IRONIC, ukon taliwas, ang ginhimo ni Lieutenant General Antonio Parlade Jr., spokesman sang National Task Force to End Local Communist Armed Conflict (NTF-ELCAC), sa pagdampig sa Demokrasya kontra Komunismo sa iya pamahog sa mga artista nga sanday Liza Soberano, Angel Locsin kag Miss Universe 2018 Catriona Gray.
Tungod sini, dapat mag-apology gid si Parlade sa pagpamahog niya sa tatlo ka artista. Bisan na lang sa pag-respeto sa mataas nga pagkilala sa ila sang mga pumuluyo.
Partikular sa akusasyon kay Soberano, ang nahibal-an ta amo nga nangin bisita siya sa isa ka interview sa internet (webcast) sang isa ka youth group sang Gabriela angot, for one, sa rape joke kontra sa iya sang isa ka netizen, nga ginpasakaan na niya sing kaso.
Ano ang malain dira kay bisita man lang siya sang grupo? Indi man siya myembro. Natabuan lang ugaling nga gina-akusaran ini nga grupo ni Parlade nga provider sang pila ka myembro sang NPA.
Si Presidente Duterte gani nakipag-interview man upod sa presidente sang Communist China, bisan indi man siya Komunista (sunu sa iya), kundi Sosyalista lang.
***
Nagagwa gani nga si Parlade pa ang indi-Demokratiko sing panghuna-huna kag panggawi sa iya asta batok sa tatlo ka artista.
Ang iya metodo sa paglaygay kon ano ang maayo nga himuon sang tatlo amo ang pamahog sa kabuhi nila kag sa kalinong sang ila pamilya. Ginpakita man niya ang iya “simplistic reasoning” nga tungod nakita ka sa isa ka grupo nga kontra sang gobyerno kaupod ka na sa grupo nga ina.
Authoritarian (Kinamunista kon hambalon pa sang iban) ina nga pamatasan, indi maki-Demokrasya! Pamahog ang pamaagi sang authoritarian nga gobyerno agud mag-tener sa poder. Indi man sila luyag makigbais sa mga pumuluyo kay ang tindug sini, katulad sang Communist Party, human na nga indi masuay.
Tani makilala ini ni Gen. Parlade kag mahibal-an ang matuod gid nga pagka-Demokratiko sa iya panggawi.
Ang pamahog sa tatlo ka artista isa man ka paglabag sa ila kinamatarong sa “Free Speech, Expression, or the Press…” nga gina-proteksyunan sang Sec. 4 sang Bill of Rights.
“No law shall be passed abridging (them)…,” siling gani sini.
Dapat man magtuon si Parlade sing dugang sa subject: “Critical Thinking” agud indi lang magpatu-pato. In fact, laygay gani ni Defense Secretary Delfin Lorenzana sa iya: “Kon wala ka sing ebidensya maayo pa maghipos ka na lang.”
Sa Demokrasya ginasunod naton ang Rule of Law nga ginapatuman sang aton Constitution nga ginbalay sang aton mga pumuluyo, kag indi lang ang luyag sang gobyerno.
Sa Demokrasya, ang mga desisyon ginagamitan sing tul-id nga panghuna-huna (indi simplistic reasoning), katulad sang paghusga sa isa ka tawo paagi sa Due Process sa diin ang isa ka ginapabangdan maagi anay sa matul-id nga procedure halin sa pagka-suspetsado pakadto sa fair trial tubtub mahusgaran siya sang isa ka competent judge.
Unlike ini sa authoritarian nga gobyerno. Gapahapos lang ini paagi sa “simplistic reasoning” nga kon kis-a sandig lang sa sugid nga wala sing masaligan nga ebidensya. Tungod sini, ordinaryo lang ang mahusgahan sing kasal-anan tungod sa hinisaay sa poder ukon “prejudice”, ukon kontra nga panghuna-huna.
***
Mas malala pa gani ining ginhimo ni Parlade sangsa Martial Law ni Marcos. Samtang halata na ni Marcos kon ano ang huyog sang mga leftist, wala gid si Marcos namahog nga mapatay ukon patyon sila sa ila pagtililipon.
Ginsunod niya ang paagi Demokratiko sa ila, bisan pa gani yara sa iya ang poder sang gahum militar, agud makakalap sang ebidensya kontra sa ila agud maakusaran sa korte.
Ako sadto masami man gaupod sa pagtililipon sang mga progresibo nga mga grupo sa “common cause” sang mga pumuluyo batok sa diktadurya ni Marcos, katulad sang Bayan Panay, Gabriela kag LFS, apang bisan pamahog nga dakpon ako sang militar ukon habuyan sing granada ang amon pagtililipon wala ina namon maagyan.
Kaupod ko sadto sa grupo si Atty. Oligario Santisteban (+), ang Tsirman sang Bayan Panay, si Atty. Rodolfo Cabado, si Atty. Neri Duremdes (retirado na nga hwes), si Jory Porquia (presidente sang LFS), kag iban pa.
Sang ulihi, nag-upod na ako sa UNIDO, political party ni Doy Laurel vs Marcos, kag sa grupo sang Solidarity sang mga pari kag madre batok kay Marcos./PN
