakripisyo sila paagi sa pag-uyang sang tinion, sang kusog kag paghimakas nga matigayon ang ila ginahandom.
Wala sila nagapanumdom sa kon pila ang ila magan-it sa proyekto, kon pila ang ila isipi para sa ila nga bulsa kag kon pila ang ila maalgo labaw sa ila mga kaangay nga kulang sa alam kag ihibalo.
Makita naton sa karon nga ang iban sa ila nakatuon na kon paano sumpungon ang hikay sang iban nga komunidad, kon paano atubangon ang mga pagyubit sa ila ikasarang, kag kon paano magpanindugan para sa ila kinamatarong.
Madamo na sang Ati ang mas nakahangop kon paano nila mapatin-ad ang ila komunidad apisar nga kulang sila sa edukasyon. Ang ila pamakod amo ang ila tampad nga katuyuan kag ang ila handom nga sila ang makatibawas sa lunang sang nakalipas.
Makadayaw ka kon imo sila mabatian nga nagapanugiron sang ila kasaysayan, sang ila mga paghimakas, sang ila mga ginbatas, kag kon paano nila naagom ang kadalag-an.
Mas makawiwili na sila pamatian bangud may kumpiyansa na sa ila kaugalingon, mahibalo na maglingaw sa nagapamati, kag wala na sang pagpang-alang-alang sa pagpamulong-pulong sa atubang sang mga tawo.
Nagalipas na ang panahon nga sila ang yara lang sa higad nga nagapamusi-musi. Karon yara na sila sa tunga kag nagapahayag nga may pagsalig sa kaugalingon.
Ipadayon naton ang pag-ugyon nga mahatagan sang katumanan ang mga damgo sang mga Ati kag mga Tumandok./PN
