NAGAHILAPIT na ang pagsugod sang kampanya sa lokal nga piniliay. Mas nagahugot ang hulag sang mga kandidato sa ila tagsakdag. Mas gina-rendahan ang para sa ila kag ginasiguro nga indi gid makabuhi kag magkadto sa iban nga grupo.
Mabatyagan na naton kon paano nila hugton ang ila kubay, ang pagpaniguro nga wala sang may mawasi kag magdaridi padulong sa hukmungan sang ila kasumpong.
Maathag man nga sadto pa nagapabatyag na ang kada isa sang ila mga tinutuyo bisan wala pa nakaumpisa ang kampanya. Mas temprano mas maayo para sa ila kag indi dapat maunahan sang ila kasumpong sa pagpalab-ot sang ila mensahe kag intensyon sa patag sang pulitika.
Gintakus sang survey kon paano ginabaton sang pumuluyo ang ila intensyon sa pagpili kag nakita na sa mas temprano pa kon ano ang distansya nila sa kada isa sandig sa ginasugid sang numero.
Nangin masunson sa ila mga lihok ang kampo sang mga Treñas, ilabi na para sa kandidatura sang iya nga anak. Madamo sang mga hilikuton kag wala pahuway ang pagpatawag sa ila mga tagsakdag. Nangin masaku ang pagpakilala sa mga botante kag nangin masami ang pagpakita sa mga pampubliko nga hilikuton kag paglagaw sa kabarangayan.
Halos nagpati ang mga tawo nga wala sang mapag-on nga kontra sa pagka-alkalde sa syudad sang Iloilo ang anak sang alcalde, ilabi na nga wala masyado nagalibot sa barangay, indi masyado makita sa social media, indi halos mabatian sa radyo, kag wala sang makinaryas nga makapatanlas sa iya pagpakilala sa mga pumuluyo.
Kon lantawon ang sitwasyon, bentaha sa anak sang nagapungko karon sa pwesto bilang alkade sa syudad sang Iloilo.
Apang, makatilingala lamang tungod sa imbukada sang mga survey yara sa 35% ang kasumpong nga si Roland Magahin kag 65% ang anak sang alkalde. Kon analisahon, tuman na ini kataas nga sahi sang numero tungod nga ginakabig nga wala sang kasumpong ang anak sang nagapungko kag wala makinaryas si Magahin.
Makatulublag ini nga sitwasyon bisan pa masiling naton nga pwede pa magbag-o samtang nagahilapit ang adlaw sang kampanya kag adlaw mismo sang piniliay.
Maathag nga ang kasumpong nga ginakabig nga wala naga-igsister nagahakop sang daku nga bahin sang mga botante.
Makatulubag gid ini tungod ang kasumpong nga ginakabig wala sang kapasidad para sa kampanya kon makinaryas, wala wala sang tinawo kag social media, ang mas ginapili sang ikatatlo nga bahin sang tanan nga botante sa syudad.
Paano na lang sa masunod nga inadlaw kon may yara sang matubong sa kampanya ni Magahin? Kon may yara na sang magatib-ong sa iya kandidatura? Kon may mga grupo kag mga sektor na nga mag-endorso sang iya kandidatura?
Madugangan ayhan ang 35%? Mabuhinan ayhan ang 65%? Madamo kag daku ang posibilidad nga magaligwat ang numero depende sa mga kabangdanan kag hugtanay sang kampanya sa palaabuton nga inadlaw.
Dapat nga tun-an sang kampo sang alkalde kon ano ang mga kabangdanan kon nga wala bisan wala gahud kag makinaryas ang kasumpong apang ngaa madamo sang nagaupod sa iya kandidatura.
Ayhan may mga bagay nga wala naluyagan ang mga botante sang syudad sa iya ukon sa iya nga anak?
Ayhan may mga isyu nga dapat klaruhon tungod nakaapekto sa ila kandidatura kag nagapalas-ay sa pagtamod sa ila sang mga botante?
Kon magbutyog ang kampanya sang kasumpong, masapar ayhan sang alkalde? Kon magsugod na sia sa pagpaalinton paagi sa kahanginan kag social media nga mas angay sia kag may ikasangkol, mas madugangan ayhan ang magasuporta sa iya?
Kon mas magpanghugot na ang alcalde sa iya hulag kag mandu, posible nga indikasyon na ini nga apektado na sia sang sitwasyon. Indi na sia dapat nga pagpabuyan-buyanan kag magkampante.
Sa subong, indi pa mahibaluan kon paano mag-atake ang iya kasumpong. Indi pa mahibaluan kon sa diin nga bahin magagikan ang paglunsar sang atake ka kon ano nga sahi sang atake.
Ayhan dapat nga magkabalaka ang alkalde para sa kandidatura sang iya anak?
Kon binalhas sia sadto sa pagsumpong kay Jun Capulot nga incumbent sia kag yara ang tanan nga makinaryas sa iya, indi ayhan sia pagbalhason sa pagdepensa sa iya anak nga wala sang eksperyensya sa panghimanwa kag may kasumpong nga negosyante kag madamo man sang pangilala?
Sa subong, anak niya ang nagapapili. Mas mahuyang kag may nakita nga litib ang kasumpong.
Indi naton mapaktan kon magtingob ang tanan nga mga kasumpong sang alkalde kag maghugpong para itib-ong ang kandidatura ni Magahin.
Sa subong, malinong ang ilig sang tubig sa suba. Madalom?
Indi makakumpiyansa ang alcalde. Madamo sang nagahipos. Madamo sang wala nagapabatyag kag daw sa wala kahibalo sa mga nagakatabu.
Apang, makabulungol ang kalinong.
Yara ang kasumpong, nagatusik pero wala pa naga-angkab. Wala sang may ginapahibalo nga may ginasandigan apang padayon ang pagdayan.
Tandaan naton nga ang boksidor may ginapuntirya ang iya inumol. Nagahampang sa lona apang ang target amo nga mapatumba ang kontra. Wala nagapangharog, istratehiko ang pamaagi kon paano ang kasumpong mapyerdi.
Balik kita sa pamangkot, may dapat bala nga kabalak-an si Mayor Jerry Treñas? (bertladera@gmail.com/PN)
