NAGAHILAPIT na ang adlaw sang paghukom sang mga botante sa mga kandidato. Ginahilas na ang tanan nga kandidato, indi mapahamtang kag nagapukwat-pukwat sa ila tagsa ka napungkuan.
Diri sa syudad sang Iloilo, halos magpang-itanay na ang magbilas sa kon sin-o sa ila ang angay nga magpungko sa pagka-alkalde. Madugay na ang ila nga habuyanay sang sugilanon kag may mga pag-insulto nga nabatian nga nagkawas sa ila baba.
Kon imo lantawon, daw kaangay lang sang tul-an ang syudad sang Iloilo nga ginaawayan sang duha ka gutom nga mga ido. Apang, lunsay man sila nagasiling nga ila ipadayon ang pagtin-ad sang syudad.
Una nga nagpabugal sang iya paborable nga resulta sang survey si Congressman Jerry Treñas, kag upod sa iya grupo, ila nga ginpa-ila-ila sa kasumpong ang pagdominar sa una nga hugnat sang survey.
Ginsundan sang isa pa ka survey kag liwat sila nga nagpanguna apang sang sining ulihi lang nagpagwa man sang survey ang kampo ni Mayor Jose Espinosa III nga siya na ang nagapanguna sa ila nga magbilas.
Apang, ginakwestyon naman ni Treñas ang resulta sang survey nga nagapanguna ang iya bilas, ginsiling sini nga wala naga-igsister ang nagpatigayon sang survey.
Halos dominante nila nga duha ang entablado sang kampanya. Kahibalo sila magpalutaw sa sugilanon agud nga indi sila madula sa panan-awan kag indi madula sa palamatin-an sang mga botante.
Samtang nagahilapit ang adlaw sang paghukom, Mayo 13, madamo pa sang dinamak kag daw indi makaon sang ido nga mga isyu ang magapanimaho kag magatuhaw.
Nakahibalo na si Espinosa sa mga diskarte sang iya bilas. Dapat may patalang nga diskarte si Treñas nga likom sa ihibalo ni Espinosa nga wala niya nahimo sang una sang sila ang naga-updanay pa.
Kada isa sa ila naga-uyat sang alas. Kada isa sa ila kahibalo sang tikang kag diskarte kag posible nga may mga panigana na sila kon paano makalabaw ang isa sa ila.
Indi lang sila malipat nga yara pa si Dr. Pacita Gonzalez. Basi mabuyo sila nga duha sang dis-uganay sa karera kag indi nila mamulalungan nga yara na sa luyo nila si Gonzalez kag nagahulat sang tayming nga may mahulog sa ila sa linya.
Wala pa sila sang ihibalo sa kinaiya ni Gonzalez sa pulitika. Posible nga ang ila nahibaluan amo lang ang taktika ni anhing Justice Secretary Raul Gonzalez Sr.
May ginasiling nga ‘dark horse’ ukon ang wala sang ginahum-dahom apang hinali nga naglusot kag ginwigit ang iya mga kasumpong.
Sa nasiling na, diri sa syudad sang Iloilo, indi talaksan ang kadamuon sang nagatambong sa political rally. Kahibalo na sina ang mga kandidato.
Indi man talaksan ang pagpanguna sa survey. Kahibalo na sina ang mga kandidato. Lantawa lang ang iya guya nga puno sang kabalaka. Himulsuhi sila nga puno sang kahangawa.
Ang masami nga wigit kag indi makita nga may madamo nga tagsakdag ang dapat nga bantayan. Mas madalom ang tubig nga malinong. Mas magansal ang kalinong.
Mas makahalangawa nga samtang nagaupas sa tul-an ang magbilas, nagaligon-ligon na sang karne si Dr. Pacita Gonzalez. (bertladera@gmail.com/PN)
